Read Angami Naga Jeremia 4 Bible Online

Jeremia 4 - Angami Naga bible

Jeremia 4

¹Mhanuü no rürei la vorlie ro, he-i Israel, Jihova puya, mhanuü no rürei a ki vorlie ro, mhanuü a kengu ki nu kerütsekecüko khawalie liro, sidi rüdi mo thalie ro,

²tsiu mhanuü noe, “Jihova rheiketuo tuoi!” ketho nu, kethoca mu kemezhü nunu rüselie liro, puoe japie seyieko tsütuo,[6] tsiu ukoe puo geinu u mhokuo chütuo.

³Kekreilamonyü Jihovae Juda mu Jerusalem nu themiako ki hamhiekecü puya: Lie pekropie kezhüko cieliecie, tsiu tsia pru pie zohu donu shüwa hie.

⁴Nie zhükere bu Jihova kitsalie, nie melou kezeu zhü chüwalie, nie Juda themiako mu Jerusalem nu kelhouko, moliro a nouyie mi kemhie tu par thekecü ki miapuorei süu tshülie lhotatuo, nie mhatho kesuoko la.

⁵Juda nu pesishülie, tsiu Jerusalem nu pu keyieshüliecie: Kijü nu ketsü khoushülie; shieshülie[7] di sie; “Vo kengulie, úko dahou houpie keba nadiko nu vo khe,” sishülie.

⁶Pfhelha puo lhapie Ziontsa vashülie, nie kelalieketuo la talie, bata hie, ae pesotsa nu mha kesuo se vorzhie, mu mhapeka sewaketuo puo.

⁷Losha puo rüshübou nunu parte ho, seyieko kepekau parte; puoe n kijü bie kemethuowatuoü di puo tha nunu tuo parte; n nadiko themia puorei ba mota di ruotatuo.

⁸Kekreilamonyü hau lanu gakhropfhe dzieliecie, kralie tsiu mepfükeruolie: “Jihova noupfhü kemeriekecüu uko kinu lalie mote ru”

⁹Jihova puya, teisozha sünhie kediu mu kezhako u kethepfu jütatuo; siro zievoko u ngotatuo, tsiu siedzekesiko u ziejütatuo.

¹⁰Sitse ae sie, “He-i Niepuu, Ukepenuopfü, noe ‘Mha kesuo nie gei vor lho’ ikecü pu di themia hako mu Jerusalem kedowate, zhiechau u vo gei toupfü ba zorei” sishütuo.

¹¹Süki themia hako mu Jerusalem ki haikecü putuo: kijükesia nu thechü kerükrie[8] nunu teikhrie kele puo a themia kejüko kitsa vorzhie, süu hetuoü morei chü kemesawatuoükecü la mo.

¹²Süko gei teikhrie re. Tsie a uko petsou di theca pushüya.

¹³Mehoshücie! Puoe kimhou mhie vorzhie, puo guragari khriewhi mhie; puo gurako tsüüra ki rei ta vikuo, úko we ce chülietie, úko sü ruote!

¹⁴He-i Jerusalem, n melou nunu mha kesuo khrü kemesawalie, sitse n kelalietuo. Mha kesuo dorhüko kedithechiepuo n nou batieya ga?

¹⁵Kekreilamonyü Dan nunu mhapfhe puo vor, mu Efraim kijüthou gei nu kepeka shieshüte.

¹⁶Seyieko ki pushülie, “Harie uko sü!” Jerusalem petsoukecü pushülie, “Kijü kepetsera nu mia kepepriemia vorzhie, ukoe Juda nadiko petsou di shiezhie.

¹⁷Lie kepfhemia tuoi ukoe houpfülie, kekreilamonyü süpfüe a petsoute, Jihova sidi puya.

¹⁸N zho n rüli mu n mhathoko thuo mha hakoha se n gei vor. Hauha n siazhau; kidepuorei pfhü shi! Süu ke n melou tsote” sishü.

¹⁹A nou kemezhiete, a nou kemezhiete! A kechü la rüperülete! He-i, a melou kezeu! A melou metouthorte; a kemekrie balie kenjüte; kekreilamonyü ae[9] ketsükekhou pfhe, terhü vorzhü üdi pesikeshü pfhe si bate.

²⁰Kepeka sie kepeka, kijü pete chü kemethuowate. Vapuo nu a pfhekiko pekawate, tsiu hiepuo nu a kikha pfheko pekawate.

²¹A bu kedithechie puo zasiu ngu, tsiu ketsü kekhou pfhe si batie shi?

²²“Kekreilamonyü a themiako nyate, ukoe a si mo; ukoe kenya nuonuo, ukoe mhacamhala silieya mo. Ukoe kesuokechütsa we chü si, derei mha kevikechü do we si mo.”

²³A kijü meho ru, harie, süu methuo mu puorhi tuo mo; tsiu teiko mehoshü, mu ukoe u kezie jü.

²⁴A kijüthouko mehoshü ru, harie, sükoe mele bata, tsiu kijükhruko pete rei mele phi mu phi bata

²⁵A meho sie ru, harie, themia puorei tuo mo, tsiu teikhrie nu perako pete pruota.

²⁶A meho sie ru, harie, mhakelhou kijüko kijükesia chüzhüta, Jihova mhodzünu tsiu puo nouyie nunu nadi peteko me tsu zhüta.

²⁷Jihova hakemhie pucü la: Kijü pete rei methuotatuo; sirei a süu bu puo thela chüwalie lho.

²⁸Hauha la kijüu kratuo, tsiu pesogei teiko teimekietatuo; kekreilamonyü ae pushüte, a süu rhüshüte; tsiu a nou rüdi lalie lho, morei sünunu tsiesietalie lho.

²⁹Gura themiako siro theükeseko themiako pfhe lanu rüna pete tatatuo; ukoe ketsa kesou nu votatuo, ukoe tsiekrieko melituo; rüna pete khawatuo, mu miapuorei sünu lhou motatuo.

³⁰Siro no, he-i pekakewau, no pfhe meriemegekecü pie n whe se tuo zorei, no suna pienyie pie kerütso tuo zorei, no mhakenhekecüpie n mhi kenhelie rei, no sicü kedipuo üta? N chü keziviketuou kemethuo zo. N kekhriemiako n mecütuo, ukoe n kerheiro pfhütatuo.

³¹Kekreilamonyü ae mhapfhe puo tuoikecü, nuorieu penuoshütuoü di kemezhiekecü, Zion nuopfü pfhe hatoutoui di puo dzie yhapie lutsahatsashü di sie, “A we chülietie! A we kedukhrimia mhodzünu phisiazhüte!” isikecü si ho.