Read Angami Naga Jeremia 39 Bible Online

Jeremia 39 - Angami Naga bible

Jeremia 39

¹Juda kediu kedichükelie cie thepfü cie, khrü ker-u nu, Babilon kediu mu puo chüpahi pete vor Jerusalem reta, sidi süu penyülieta.

²Siro Zedekia cie kerepuo cie, khrü diau nu zha thepfü nhie nadiu bie phalieta.

³Siro Jerusalem liekelie ki,[56] Babilon kezhakoe vor di kharu metsuo nu balie: Nergal-sharezer, Shamgar-nebo, Rabsari-u Sarsekim, Rabmag-u Nergal-sharezer, Babilon kedi nu kezhako pete ze balie.

⁴Siro Juda kediu Zedekia mu chüpahi pete uko ngu tse, ukoe tata, theva ze kediu tezie chau ze dahou kenie donu kharuu ze nadiu tse prata, tsiu ukoe Arba kevatsa vota.

⁵Derei Chaldianmia chüpahi-e uko whuo vo di Jeriko razhau nu Zedekia tsolie, sidi uko puo telie tse, ukoe puo ze Hamath kijü nu Ribla nu Babilon kediu Nebukadnezar ki vor, sünu puoe puo dienya kecü.

⁶Siro Babilon kediue Ribla nunu puo mhodzü kinu puo nuonuoko dukhriwa, süsie rei Babilon kediu Juda kezhako pete dukhriwa.

⁷Siro puoe Zedekia mhi nie kerülawa, mu puo ze Babilon nu votaketuo la thegiro kedukecü pie puo phalie.

⁸Siro Chaldianmia kediu ki, mu themiako ki mi pie thewa, tsiu Jerusalem dahou biemewa.

⁹Süsie kezhau kepfheu Nebuzaradan-e nadi nu themia peshakeshüko teze Babilon nu vota, siro themia peshakebako, takelieko puo ki vorta.

¹⁰Mu kezhau kepfheu Nebuzaradan-e Juda nu mhakejümiako, mhapuorei ba mokecüko, khubelie mu lie pie uko tsü.

¹¹Süki Babilon kediu Nebukadnezar-e Jeremia dze kezha kepfheu Nebuzaradan ki diekhashü di pucü,

¹²“Puo zelie, sidi puo meho menuoliecie, tsiu puo gei mha kesuo puorei chü hie, derei puo nieko ki kedipuo putie shiü süu chüpie puo gei shülie” siwa.

¹³Süla kezhau kepfheu Nebuzaradan mia ketseshü, sitse Rabsari-u Nebushazban, Rabmag-u Nergal-sharezer, mu Babilon kediu kezhako pete,

¹⁴sidi vo rükhoumia kibouu nunu Jeremia zelie di puo khapie Gedalia, Ahikam nuou, Shafan tsuu bu puo ze kinu votanu shüwa. Sidi puoe puo thuo puo themia ze bata.

¹⁵Siro Jeremia-e rükhoumia kibouu nu keba ki Jihova die puo ki vor:

¹⁶Vo di Ebed-melek Ethiopia[57] ki pucie, krodiko Jihova Israel Kepenuopfü hai di puya: Ae nadi hau gei mha kesuou chüketuo a dieu chüshütatuo mu mha keviu lalie lho, siro sünhie n mhodzü kinu süko chü tseishütuo.

¹⁷Derei teisozha sünhie a n kelashütuo, Jihova sikecü puya, sidi n khapie no preiyakezha themiako dzie nu shüwalie lho.

¹⁸Kekreilamonyü a n kelashü bei zotuo, mu no zhiecha geinu tetsutalie lho, derei n kerheiro pie terhü nu krakelie zhakhra puo mhiewatuo, kekreilamonyü noe a pele bacü la, Jihova siya.