Read Angami Naga Jeremia 41 Bible Online

Jeremia 41 - Angami Naga bible

Jeremia 41

¹Si tuo di khrü thenieu nu, Ishmael, Nethania nuou Elishama nuou, kedi seyieu, siro kediu nuou mia ker ze puo salie, di Mizpa nu Ahikam nuou Gedalia ki vor. Sidi uko Mizpa nu keze niakhrüda cü ba tse,

²Nethania nuou Ishmael-e sielie, tsiu mia ker puo ze ketuoko salie di Gedalia Ahikam nuou, Shafan tsuu, Babilon kediue puo pie puo bu kijüu nu kezhakechüu zhiecha pie puo du di dukhriwa.

³Siro Ishmael-e puo ze keba Judamia pete, Mizpa nu Gedalia ze keba pete, tsiu Chaldianmia chüpahi sünu ba di ngukelieko dukhri phrewa.

⁴Siro Gedalia dukhrikewa sienhie, miapuorei süu si kemo nu,

⁵Shekem nunu, Shilo nunu, mu Samaria nunu, mia hiethetha vor, ukoe uko tiemie thiewa, tsiu u pfhe cierhawa, siro u thuo u gei phaphawa, u dzie nu ruosuo mu mhakethengu se, Jihova kinu süko se votuoü tuo.

⁶Sitse Nethania nuou Ishmael-e Mizpa nunu uko ze kesetuoü par; puoe tuo chakhrie kratuo, siro puo uko ze keselie tse, sie uko ki, “Ahikam nuou Gedalia ki vorcie,” sishü.

⁷Sidi ukoe nadiu metsuo nu vorlie tse, Nethania nuou Ishmael mu puo zeketuokoe süko dukhriwa, di uko kelhoupie thekre nu shüwa.

⁸Derei süko donu mia ker sie Ishmael ki, “Hie dukhriwa hieyi, hieko thoulha kenguya, barli, tier mu mepfhidzü lieko nu keviepie zhücü la” ilie. Süla puo kethelie, sidi uko kezeko sa di uko dukhriwa molie.

⁹Ishmael-e dukhrikewa kesia moko kelhou keshü thekre kezhau ro,[58] kediu Asae Israel kediu Basha perhiekecü puo keya chütuoü di thiekelieu; mu Nethania nuou Ishmael-e dukhrikewako pie süu ketshu chüwa.

¹⁰Sitse Ishmael-e Mizpa nu themia peshapie kebako pete kediu nuopfüko rei sa, mu Mizpa nu keba peteko, kezhau kepfheu Nebuzaradan-e khapie Abikam nuou Gedalia dzienu shükewako te ze kedie chü vota tsiu Nethania nuou Ishmael-e uko teze kediechülie di ze Ammonmia ki votuoü tuota.

¹¹Derei Karia nuou Johanan siro puo ze keba chüpahi mhokezha pete gei Nethania nuou Ishmael-e mhatho kesuo chükewa pete silie tse,

¹²ukoe themia pete zelie, di Nethania nuou Ishmael ze kegeituoü tuota, sidi Gibeon nu dzü ba sekecü kinu puo ngulie.

¹³Siro Israel zeketuokoe Karia nuou Johanan, mu puo zeketuo chüpahi mhokezhako ngu tse, ukoe u neilie.

¹⁴Sidi Ishmael Mizpa nunu tezetuoketa pete rürei lalie di la vorta, sidi tuo Karia nuou Johanan ki vor.

¹⁵Derei Nethania nuo Ishmael mia thetha zelie di Johanan dzie nunu talie di Ammonmia ki vota.

¹⁶Sitse Karia nuou Johanan siro chüpahi mho kezha puo ze ketuokoe Nethania nuou Ishmael-e Mizpa nunu Ahikam nuou Gedalia dukhrikewa sie, tezeketako[59] ze lalie, sükoe chüpahimia, thenumia, nhicunuomia, mu dzüucümia, Johanan-e Gibeon nunu süko ze la vorta.

¹⁷Mu uko tuoshü di vor Bethlehem khieki Geruth Kimham nu balie, Ijipt vakecü le di,

¹⁸kekreilamonyü Chaldianmia la, ukoe uko preikecü la, Nethania nuou Ishmael-e Ahikam nuou Gedalia, Babilon kediu puo chüpie puo bu kijüu nu kezha chükeshü dukhrikewa la.