Read Angami Naga Jeremia 42 Bible Online

Jeremia 42 - Angami Naga bible

Jeremia 42

¹Süsie chüpahi kheko, mu Karia nuou Johanan, mu Hoshaia nuou Jezania siro themia kecütho nunu vo kezhatho ketso vor di,

²Jeremia siedzekesiu ki, “Hieko n ki hie mezhiemelokeshü rünyüshüyi, sidi n Kepenuopfü Jihova ki hieko la, peshapie keba hako la chashüyi, kekreilamonyü kekra nunu hieko mia huoyo peshakelie zote, n mhi thuo ngukeba mhie.

³Jihova n Kepenuopfü bu hieko kirapuo votuo shi, tsiu hie bu kedipuo chütuo shi thashü hieko kieshücümu” sita.

⁴Sitse siedzekesiu Jeremia uko ki, “Vi sewe, a nieko kecha kemhie Jihova nie Kepenuopfü ki chashütuoüzhie, mu Jihova a diekhakeshü kehoupuorei a se nie ki pushütuo; a nieko ki mhapuorei pekhrewalie lho” sishü.

⁵Süsie ukoe lasie Jeremia ki, “Jihova bu úko donu ketho-u mu kedietho zhapu chüliecie; mhanuü hiekoe Jihova n Kepenuopfü n geinu khapie hie ketsü mhakehoupuorei chülie mota ro.

⁶Puo thuo vi rei suo rei hieko hie Kepenuopfü Jihova pfhe ze zotuo, hie n ketsepie puo ki shüzhie; hieko hie Kepenuopfü Jihova pfhe zelie liro, hie gei keviu chülietuo.”

⁷Siro teisozha ker sie Jihova die Jeremia ki vo.

⁸Süsie puoe Karia nuou Johanan, tsiu puo ze keba chüpahi kezhako pete, tsiu themia kecütho nunu vo kezhatho ketso kieshü.

⁹Sidi sie uko ki, “Jihova Israel Kepenuopfü, niekoe a ketsepie puo mhodzünu shü di a bu nieko la chakeshüu hakemhie puya:

¹⁰Niekoe kijü haunu ba zolie liro, a nie piesieshütuo, sidi nie shükhrüwa lho, tsiu a nieko pelhoushütuo, nie phewalie lho, kekreilamonyü a nie gei kepeka se vor keshüko la a nou suo.

¹¹Babilon kediu, nie puo prei bayakezhau prei hie; puo prei hiecie, Jihova siya, ae nie ze tuo zo, nie kelashütuoü, tsiu puo dzie nunu nie kelashütuoü tuo zocü la.

¹²Ae ngukemezhie pie nie tsü shütuo, sidi puoe nie ngumezhieshütuo, di nie bu nie thuo nie kijü nu la volie tuo.

¹³Derei niekoe sie, ‘Hie kijü hau nu balie lho’ iba zo ro, nie Jihova nie Kepenuopfü die ze mote.

¹⁴Mu sie, ‘Molie, hie Ijipt kijü nu votatuo, sünu hie terhü kegeicü ngulie lho, morei ketsükekhou pfhe silie lho, morei kecükekrie la merülie lho, süla hie sünu lhoutatuo’ iliro,

¹⁵tsie Jihova die rünyüliecie; he-i Juda lhiepie kebako, krodiko Jihova, Israel Kepenuopfü hakemhie puya: Mhanuü la Ijipt nu tsu di lhoukecü nie le terü zotuota ro,

¹⁶Ijipt kijü nunu nie preiyakezha zhiechau pie nie penyüwatuo, siro niekoe preikecü pekrie, nie siemedzi Ijipt nu letuo; sidi nie sünunu siatatuo.

¹⁷Sidi Ijipt nu tsu lhoutuoü di le terü tuoketako pete zhiecha geinu, pekriekecü geinu, tsiu thepetheruo geinu sia phretatuo, uko donu miapuorei a se vor kezhü kepeka nunu tapralie morei rheilie lho.

¹⁸“Kekreilamonyü krodiko Jihova, Israel Kepenuopfü hakemhie puya: A nei kemo mu a noupfhünouyie rupie Jerusalem nu kelhouko gei khakeshü tuoi, nie Ijipt nu kele ki, a nouyie rupie nie gei shütuo. Nie kerütsekecü mu mia bu meriekecü viepuo chütatuo, tsiu rüsepfü, mu mia bu thitatuo, siro nie thechü hau ngu lalie lho.

¹⁹Jihova nieko ki puya, he-i nie Juda geinu lhiekelieko, Ijipt nu tsu hiecie, siro a thie nie tarhokeshüu si touliecie.

²⁰Nie kekrü sewate, kekreilamonyü nie thuo a ketsepie Jihova nie Kepenuopfü ki shü di sie, ‘Hie la úko Kepenuopfü Jihova ki chacie, sidi Jihova úko Kepenuopfü mhakehoupuo pu rei, hie ki pucie, siro hie süu chülietuo’ siya.

²¹Süla a thie nie ki pushü ho, derei niekoe nie Kepenuopfü Jihova pfhe, puo a ketsepie nie ki pukeshü puorei zelie mo.

²²Süla nie zhiecha, pekriekecü mu thepetheruo geinu nie vo di lhou nyü keba thechüu nunu siaketuo si touliecie.”