Read Angami Naga Jeremia 46 Bible Online

Jeremia 46 - Angami Naga bible

Jeremia 46

¹Jihova die seyieko dze Jeremia siedzekesiu ki vor.

²Ijipt dze la, Ijipt kediu Faro Neko chüpahi dze, Karkemish nu Eufrat rü khie ba, di Babilon kediu Nebukadrezar Juda kediu Josia nuou Jehoiakim kedi chükelie cie dia ki penyülie:

³Nie keya mu pezhü keselie, sidi rüyachü nu volie!

⁴Gurako keseshülie; süko gei sielie! Nie thegi tsüre pfü di thechüko nu thaliecie, rüngouko chü kemevalie, thegi boulie seliecie!

⁵Kiüdi süko michie keba a ngu ga? Uko tsiesiete; uko terhümiavimiako penyüwate, sidi kenourhei tate. Uko rürei pesie la mo zo, kemeriekecü thuo lutsahatsa houpfü! Jihova sidi puya.

⁶Kemerhümia rei talie lhote, morei terhümiavimia talie lhote; pesotsa Eufrat rükhie nu uko tetsu zhüte.

⁷Nail dzü khorkezhü tuoikecü supuo ga? Kerü dzükru tuoi kezhü hau supuo ga?

⁸Ijipt-e Nail tuoi siertuo, kerü dzükru tuoi sierlie. Puoe sie, A bu rükrie sielie, a bu kijüu vupfü volie, a bu nadiko mu sünu lhoukebako pekawalie.

⁹He-i gurako, pedzüshülie, thu zo volie, he-i guragariko! Terhümiavimia bu tuoshüliecie; Ethiopiamia[60] mu Libiamia pezhü pie ketuoko, Lidiamia theü keseko.

¹⁰Süue krodiko Niepuu, Ukepenuopfü teisozhaute, khepukelie teisozha puo, puoe puo ngumvümia gei khepu lietuo. Zhiechaue mha peka mu mezu tseilietuo, tsiu süko zie krietuo. Kekreilamonyü krodiko Niepuu, Ukepenuopfüe kijü pesotsa kijü Eufrat rükrie khie nu ruosuo puo khashü ba.

¹¹Gilid nu kholie, tsiu daru seliecie, he-i Ijipt rüü phousepfü! Noe kemethuo nu daru kekra sewate; sirei n chü kemenelieketuo tuo mo.

¹²Seyieko n ngau sishüte, mu n kekra thuo kijü tshute; kekreilamonyü terhümia thuo terhümia petsou di u phi mesülie; u nie kenienie rei tetsute.

¹³Jihovae Jeremia siedzekesiu ki Babilon kedi Nebukadrezar kedipuo kemhie vor di Ijipt kijü perhietie shikecü dze kepu:

¹⁴Ijipt nu pushülie, siro Migdol nu pesishülie; siro Tahpanhe nu pesishülie; sidi sie, “Nie thau nu thalie mu dojüliecie, kekreilamonyü zhiecha thuo n khie n mhou hou kethako cülietuo” sishülie.

¹⁵Kiüdi Apis tata shi![61] Kiüdi n thudo-u thalie mote shi! Kekreilamonyü Jihova puo biekhrüwate.

¹⁶Nie mia kekra u phi mesü di tetsute, mu mia puoe kekreiu ki,[62] “Khe, úko la se u themiamia ki mu u rakhe nu vota khe, kekreilamonyü zhiecha kepekau la” sita.

¹⁷Theza hau pie Ijipt kediu Faro tsüshülie, “Kemelhakezhau puo teiu vajowate” isilie.

¹⁸Kediu sie, a rheiketuo tuoi, puo zae krodiko Jihova, kijüthou donu Tabor tuoi, tsiu dzükezha khie Karmel tuoi, sikecü puo vorzhie.

¹⁹Ijipt nu lhouketuo nuopfüko, kedie chü votaketuo la dojüliecie! Kekreilamonyü Memfis-e katatuo, miapuorei lhou mo di methuotatuo.

²⁰Ijipt-e thuünuo kezivi puo, sirei kepeka khudounuo puo pesotsa nu vor puo gei batuo.

²¹Puo zhakhrü ze ketuoko zorei thudo puo phou keviko mhie zo, uko rei tsiesiete tsiu keze tate, ukoe thalie mo, kekreilamonyü kepeka teiu uko gei vorketa la, uko siazha teiute.

²²Puoe tinyhü rüyie vokezhü pfhe kemhie chüya; kekreilamonyü puo ngumvüko kuo phi di thatuo, sidi seidurü se sei kewi tuoi, puo petsou vortuo.

²³Ukoe puo ketsako wiwatuo, Jihova sidi puya, puo thuo pfüphakelie jü shierei, kekreilamonyü ukoe ku kirei krakuo, uko phrü hulie kenjü zo.

²⁴Ijipt nuopfüko pie thenga chüwatuo; sidi puo khapie pesotsa nu kevor themiau dzienu shüwatuo.

²⁵Krodiko Jihova, Israel Kepenuopfü pukecü: Harie, ae siazha pie Thebes nu Amon mu Faro, siro Ijipt mu puo rhuoko, tsiu puo kediko, Faro rei, mu puo peleyakezha pete tsütuo.

²⁶Uko pie uko kerheiro pfhü ketuoko dzienu, tsiu pie Babilon kediu Nebukadrezar mu puo kezhako dzie nu shüwatuo. Süsie thiedzü teiki tuoi themia Ijipt nu lhou lalietuo, Jihova sikecü puya.

²⁷Derei no we, michie hiecie, a kituou Jakob, tsiu thedzü zeita hie, he-i Israel; kekreilamonyü ae kepetsera nu n kelashütuo, mu kedie chü ketuo nunu n tsu n yie kelashütuo. Jakob-e la vorlietuo mu rülei tsiu rüü batatuo, mu mia puo rei puo chüpie michietalie lho.

²⁸No zowe, michie hiecie, a kituou Jakob, Jihova sidi puya, ae n ze tuo zokecü la. Ae n whuokeshü seyie pete bie pejüwatuo, derei a n bie pejüwalie lho! A mejü di kemezhü nunu n pethashütuo mu siazha sa mo di n khawalie lho zo.