Read Angami Naga Jeremia 43 Bible Online

Jeremia 43 - Angami Naga bible

Jeremia 43

¹Siro Jeremia-e themiako pete ki, uko Kepenuopfü Jihova dieko, süu uko Kepenuopfü Jihova puo ketsepie uko ki keshü die hako pu tseiwa tse,

²Hoshaia nuou Azaria, mu Karia nuou Johanan, mu themia kemiakokecü kekreiko pete rei sie Jeremia ki, “No meda bate, hie Kepenuopfü Jihova n ketsepie n bu, ‘Ijipt nu lhoutuoü tsu hie’ ishü zo;

³derei Neria nuou Baruk n chüpie n bu hie petsou di hie khapie Chaldianmia dzie nu shüwa, sidi süko bu hie dukhriwa, morei hie ze Babilon nu tsutaketuo la zo” sita.

⁴Sidi Karia nuou Johanan, siro chüpahi kezhako pete, tsiu themia pete Juda kijü nu lhounukecü nu Jihova die ze mota.

⁵Derei Karia nuou Johanan, siro chüpahi kezha pete-e Juda lhiekelie seyie kekrei nu cüre tuo di la vor Juda kijü nu kebako,

⁶thepfumia, thenuthenuo, mu nhicumia, kedinuopfüko, siro kezhau kepfheu Nebuzaradan-e pie Gedalia Shafan tsuu Ahikam dzie nu shüpie keba pete, siro Jeremia siedzekesiu mu Neria nuo Baruk rei zelie.

⁷Sidi ukoe Ijipt kijü nu tsu, kekreilamonyü ukoe Jihova die ze mota, sidi ukoe Tahpanhe nu tsolie.

⁸Sitse Jihova die Tahpanhe nu Jeremia ki vor di sie:

⁹N dzie pie ketsie kezha huo chülie, sidi vo Tahpanhe nu Faro kediu kicie ki nyoba pie nyhü keba khro nu khruwalie; no süu chükecü Judako bu ngu hie.

¹⁰Sidi uko ki, krodiko Jihova, Israel Kepenuopfü hakemhie puya: Ae mia ketseshü di Babilon kediu Nebukadnezar a kituou zelietuo, sidi puo kediba pie a khrukewa tsie hako mho shütuo, mu puo kedi keze pie süko zelie tuo.

¹¹Puoe vortuo mu puo Ijipt kijü pekawatuo, sidi thepetheruo nu voketuoko bu thepetheruo nu votatuo, tsiu kedie chü votaketuomia bu kedie chü votatuo, siro zhiecha kitsa votaketuomia bu zhiecha kitsa votatuo.

¹²Puoe Ijipt rhuoko rüsuokiko nu mi petushütuo, mu puo süko thewatuo, sidi uko te ze tuotatuo, tsiu puoe Ijipt kijüu pa kemesawatuo, tekuokepfhemia u pfhenei geinu tekhrü pa kemesawayakezha tuoi tuo; sidi puoe jüzhie zo di sünu nu tuotatuo.

¹³Puoe Ijipt kijü nu Heliopolis nu keba tsieseko biephrowatuo; tsiu Ijiptmia terhuo kerüsuo kiko puoe mi pie thewatuo.