Read Angami Naga Jeremia 33 Bible Online

Jeremia 33 - Angami Naga bible

Jeremia 33

¹Siro Jihova die va kenieu Jeremia ki vor, puoe rükhouko bounu bakecü ki.

²Jihova kijü chükeshüu hai di puya, Jihova süu chüshütuoü di rhikeshüu, puo zae Jihova zo.

³A kieshücie sitse a n pfhekhoshütuo, sidi no si kemo mha kezha mu mha pekhrepie kebako se n ki pushütuo.

⁴Kekreilamonyü Jihova, Israelko Kepenuopfü nadi hau nu kiko dze mu Juda kediko kiu dze u kewhuomia perhietuoü mu zhiecha mhodzü u yalietuoü di bietshokewau dze hai di puya:

⁵Chaldianmia mia kegeituoü vorzhie mu a noupfhünouyie nunu dukhrikewako kesiamo pie uko tshuwatuoü vorzhie, kekreilamonyü uko rügerüzhü la ae nadi hau nunu a zie kevieliete.

⁶Ae keshürho mu chü kemenekelie se vortuo; ae uko chü keshürhoshütuo mu ae kruokelie ba phikecü mu khrukhrekecü bakecü thashü kietuo.

⁷Ae Juda mu Israel mia die chü voketa ze la vorshütuo sidi uko chüpie therieki tuoishütuo.

⁸Siro ae uko a gei mha kesuo kechü kephouma pete nunu uko chü kemesashütuo, tsiu ae uko a gei mha kesuo kechü kephouma pete vashü tsütuo.

⁹Sidi nadi hau we a la u kenei za puo chülietuo, tsiu kijü nu seyie pete a uko gei mha kevi chükeshü dze silietuo, sitse ukoe a uko gei mha kevi pete mu kruokelie chükeshü pete la michie mu petatuo.

¹⁰Jihova hai di puya; Nie thechü hau pu di, “Hau we themia rei khunuo rei jü di methuotatuo” iya, Juda rünako nu mu Jerusalem chaüko methuo zhüte, themia morei lhoukeba mia tuo mo di, sünu mhapfhe si latuo.

¹¹Keneipfhe mu thenou kemvü pfhe, yasau pfhe mu yasapfü pfhe, tsali kechüko kethezie kha Jihova ki kevor pfhe hamhie di situo: “Kethezie se krodiko Jihova tsüliecie, Jihova vi zocü la, Kekreilamonyü puo kekhrie rüdirüli kemoe kechachie baya!” Kekreilamonyü ae mia die chü ketuo nu ze la vorwatuo, therieki kemhieshütuo, Jihova siya.

¹²Krodiko Jihova hai di puya: Thechü hau themia rei mu khunuo rei jü di ruozhüta, sirei rüna süko pete nu kuopfheko u kuokuo bu zhü di rüleikelie chü chü lalietuo.

¹³Kijü khruko gei rünako Shefela nu mu Negeb nu, Benjamin kijünu, Jerusalem khieümhou thechüko mu Juda rünako nu, tekuokroko phrüyakezhau dzie khro vortuo, Jihova siya.

¹⁴Teisozha vor touzhie, Jihova siya, sükisü ae Israel kinuko mu Juda kinuko gei mha kevi chüshütuoü di phrakeshüu chüshü.

¹⁵Teisozha süko nu mu süteiki ae kemiatho seico-u bu David la lhousiekelie chüshü; mu puoe kijü nu kethoca mu kemezhüu chüshütuo.

¹⁶Süteiki Juda kelalietuo mu Jerusalem khrukhre di lhou batatuo, siro puo üse, “Jihova u la kemiatho-u zo” idi kietuo.

¹⁷Kekreilamonyü Jihova hai di puya: David-e Israel kinuko kediba gei baketuo themia jütalie lho,

¹⁸mu Levimia zievo a mhodzünu kethe ruosuo khashüketuo, tsiu thoulha ruosuo, mu ruosuo chüshü sei balieketuo themia jütalie lho.

¹⁹Jihova die Jeremia ki vor:

²⁰Jihova hai di puya: Mhanuü nieko mia puo a teisozha mu teizeizha ze dietseidiekho pie kezhüu bierhuowa, sidi teisozha mu teizeizhau puo teiki par mota ro;

²¹süzenu ae David a kituou ze dietseidiekhokelieu, puo kediba gei diketuo nuo jütalie lho ükecü tsiu Leviko zievo liethoko ze kepfhekhokelieu bierhuowalie kevi ze.

²²Teigei krodiko phrü hulie kelho kemhie, morei dzükezha nu theshünyo mejü huliekelho kemhie, a a kituou David seyie, tsiu a lietho chüyakezha Levimia chü pekrashütuo.

²³Jihova die Jeremia ki vor di:

²⁴themia hakoe sie, “Jihova kedakelie kikrunie, puoe khawate” isi di pukeba no leshü mo mo ga? Siro uko mhodzü ki a themia le kethachü pie seyie puo kemo mhie zocü leshü mo me?

²⁵Jihova hai di puya: Mhanuü ae teiso mu teizei ze dietseidiekholie mo, morei tei mu kijü zhoko ze kepfhekholie mo üro,

²⁶ae Jakob mu a kituou David seyie meliewatatuo, sidi ae puosepuoyie pie Abraham, Isak mu Jakob seyie mho kekhalie lho. Kekreilamonyü ae puo phou lase sieshütuo, sidi uko ngumezhieshütuo.