Read Angami Naga Jeremia 40 Bible Online

Jeremia 40 - Angami Naga bible

Jeremia 40

¹Jihova kinu die Jeremia ki vor, kezhau kepfheu Nebuzaradan puo bu Rama nunu tuota, puoe Jerusalem mu Juda nu thegiro pie puo khelie di te ze Babilon nu kevo ki.

²Kezhau kepfheu Jeremia zelie di puo ki, “N Kepenuopfü Jihova mha kesuo hau pie thechü hau kedeshü;

³mu tsie Jihovae süu chüshüte, tsiu puo kepu tuoi chüshüte, kekreilamonyü niekoe Jihova gei phoumawate, tsiu puo pfhe rünyülie mo. Süla mha hau nieko gei vorketa zo.

⁴Tsie meholie, thie a thegiro n dzie gei keba phreishüwazhie. Mhanuü no a ze Babilon nu vor nyü ro vorlie, sitse a n meho menuolietuo; derei mhanuü a ze Babilon nu vo nyü moro, no vor morei vi. Harie, kijüu pete n mhodzü ki zhü zo; kirapuo n mhodzü ki vi mu rüütie shi, süra votalie.

⁵No hanu ba nyü moro, la se Gedalia Ahikam nuou Shafan tsuu, Babilon kediu puo chüpie puo bu Juda rünako kekhakeshüu ki votalie, sidi puo ze themia donu lhou batacie; morei n mhodzü ki kirapuo vo ro vitie shiü süra voliecie,” sita. Sidi kezhau kepfheu kecükekrie khashü tsiu mha methuo khapie puo tsüshü di puo bu tuota.

⁶Süsie Jeremia-e Mizpa nu Ahikam nuou Gedalia ki vota; di puo ze kijüu nu themia kebako donu lhou bata.

⁷Siro rüna nu ketuo krütako mu uko chüpahikoe Babilon kediue Ahikam nuou Gedalia bu kijüu nu kezhau chüketa, mu thenumia mu thepfumia tsiu nhicunuomia, mu kijüu nu mhakejümiako, mia die chü Babilon nu vota kemoko pie puo dzienu shüwatakecü silie tse,

⁸ukoe Mizpa nu Gedalia ki vor, sükoe Nethania nuou Ishmael mu Karia nuo Johanan, mu Tanhumeth nuou Seraia mu Efai Netofat nuonie mu Makath nuou Jezania, tsiu uko chüpahiko sa.

⁹Siro Gedalia Ahikam nuou Shafan tsuue uko mu uko chüpahiko rüseshü di sie, “Chaldianmia lie chü michie hie. Kijüu nu lhou di Babilon kediu lie chü balie, silie ro süu nie la vituo.

¹⁰A la we Chaldianmia u ki kevorko la nie sou Mizpa nu batatuo; derei nie we khubedzü, teile ki nhasiko mu tier pfhü kenguliecie, sidi süko khapie nieko viebou nu shülie, di nieko liekelie rünako nu lhou batacie” sishü.

¹¹Sükemhie Judamia Moab nu, mu Ammonmia donu, mu Edom nu, mu kijü kekreira ketuoko Babilon kediu Juda nu themia huomia khapie bawaketa, siro puoe Ahikam nuou Gedalia bu uko mho zhaketa silie tse,

¹²Judamia whuopie cüretuoketa thechü pete nunu vorta, sidi Juda kijü nu Mizpa nu Gedalia ki vor, sidi khubedzü tsiu teile ki nhasiko kekra pfhü kengulie.

¹³Siro Karia nuou Johanan tsiu rüna nu ketuo chüpahi mho kezhako pete, Mizpa nu Gedalia ki vor,

¹⁴sidi puo ki, “Ammonmia kediu Balis-e n dukhriwatuoü di Nethania nuou Ishmael ketseshütacü no si tou bate nhie?” sita. Derei Gedalia Ahikam nuou uko die pele mota.

¹⁵Sitse Karia nuou Johanan-e Mizpa nu pekhre Gedalia rüchü di sie, “N pezie rei a bu vo di Nethania nuo Ishmael dukhriwacie, miapuorei süu silie lho, kiüdi puo bu n kerheiro liewa, sidi Judamia n ki vor kengukebako bu cüre tuotata, sidi Juda peshakelieko bu kaüjütatie mu?” si.

¹⁶Derei Gedalia Ahikam nuou sie Karia nuou Johanan ki, “No mha hau chü suo, kekreilamonyü no Ishmael dze pu kekrü bate” sita.