Read Angami Naga Jeremia 37 Bible Online

Jeremia 37 - Angami Naga bible

Jeremia 37

¹Josia nuou Zedekia-e Jehoiakim nuo Konia sounu kedi chülie, Babilon kediu Nebukadnezar-e puo pie Juda kijü nu kedi chüshü.

²Derei puo rei, morei kituoko rei, morei kijüu nu themiako rei Jihova die siedzekesiu Jeremia geinu pukeshü rünyülie mo.

³Siro kediu Zedekia-e Shelemia nuou Jehukal mu Maseia zievo nuou Zefania zievo-u ketsepie siedzekesiu Jeremia ki shü di sie, “Hieko la Ukepenuopfü Jihova ki chashücie” sita.

⁴Haki zorei Jeremia themiako donu pra mu le baya, ukoe puo tepie kedieki nu shüwa moluocü la.

⁵Süki Faro chüpahi-e Ijipt nunu parta, sidi Chaldianmia Jerusalem re kebakoe süko dze dielie silie tse, ukoe Jerusalem nunu lata.

⁶Süsie Jihova die siedzekesiu Jeremia ki vorkecü hamhie:

⁷Jihova Israel Kepenuopfü hakemhie puya: N nie hamhiekecü pie Juda kediu, nie ketsepie a ki shü di ketsokecüu ki pushücie, Faro chüpahi nieko khruohituoü kevorkoe la u thuo u kijü Ijipt nu votatuo.

⁸Siro Chaldianmia la vortuo, sidi nadi hau perhietuo; sidi ukoe süu lielietuo mu mi pie thewatuo.

⁹Jihova hakemhie puya: “Chaldianmia uko kinu lata mecie zo” ikecü pu di nie thuo nie sewa hie; kekreilamonyü ukoe latalie lho zo.

¹⁰Mhanuü nie-e nie perhieketha Chaldianmia chüpahi pete penyüwa, sidi uko donu rüzakelieko rübei thuo u pfhekinu ba zo rei, ukoe sielie di mi pie nadi hau thewatuo.

¹¹Siro Chaldian chüpahikoe Faro chüpahiko vorkezhü silie di lata tse,

¹²Jeremia-e Jerusalem nunu tuo Benjamin kijü nu votuoü sie, süko donunu puo ya kiülie lielietuoü di.

¹³Sidi puoe tuo Benjamin kharuu tsolie tse, rükhou kepfhemia puo puo za Irija, Shelemia nuou, Hanania nuou ba mu puoe Jeremia siedzekesiu telie di sie, “Noe Chaldianmia ki votatuoüzhie ha” sita.

¹⁴Sitse Jeremia sie, “Süu kemeda zo, a ta Chaldianmia ki votieya mo zo” sita. Derei Irija puo die rünyü mvüta, sidi Jeremia telie di puo ze kezhako ki vor.

¹⁵Süki kezhakoe Jeremia gei u nei mota, di puo vü, siro puo pie Jonathan leshükethuu kinu kedieki nu shüwa, kekreilamonyü puoe süu pie kedie chükewa la.

¹⁶Hamhie di Jeremia kedieki kesou nu mu kibou nu leta, sidi sünu teisozha kekra bata.

¹⁷Sitse kediu Zedekia puo la mia ketseshü di puo ze vorlie sidi kediu puo kinunu pekhre puo ketso, di sie, “Jihova kinu die huo ba me?” sita. Sitse Jeremia sie, “Bawe!” sishü. Sitse puo sie, “N tepie Babilon kediu dzienu shüwatuo” sishü.

¹⁸Jeremia-e kediu Zedekia ki pu sa di sie, “No a tepie kedieki nu shüketa, a n gei morei n kituoko gei morei n themiako gei kedipuo chü kekrüwaketa la ga?

¹⁹N siedzekesiko n ki siedzedie pu di, ‘Babilon kediu vor no mu n kijüu perhielie lho’ isi ketuoko kirapuo tuota ga?

²⁰Tsie n pezie rei a pfhe rünyüshücie, a niepu, kediu; sidi a mezhiemelokecü rünyüshücie, sidi a ketsepie leshükethuu Jonathan kinu vo di sünu nu a bu siata hieyi” sishü.

²¹Sitse Zedekia kediue uko bu Jeremia pie rükhoumia bou nu shüwa; mu teisonhie niekhrüda zeyakezhamia cha nunu niekhrüda puo pie puo tsü, nadiu nu niekhrüda jüta kemochie si balienu die khashüwa. Süla Jeremia-e rükhoumia bou nu bata.