Read Angami Naga Jeremia 35 Bible Online

Jeremia 35 - Angami Naga bible

Jeremia 35

¹Juda kediu Josia nuou Jehoiakim kedi chükelie cie dia cie, Jihova kinu die Jeremia ki vor;

²Tuo Rekabko kinu vocie di uko ki pushülie, sidi uko ze Jihova kibouko puo nu le, di uko bu zu krie nu khashülie.

³Sitse ae Jeremia nuou Jazania, süu Habazinia nuou mu puo siezedzürieko mu puo nuonuoko pete zelie, siro Rekab kinuko pete salie.

⁴Sidi ae uko ze Jihova kiu nu, Haman nuonuoko Igdalia nuou Kepenuopfü themia puo, puoe kezhako khie ki Maseia, Shalum nuo kikha kepfheu tsü gei keba nu vor.

⁵Süsie ae zu bu li tshupfü keba mu tehieko pie Rekab kinuko mhodzünu shü, sidi a sie uko ki, “Zu huoyo kriecie,” ishü.

⁶Derei uko sie, “Hieko zu krie lho, kekreilamonyü Jonadab, Rekab nuou, hieko pfutsau hie ki diekhakeshü, ‘Nieko zu krie hie, nieko shierei, morei nieko nuonuoko bu rei mhakipuorei zu krie hie;

⁷morei nieko ki rei chü hie, morei tsia pru rei hie, morei khube pelhou rei hie morei puo rei pie ba hie derei nie rhei chie nie pfheki nu lhoutuo; siliero nie bakelie kijü nu teicie kekra lhou balietuo.’

⁸Hiekoe Jonadab, Rekab nuou hie pfutsau hie bu chünukeshü dieze chütuo zo, sidi hie rhei chie rei, hie nuonuo thenu rei thepfu rei,

⁹mu lhou baketuo hie la ki chü mo. Hiekoe khubelie rei jü, morei lie, morei gatsia rei jü

¹⁰derei hie pfhekiko nu lhou, mu dieze chü di hieko puo Jonadab-e hie bu chünukeshü pete chü zo.

¹¹Derei Babilon kediu Nebukadnezar kijüu petsou sier tse, hie sie, ‘Vorlie di Chaldianmia chüpahi keprei la tsiu Siriamia chüpahi keprei la, úko Jerusalem nu vota khe’ sishü. Sidi hiekoe Jerusalem nu lhouta.”

¹²Süsie Jihova die Jeremia ki vor:

¹³Jihova Israel Kepenuopfü hakemhie puya: Vo di Juda themiako mu Jerusalem nu kelhouko ki pushülie, nieko pethakeshüu silie di a dieko zelie lhoü me? Jihova siya.

¹⁴Rekab nuou Jonadab-e zu krie hienu di diekhakeshüu keyiepie puonuosenuoyieko tsüshülie, mu ukoe thie ha ketso rei zu krie molie, kekreilamonyü ukoe u pfutsanuoko diekhakeshüu zekelie la. Derei a thuo tsiemelie nieko ki pukeshüko niekoe a die zelie mo.

¹⁵Ae a kituo siedzekesiko ketseshü, tsiemelie uko ketseshü di sie, “Themia kehoupuorei puo kesuo chau nunu rüreilie, nieko mhathoko chü kemezhülie, sidi terhuo kekrei lie chütuoü süko medzita hie, sitse niekoe a kijü pie nieko mu nie puonuoko ketsü nu lhoulietuo” sishü. Derei nieko nie nyie kedishü mo sidi a die zelie mo.

¹⁶Rekab nuou Jonadab uko bu chünukeshü chülie, derei themia hako a die zelie mo.

¹⁷Süla Jihova krodiko Kepenuopfü, Israel Kepenuopfü hakemhie puya. Ae Juda mu Jerusalem nu lhoukebako pete petsou di kepeka pukeshü pete se uko gei vortuoüzhie, kekreilamonyü a uko ki pu zo sirei uko zelie mote, ae uko kie zo sirei uko a pfhekho mo.

¹⁸Derei Rekabko kinuko la we Jeremia pukecü: Jihova, Israel Kepenuopfü hakemhie puya; kekreilamonyü niekoe nie pfutsau Jonadab pukeshü pete zelie, mu puo zhoko se balie, tsiu puoe nieko ki diekhakeshü pete chülie.

¹⁹Süla Krodiko Jihova, Israel Kepenuopfü hakemhie puya; Rekab nuou Jonadab-e kechachie a mhodzü thaketuo puo yiemia jütalie lho.