Read Angami Naga Jeremia 38 Bible Online

Jeremia 38 - Angami Naga bible

Jeremia 38

¹Sitse Matan nuou Shefatia, mu Pashur nuou Gedalia mu Shelemia nuou Jukal, mu Malkia nuou Pashur, Jeremia-e themia pete ki pukeshü dieko silie,

²Jihova hai di puya, Nadi hau nu kebamia zhiecha, pekriekecü, mu thepetheruo geinu siatatuo, derei Chaldianmia ki vokeliemia rheilietuo, ukoe themiako pie terhü nu krakelie zhakhra puo mhietuo, sidi rheilietuo.

³Jihova hai di puya, Nadi hau khapie Babilon kediu chüpahiko tsü touwa zotuo, sidi lielietatuo.

⁴Süsie kezhakoe sie kediu ki, “Themia hau sia zhü tou zo, kekreilamonyü puoe die sikecü pu di nadiu nu themia lhiepiekebako, tsiu themia peteko chü kethachüwate. Kekreilamonyü themia hau hako dzevi pfhüya mo, derei uko bie pesuowaketuo pfhüya” sita.

⁵Sitse Zedekia kediue sie, “Harie puo haki ba, puoe nie dzie nu bate; kekreilamonyü kediue nieko petsoukecü chülie kenjü” sita.

⁶Süki uko Jeremia telie di puo kelhou pie Hamelek nuou Malkia kitiezha rükhoumia keba ki dzükhou nu shüwa, ukoe kero geinu Jeremia peteshü. Sirei dzükhou nu dzü ba mo, nyoba rübei, süla Jeremia nyoba nu rüle leta.

⁷Süki Ebed-Melek Ethiopiamia[53] kediu kinu iunok-ue uko Jeremia pie dzübou kesou nu shüwaketa silie. Siro kediue Benjamin kharuu ki ba.

⁸Süla Ebed-Melek-e kediu ki nunu pra di kediu ki,

⁹“A niepuu kediu, themia hako Jeremia siedzekesiu kelhoupie dzükhou kesou nu shükewa ha mha kesuo chüwate mu puo sünu khe siatatie, kekreilamonyü nadi hau nu niekhrüda ba sa mote,” sita.

¹⁰Sitse kediue sie Ebed-Melek Ethiopiau[54] ki, “Mia se sa zelie di vo Jeremia siata kemo nu dzükhou kesou nunu puo teshü se parwaliecie,” sishü.

¹¹Süla Ebed-Melek-e themiako zelie, sidi kedikiu nu mhanya khapie keba bouu nu vo di sünu pfhenyhiepfhekra siro pfhemenei sekhreko kero geinu petepie dzükhou kesou nu Jeremia ki shü.

¹²Sidi Ebed-Melek Ethiopiau[55] sie Jeremia ki, “Tsie pfhenyhiepfhekra siro pfhemenei sekhre hako pie kero khro n socü nu shüliecie” sishü. Sitse Jeremia sükemhie chülie.

¹³Sitse ukoe kero pie Jeremia teshülie di dzükhou kesou nunu puo ze parlie. Sidi Jeremia rükhoumia kibou nu bata.

¹⁴Siro Zedekia kediu mia ketseshü, sidi Jeremia siedzekesiu ze Jihova kiu nu kele seu nu vor. Sitse kediu sie Jeremia ki, “A n ki mhapuo ketsotuo; a ki mhapuorei kevie hie,” sita.

¹⁵Jeremia sie Zedekia ki, “Mhanuü a pie n ki pushü ro, no a bu siata mecie zo die mu? Siro mhanuü n tarhoshü rei no a pfhe rünyü lho mecie zo” sita.

¹⁶Süla kediu Zedekia-e pekhre rüse pie Jeremia tsü di sie, “U kerheiro kha u ketsüu Jihova rhei ketuo mhiei, n kerheiro pfhü ketuo hako dzienu shüwalie lho zo” sita.

¹⁷Sitse Jeremia sie Zedekia ki, “Jihova, krodiko Kepenuopfü, Israel Kepenuopfü hakemhie puya, mhanuü noe Babilon kezhako dzie nu vota liro, no rheilietuo, mu nadi hau mi bu thewalie lho, sidi no mu n kinuko rheilietuo.

¹⁸Derei mhanuü no n khapie Babilon kezhako dzie nu shülie mota ro, nadi hau pie Chaldianmia dzie nu shüwatuo, mu ukoe mi pie thewatuo, sidi noe uko dzie nunu tapralie lho,” sita.

¹⁹Sitse kediu Zedekia Jeremia ki, “A Judamia Chaldianmia dzienu taketako preilie, uko bu a pie süko dzie nu shü di uko a pie kethesewa rei silie lho mu,” sita.

²⁰Derei Jeremia sie, “Sikecü chülie lho. A n ki pukeshü Jihova die zeu zeliecie, sitse no vilietuo, sidi no rheilietuo.

²¹Derei mhanuü noe mia khro le mvüta ro, Jihova hakemhie di pie a pekieshü ho,

²²Juda kediu kinu khapie bakewa thenupfümia pete ze Babilon nu kezhako ki votuo sidi sie, ‘Nie peleyakezha nie zemia thuo nie ketsiwa, sidi nie penyülie: Tsie nyoba nu n phi malie tse uko n khawate’ situo.

²³Nie kimianuoko mu nie nuonuo pete ze vo Chaldianmia kishüwatuo, mu no uko dzienu talie lho, derei Babilon kediu dzienu teletuo, sidi nadi hau mi bu thewatuo” sita.

²⁴Sitse Zedekia sie Jeremia ki, “Miapuorei bu kerüchükecü hako si hiecie, moro no siatuo.

²⁵Mhanuü kezhakoe a n rüchükecü si liro, ukoe vor di sie n ki, ‘No kedipuo pie kediu ki pu shiü pie hie pesishücie; hie ki süu keviewa hiecie, morei hie n bu siatatuo. Kediu kedipuo se n ki pushü ga?’ isituo.

²⁶Sitse noe uko ki, ‘A kediu ki a bu Jonathan kinu vo di siata hienu di a mezhiemelolie’ sishüliecie” sita.

²⁷Sitse kezhako pete vor di Jeremia ketso; sitse puo kediu puo ki pukeshü kemhie dieyo se uko die kelashü. Süla ukoe puo ketso sa mota, kekreilamonyü uko kerüchükecüu silie moketa la.

²⁸Sidi Jeremia-e rükhou kibouu nu Jerusalem lielie kemochie ba.