Read Angami Naga Jeremia 36 Bible Online

Jeremia 36 - Angami Naga bible

Jeremia 36

¹Juda kediu Josia nuou Jehoiakim kedi chükelie cie dia cie, Jihova kinu die Jeremia ki vor:

²No leshü tshü puo chülie, sidi sünu ae Israel mu Juda mu seyie pete kepetsou dieko pete thushülie, a n ki kepu teisozha nhie nu, Josia tei ki nunu vor thie ketso.

³Juda kinuko a uko gei kepeka khashütuoü rünyülie; sidi uko pete rei u zho kesuo nunu rüdilie, sidi a bu uko kesuo mu uko kephouma vashüketuo chülie rei silie lho mu.

⁴Sitse Jeremia-e Neria nuou Baruk kielie, sidi Baruk-e Jeremia tie nunu Jihova die puoe puo ki pukeshü pete thu pie leshü tshü puo nu shülie.

⁵Sitse Jeremia sie Baruk ki, “A bu Jihova kinu volie lhoü di a khaliete;

⁶no n thuo voliecie, sidi no kemevo zha nhie a tie nunu silie di thukelie leshü tshüu nunu Jihova kinu dieko phrüpie themiako nyie nu shücie. Siro no süko phrüpie Juda pete uko rünako nunu kepar kheko ki shücie.

⁷Ukoe Jihova mhodzü uko mezhiemelo rei silie lho mu, sidi themia pete rei puo zho kesuo nunu rüreilie rei silie lho mu; kekreilamonyü Jihova noupfhüu themia hako gei shütuoükeshüu re seta zo” sishü.

⁸Süla Jeremia siedzekesiu puo bu chünukeshü pete Neria nuou Baruk chülie, sidi Jihova kiu nu Jihova dieko leshü tshüu nunu phrüshü.

⁹Siro Juda kediu Josia nuou Jehoiakim kedi chükelie cie pengouketa ki thekhrü thepfüu nu ukoe Jerusalemmia pete mu Juda rünako nunu vor Jerusalem nu baketako pete bu Jihova mhodzünu mevolienu di pushü.

¹⁰Süki Baruk-e Jihova ki nu, Shafan nuou Gemaria kibou nu, kibou pesotsa nu, Jihova kinu kele Kharu Kesau nu, themia peteko kesi kinu Jeremia leshü tshüu phrüshü.

¹¹Mikaia, Gemaria nuou, Shafan nuou leshüdau nunu Jihova dieko pete silie tse,

¹²puoe kediu kinu leshükethuu kibou nu tsu, mu kezhako pete sünu ba; Elishama leshükethuu, Shemaia nuou Delaia, Akbor nuou, Elnathan, Shafan Gemaria nuou mu Hanania nuou Zedekia, mu kezhako pete.

¹³Sitse Mikaia-e uko ki puoe sikelie die pete pushü, mu Baruk-e leshütshüu phrü pie themiako kieshü.

¹⁴Sitse kezhako pete-e Jehudi, Nethania nuou Shelemia nuou Kushi nuou ketsepie Baruk ki pu di, “No phrüpie themiako pekiekeshü leshü tshüu selie di vorlie” sita. Süla Neria nuou Baruk-e leshü tshüu puo dzie nunu selie di uko ki vor.

¹⁵Sitse ukoe sie puo ki, “Balie di süu phrüpie hie kieshücie” sita, süla süu phrüpie uko kieshü.

¹⁶Ukoe dieko pete silie tse uko pete rei michie di reipra huoniehuo meho, sidi sie Baruk ki, “Hie die hako kediu ki pu beishü morosuo” sita.

¹⁷Süsie ukoe Baruk ketso di sie, “Tsie hieko ki pushücie, no kimhie di die hako pete thulie ga? Hau puoe pu di thu zo me?” sita.

¹⁸Sitse Baruk uko die kela di sie, “Puoe puo tie nunu die hako pete a ki pu zo, mu a leshüdzü pie leshüda nu thushüliewe” sita.

¹⁹Sitse kezhakoe sie Baruk ki, “Vo di rüshütalie, no mu Jeremia sidi miapuorei bu nnie kebachü si hie” sita.

²⁰Ukoe leshü tshüu pie leshü kethuu Elishama kibou nu khapie zhüwa, sidi ukoe dienyakiu nu kediu ki le, mu ukoe dieko pete pie kediu ki pushü.

²¹Sitse kediue leshü tshüu se vorlienu di Jehudi ketseshü, siru puoe leshükethuu Elishama kibouu nunu süu chülie; sidi Jehudi-e süu phrü pie kediu nyie nu, siro kediu mhodzü ketha kezhako pete nyie nu shü.

²²Süki kediue teisei kiu nu ba (süu khrü thepfü mese ki) mu puo mhodzünu miphu nu mi tuzhü.

²³Siro Jehudi-e nethe se dia phrüshü tse, kediue kotari pie süko rewa sidi kelhoupie miphu nu shüwa, sidi mi bu leshü tshüu the pejüwa kemochie si zhüta.

²⁴Sirei kediu morei puo kituokoe die süko kesi miapuorei michielie mo zo morei u pfhe u nei rei cierha mo zo.

²⁵Siro Elnathan mu Delaia mu Gemaria zowe kediu bu leshü tshüu thewa hienu di puo ki pu zo, sirei puoe uko die rünyü mvüta.

²⁶Süsie kediue Jerahmil, kediu nuou mu Azriel nuou Seraia tsiu Abdil nuou Shelemia bu Baruk leshükethuu mu Jeremia siedzekesiu telienu di diekhashü, derei Jihovae unie keviewa.

²⁷Süsie kediue leshüu, Baruk-e Jeremia tie nunu thukelie dieko thewaketa sie, Jihova die Jeremia ki vor di:

²⁸No Leshü tshü kekrei puo chü lalie, sidi Juda kediu Jehoiakim thewaketa leshü tshü kerieu nu keba dieko pete thu lapie sünu shüliecie.

²⁹Siro Juda kediu Jehoiakim la noe pushülie: Jihova hakemhie puya, Noe haikecü pu di leshü tshüu the n kerei mote, kiüdi sünu Babilon kediue vor tou zotuo sidi kijü hau pekawatuo, sidi sünu themia rei khunuo rei tuo motatuo ücü puya ga?

³⁰Süla Jihova Juda kediu Jehoiakim dze hamhiekecü puya: Puoe miapuorei bu David kedibau gei ba motatuo, tsiu puo kesiamo kelhou pie khinhie teikele nu mu theva gei thezei gei shüwatuo.

³¹Siro a puo mu seyie tsiu puo kituo kephouma la a siazha pie uko tsütuo, sidi ae mha kesuo uko ki pukeshü pete se vor uko gei, mu Jerusalem nu kelhouko gei, siro Juda themiako gei shütuo; sirei ukoe rünyülie lho.

³²Sidi Jeremia-e leshü tshü kekrei puo chü lalie, di pie leshükethuu Baruk Neria nuou tsüshü, puoe Jeremia tie nunu thukelie leshü tshüu Juda kediu Jehioakim-e mi nunu thekewako pete sünu thushülie, mu süsie rei sükemhiekecü kekrapie süko salie.