Read Angami Naga Jeremia 32 Bible Online

Jeremia 32 - Angami Naga bible

Jeremia 32

¹Zedekia-e Juda kedi chükelie cie ker cie, süu Nebukadnezar kedi teicie kerethetha cie, Jihova kinu die Jeremia ki vor.

²Süteiki Babilon kediu chüpahi-e Jerusalem re, sidi Jeremia siedzekesiu tepie rükhouko bou nu khawa, süu Juda kediu ki,

³Juda kediu Zedekia-e puo tepie sünu khawa. Zedekia sie, “Kiüdi siedzedie pu di; Jihova hakemhie puya; Ae nadi hau pie Babilon kediu dzienu shüwatuo, mu puoe süu lielietuo.

⁴Siro Juda kediue Chaldianmia dzie nunu talie lho, derei puo pie Babilon kediu dzienu shüwatou zotuo, mu puoe mhotsou puo ze kerüchütuo, siro puo mhotsou puo ngutuo;

⁵Siro puo Zedekia ze Babilon nu tsutatuo, sidi a vor puo meho kemochie puoe sünu tuotuo, Jihova sikecü puya; nieko Chaldianmia ze kegei rei nieko kuolie lho, iya ga?” sita.

⁶Jeremia-e sie, Jihova die a ki kevor hamhie:

⁷N nieu Shalum nuou Hanamel n ki vor di sie, “A lie Anathoth nu kebau no khrüliecie, kekreilamonyü noe süu rhakelie n mese zocü la,” sita.

⁸Sitse a nieu nuou Hanamel-e Jihova die tuoi rükhouko kitiezha nu a ki vor di sie, “Benjamin kijü Anathoth nu a lieu khrüliecie, kekreilamonyü kawelie kezhüu mu rhalie kezhüu sü no zo, n thuo n la khrüliecie” silie, Sitse ae hauha Jihova dieu ükecü silie.

⁹Sidi a a nieu nuou Hanamel lie Anathoth nu kebau khrülie, di rakako mejüpie puo tsüwa, rakachü shekel kerethenie,

¹⁰Siro a za thushü, süu zasi vüwa di zhapu lielie, sidi roshükhou nunu raka mejüpie puo tsüwa.

¹¹Süsie ae khrükelie zhapu mhatho-u, thezho-u nu kepfhekhokelie kemhie, tsiu süu leshü Mohor pie vükewa dzeu, siro dze kemo leshü rei pielie.

¹²Sidi khrükelie zhapu mhatho-u pie a nieu nuou Hanamel mhodzü kinu, siro khrükelie zhapu mhatho-u nu zhapu kechüko keba nu, rükhouko bou nu keba Judako pete mhodzünu pie Mahseia nuou Neria nuou Baruk tsüwa.

¹³Ae uko mhodzünu Baruk ki,

¹⁴Krodiko Jihova, Israel Kepenuopfü hai di puya: Zhapu hako, khrülieketa zhapu leshü, mohor vükewau rei, tsiu dze kemo-u rei pieliecie, sidi süko pie rünyo li puo nu shüwalie, sidi süko bu teisozha kekra balie kevi chülie.

¹⁵Kekreilamonyü krodiko Jihova, Israel Kepenuopfü hai di puya; kijü haunu kiülie mu khubelie pie u vie chü lalietuo.

¹⁶Ae khrükelie zhapuu pie Neria nuou Baruk tsükewa sie, ae Jihova ki cha di sie;

¹⁷He-i Niepuu Jihova! Noe n kekuo kezha geinu tsie n bou yhashü di teiko mu kijü chüshüe, siro n la mhapuorei chülie kelho tuo mo;

¹⁸Noe kekhrie ngukemezhie pie themia phou nyienyie pekieshüya, derei mia krünuoko kesuo kechü khepuu pie mia nuonuoko gei shüya; puo zae Kepenuopfü kekuo kezhau, Krodiko Jihova.

¹⁹Puo kepetha zha, mu tsiu puo mhatho rei kuo; N mhi-e themia nuonuo pete meho bayakezhau, themia kehoupuorei puo zho puo rüli kemhie mu puo mhatho kheki sü chüshütuoükecü la.

²⁰Noe Ijipt kijü nu zasi mu ungomhatho chüshü, thie ha rei sükemhieya, Israel nu rei, tsiu themia kekreimia donu rei; sidi n thuo n za chü pezhalie, thie ha kemhie di;

²¹noe Ijipt kijü nunu zasi, mu ungomhatho, mu n dzie kuo, tsiu n bou yhase, tsiu kemerie zo di, n themia Israel ze parshü,

²²Sidi kijü hau pie süko tsü, süusü noe rüse zo di u puonuoko ki pie uko tsütuoüshü, kijü süusü mithunudzü mu mepfhidzü kruzhüya;

²³Sidi sünu lelie, di süu welie. Derei ukoe n die ze mo, morei n zho nu tuolie mo, ukoe no chünukeshü yopuorei chülie mo. Süla noe mhakepeka hako pete pie uko gei vorshü.

²⁴Harie, mia kewhuomia puothou chüpfü nadiu perhie di lielietuoüzhie, mu nadiue zhiecha, pekrie mu thepetheruo ze kesetuo, sidi uko ze keperhiekecü Chaldianmia dzie nu shüwatuo, no n thuo süu ngukeba tuoi

²⁵Sirei no we, he-i Niepuu Kepenuopfü a ki pushüte, “Raka se lieu khrüliecie, sidi zhapu seliecie” si, nadi pie Chaldianmia dzie nu shüwata zoü rei.

²⁶Sitse Jihova die Jeremia ki vor,

²⁷Harie, ae Jihova u chü chükepfü pete Ukepenuopfü; a mhachülie kere huo ba me?

²⁸Süla, Jihova hai di puya: Ae nadi hau pie Chaldianmia dzienu mu Babilon kediu Nebukadnezar dzienu shüwatuo, mu puoe süu lielietuo.

²⁹Siro Chaldianmia nadi hau ze kegeikecüu, vor di mi pie nadi hau thetuo, sidi kiko thewatuo, süko sozhako gei ukoe mhakethengu thepie Baal tsü, tsiu kekrie ruosuo ru pie terhuo kekrei tsü, di a nou chü kemeyie.

³⁰Kekreilamonyü Israel themiako mu Juda themiako mhapuorei chü mo derei u nhicu nunu a mhodzü ki mha kesuou chü tuota zo; Israelmiako mhapuorei chülie mo derei uko dzie mhathoko pie a nou chü kemeyiekecü sie sa mo, Jihova siya.

³¹Süla nadiu hau chükelie nhie nu vor thie ketso a nou chü kemeyie mu chükerüda tuo zo, süla a süu a mhodzünu nu bie kediwa tuoüte.

³²Kekreilamonyü Israel themiako mu Juda themiako kesuo kechü pete la, ukoe süko chü a nou bie kemeyie uko mu uko kediko, tsiu uko kezhako, uko zievoko mu uko siedzekesiko, Juda themiako mu Jerusalem nu kelhouko pete.

³³Ukoe uko chie kerei pie a tsü, sidi uko zie kereishü mo; ae tsiekenuo uko petha vor zo, sirei ukoe rünyü mvü mu pethakemezhükeshüu lielie mo.

³⁴Ukoe kerütsekecüko pie keba kinu shü di süu perhuwa.

³⁵Ukoe Hinnom nuou razhau nu Baal la thechü kerükrie chülie, sidi u nuonuo thenumia mu thepfumia thepie ruosuo chü di Molek tsü, ae uko bu chünushü mo, morei süu a nou rei vor mo zo, uko bu mha kerütse hau chü, sidi Juda chü kephoumawate.

³⁶Süla tsie Jihova, Israel Kepenuopfüe nadi hau dze hai di puya, nieko pukecü, “Zhiecha geinu, mu pekriekecü geinu, tsiu thepetheruo geinu süu pie Babilon kediu dzie nu shüwatuo” iya.

³⁷Harie, ae a noupfhü nu, a nouyie nu tsiu a neimo se di uko whuo pie cüretuoketa kijü pete nu uko pfhükengulietuo, uko ze la thechü hanu vortuo, mu ae uko bu khrukhre di lhou batatuo.

³⁸Ukoe a themia chütuo, mu a uko Kepenuopfü chütuo.

³⁹Ae uko bu nou puochü mu cha puo chülietuo, sidi uko bu puotei pete nu a preilietuo, uko dzevi uko nuonuoko u sie vorkezhüko dzevi la.

⁴⁰Ae uko ze kechachie dietseidiekhotuo, uko gei mha kevichütuoü mu tsiesietalie lho, mu a khrüpreiu pie uko melou nu shüwatuo, sitse uko a kinu tsiesietalie lho.

⁴¹Ae uko gei mha kevi kechüu a neitatuo; sidi a nou pete se tsiu a kerheiro pete se kemiatho nu kijü hau gei uko pelhoushütuo.

⁴²Kekreilamonyü Jihova hai di puya: Ae mha kesuo kemeriekecü se themia hako gei kevor tuoi, ae khashü uko tsütuoü phrakeshü kevi pete uko gei se vorshütuo.

⁴³Kijü hau nu lie khrülietuo niekoe sie süue üse methuote, themia morei khunuo rei jü, süu khapie Chaldianmia tsüwate.

⁴⁴Lieko raka pie khrütuo, mu mhatho-u chülietuo tsiu zasi mu zhapu chülietuo, Benjamin kijü nu, mu Jerusalem khieümhoura, tsiu Juda nadiko pete nu, kijükhru rünako nu, Shefela nu, mu Negeb nu; kekreilamonyü a mia die chü ketuo nunu uko bu la vorlietuo, Jihova sikecü puya.