Read Angami Naga Jeremia 34 Bible Online

Jeremia 34 - Angami Naga bible

Jeremia 34

¹Jihova kinu die Jeremia ki vor, Babilon kediu Nebukadnezar mu puo chüpahi pete, mu puo rüvie nu kedibako pete, tsiu puo khrokeba themia pete Jerusalem tsiu puo nadiko ze kegeikecü ki pukeshü

²Jihova Israel Kepenuopfü hakemhie puya vo di Juda kediu Zedekia ki pushülie; Jihova hakemhie puya: Ae nadi hau khapie Babilon kediu dzie nu shüwatatuo, mu puoe mi pie süu thewatuo.

³Siro noe puo dzie nunu talie lho, derei n telie petuotuo, sidi pie puo dzie nu shüwatuo; noe n mhi pie Babilon ngutuo, tsiu mhotsou zo di puo ze kerüchütuo; sidi noe Babilon nu tsutatuo.

⁴Sirei Jihova die rünyüliecie he-i Juda kediu Zedekia! Jihova n dze hakemhie puya: N bu zhiecha geinu siatalie lho;

⁵noe tshüimhiei di siatuo. Siro n puonuoko, n mhodzü kelhou kedimiako mhakethengu kethe kemhiei, ukoe n la mhakethengu thetuo; ukoe n krükratuo, sidi sie, “Yha, Niepuu sü!” ituo. Kekreilamonyü ae dieu pushüwate, Jihova sikecü puya.

⁶Sitse Jeremia siedzekesiu die hako pete pie Jerusalem nu kediu Zedekia ki pushü.

⁷Babilon kediu chüpahi-e Jerusalem nu Juda nadi peshakeshüko Lakish mu Azeka ze kegei keba ki, kekreilamonyü Juda nu nadi hako rübei dahou chüpie bakecü la.

⁸Jihova kinu die Jerusalem ki vor, Zedekia kediu Jerusalem nu kebako ze dietseidiekhowa di mia bu uko kekha mo di lhoutatuoü pesikewa sie

⁹Themia kehoupuorei Ibrimia u diemia thepfu rei thenu rei khashüwata morosuo, sidi miapuorei mia puo khapie Juda die chükecü mese mo.

¹⁰Siro kezhako pete mu themia pete dietseidiekhokelie khe kehoupuorei puo diemia thepfu mu thenu rei khashüwalienukecü, kehoupuorei uko ze u die chü sakecü mese mo ükecü silie tse, uko die süu zelie, sidi uko khashüwata.

¹¹Derei süusie ukoe kediemia thenu rei thepfu rei khashüwaketako ze lalieta, sidi uko pie mia khrokeba kediemia chü lata.

¹²Süla Jihova die, Jihova kinu Jeremia ki vor,

¹³Jihova Israel Kepenuopfü hai di puya: A a thuo nie puonuoko Ijipt kijü nunu par, mia die chü ketuo nunu mu uko ze dietseidiekholie di pukeshü,

¹⁴“Teicie thenie tseiketa ki, themia kehoupuorei puo siezedzürie Ibrimia pie u ki ze keshüu bu teicie sorou n die chüwa ro; uko bu nie lie kechü nunu prata morosuo bei zo” ishü. Derei nie puonuokoe a pfhe rünyü mo, morei u nyie kedei rei shü mo.

¹⁵Siro nieko thuo zorei tsie kinu nie nou rüdilie, sidi a mhingu ki kemezhüu chülie mu a za kieyakezha kiu nunu dietseidiekho chülie di huohuo pie u diemia chü mota;

¹⁶derei nie sünu nu rürei lata di a za bie perhuwa, sidi nie mia puopuokecü u kituo thenu rei thepfu rei ze lalie, nie-e u kemengu kemhie khashüwaketako, mu nie-e uko pie nie khro keba kituomia chü latuote.

¹⁷Süla Jihova hakemhie puya: Nieko mia puopuokecü puo zanuomia mu puo khriethomia khashükecü nu a dieze mote. Süla a rei nieko khashüwatuo, Jihova sicü puya, zhiecha, thepetheruo, mu pekrie kecü gei khashüwatuo. Siro kijü rüvie neiüko nie ngu di meriekecü chütuo.

¹⁸Mu a dietseidiekhokelie varhuo di a mhodzünu dietseidiekho-u kemhiei chülie kemomia a süko chüpie mithunuo da kenie chülie di sünie donu:

¹⁹Juda nu kezhako, Jerusalem nu kezhako, dzücümia, zievoko mu themia kehoupuorei mithunuo da kenie chüpie kezhü donu tuo kevomia pete

²⁰khapie ngumvümia dzie nu shüwatuo, uko kerheiro pfhü ketuomia dzie nu shüwatuo. Siro uko kesiamoko pie teigei perako, tsiu kijü gei nhachüko vachütuo.

²¹Siro Juda kediu Zedekia mu puo kezhako, ae pie uko ngumvümia dzie nu shüwatuo, tsiu uko kerheiro pfhü ketuomia dzie nu shüwatuo, siro pie Babilon kediu chüpahimia, nie kinu tuoketako dzie nu shüwatuo.

²²Ae die khashütuo, Jihova siya, sidi uko la nadi hau nu vortuo; tsiu ukoe süu petsoutuo, mu süu lielie di mi pie thewatuo, siro ae Juda rünako chüpie themia puorei bu lhou mota di bie kemethuowatuo.