Read Angami Naga Jeremia 48 Bible Online

Jeremia 48 - Angami Naga bible

Jeremia 48

¹Moab dze pukeshü. Krodiko Jihova, Israel Kepenuopfü hai di puya: Nebo we ce chülietie, puoe methuo zhüte! Kiriathaim pie thenga chüwate, süu lieliete; dahouko pie thenga chüwate mu bierhuowate;

²Moab puo za kemeyie tuo sa mote. Heshbon nunu uko puo petsoutuoü di mha kesuo rhü; “Vorlie, úko puo bu seyie puo chü motatuoü puo dathewa khe!” No rei sa, he-i Madmen, n bu kemekrietatuo;[63] zhiecha bu n whuotuo.

³Rünyüliecie! Horonaim nunu kekra pfhe puo, “Thedzükezei mu kadikate!”

⁴“Moab pekawate!” puo nuonuo kecüko kra bate.

⁵Kekreilamonyü Lulit kekho chau nu kra kemerie chü khotuo, kekreilamonyü Horoniam ketsu nunu keker chau nu, uko kemezhie di krakecü pfhe sishü.

⁶Talie! Nie thuo nie kelaliecie! Kijükesia nu nha gada[64] tuoiliecie!

⁷Ketho zo, nieko nie dahou kemetei[65] mu nie kinyi pelecü la, no rei sa lielietatuo; Kemosh-e puo zievoko, mu puo zetuoko sa di mia die chü votatuo.

⁸Mhakepekamia nado pete nu votuo, mu rüna puorei talie lho; razhako katatuo, mu kijü thezha pekawatuo, Jihova pukeshü tuoi zotuo.

⁹Moab la metsie kha kreipie bacie, kekreilamonyü puoe tetsu tou zotuo, puo rünako thedzükezei chütatuo, miapuorei sünu lhou lho.

¹⁰Jihova lie kechü nu kemecüu bu rüse pfücie; siro thezie nunu puo zhiecha shükhrekewau bu rüse pfücie.

¹¹Moab-e puo khriesa nunu rüü di lhou, puoe zu seketa tuoi puo kha geinu lhou, puoe mhabou puo nunu puo lapie kekrei puo nu shü mo, morei kita chüta mo, süla puo kelheu ba zo mu puo reu suota mo zo.

¹²Süla puoteiu vor touzhie, Jihova siya, süki ae la kedishüyakezhamia ketsepie puo ki shü di puo bu la kedishütuo, mu puo mhabouko chü kemethuowatuo, tsiu puo hiepouko biephrowatuo.

¹³Sitse Moab-e Kemosh la mengalietuo, Israel kinukoe Bethel, ukoe peleketuou la mengakelie tuoituo.

¹⁴Niekoe kedipuo mhie di, “Hie kekuomia we mu terhümiavimia” iya ga?

¹⁵Moab mu puo rünako pekakewau parte, mu puo khriesa kevithoko kedukhri nu tsute, kediu siya, puo zae krodiko Jihova.

¹⁶Moab kepeka vor penuo bate, siro puo pechüketuo penuotei bate.

¹⁷Nie puo zanuomia pete, puo krükraliecie, tsiu puo za kesi peteko sie di, “Kimhie di kethe kemeteiu mu seiro keziviu bietsheliete shi” sikecü putuo.

¹⁸Dibon nuopfüko zapuzayieu nunu kerliecie, sidi kijü sotsakecü nu balie! Kekreilamonyü Moab kepekau n perhietuoü parte; puoe n dahou kemeteiko pekawatuo.

¹⁹Cha khieki tha di pfhe balie, nie Aroermiako! Sidi takezhüu mu tazhükecüpfü ketsocie; sidi, “Kedipuo chüta ga?” isicie.

²⁰Moab pie thenga nu shüwate, puo bierhuowaketa la; ruorüi di kraliecie! Moab methuo zhüketa, pie Arnon bu pushülie.

²¹Kijü thezhau gei, Holon gei, mu Jahza Mefat gei,

²²Dibon gei, mu Beth-diblathaim,

²³mu Kiriathaim, mu Beth-genul, mu Beth-meon,

²⁴siro Kerioth mu Bozra, tsiu Moab kijü nu rüna pete kepetse nu mu kepenuo nu pete gei dienya kecüketuo vorte.

²⁵Moab kiau bietshewate, mu puo bou bietshewate, Jihova siya.

²⁶Puo bu meze batalie, kekreilamonyü puoe puo thuo puo chü pezha pie Jihova petsoukecü la; Moab bu puo merü nu rüphrepfü zhülie; puo rei mia krenyü chü batatuo.

²⁷Israel pie nie krenyü chüte; kerüguko donunu puo telie mo zoürei; derei kehoukipuorei puo dze pushü ro n tsü tsügetatuo!

²⁸Rünako khawalie, sidi vo tsiekrie gei lhoulie, he-i Moabmiako! Mekhru tsiekrie kecieki he nunu puo kru chüyakezha tuoitalie.

²⁹Hiekoe Moab kemiako ketuo si, puoe kemiakothor zo, puo rükriekecü, puo kokecü, mu mia rünyü kemo, tsiu puo nou kemelhakecü.

³⁰A a thuo puo nou kerüzhakecü si, Jihova siya; puo kemelhaketuoko, puo mhathoko kemeda zo.

³¹Süla ae Moab krü kraya; ae Moab pete la kraya; Kir-heres themiako la a thekrü chüya.

³²Jazer kirei a n la krakuotuo, he-i Sibma khubebo-u! N cokoe dzükezha mho kra vote, Jazer ketso vote;[66] mhakepekamia n teile nhasiko mu khube vi kreikecüko gei tsurte.

³³Moab kijü kruokezhüu nunu kenei mu thenou kemvü chü sete; ae khubedzü kethe nunu khubedzü bu par sa mote; miapuorei kenei nu shie di khubedzü the sa mote; shie kebau u nei di shie ba mote.

³⁴Heshbon mu Elile shiekhouite;[67] uko pfhe Jahaz ketso rei vote, Zoar nunu Horonaim nu ketso mu Eglath-shel-ishiya ketso si vote, kekreilamonyü Nimrim dzüko soketa la.

³⁵Sidi ae Moab pie puo thela chüwatuo, Jihova siya, thechü kerükrie geinu ruosuo kechümia, siro mhapie uko rhuoko tsüyakezhako.

³⁶Süla a meloue Moab la luoü kekhou pfhe tuoitatuo, siro a meloue Kir-heres themiako la luoü kekhou pfhe tuoitatuo; kekreilamonyü uko ngukelie kinyiko kaüjütatuo.

³⁷Kekreilamonyü themia tsü thiewa mu themia pete tiemie thiewate; themia pete dzie gei gekewa batatuo mu u chieca gakhropfhe nei meneituo.

³⁸Moab nu ki tsü gei mu chaüko nu thekrü sie mhapuorei ba sa mote, kekreilamonyü mhabou u nei kemo puo tuoi ae Moab biephrowate, Jihova sikecü puya.

³⁹Kimhie di süu biephrowate shi! Kiüdi uko kra ba shi, kimhie di Moab-e menga di puo chie kereiliete shi! Süla Moab-e puo zanuomia pete krenyü mu meriekecü puo chüte.

⁴⁰Jihova hai di puya: Mehoshücie, puoe tsüürapfü tuoi thu tsur, sidi puoshü kelhapie Moab petsoubate;

⁴¹rünako[68] lielietuo mu dahou kemeteiko lielietuo. Sünhie Moab terhümiaviko meloue thenumia nuonuovachü melou tuoitatuo.

⁴²Moab-e seyie puo ükecü nunu puo pekawa, kekreilamonyü puoe puo thuo puo chü pezhapie Jihova petsoute.

⁴³Kemichie, thekhe mu kebie n mhodzünu zhüte, he-i Moab nu kelhouko, Jihova sidi puya.

⁴⁴Kemichie prei di taketuou tese thekhe nu tsutuo, mu kehoupuorei thekheu nu partuoükezhüu kebie nunu puo malietuo. Kekreilamonyü ae siazha pie uko tsüketuo teicieu nu mha hako[69] se Moab gei vortuo, Jihova sidi puya.

⁴⁵Ta ketuoko mezie di Heshbon khrü rüzhü thata; kekreilamonyü Heshbon nunu mi tu parte, Sihon kiu nunu miü par; sidi Moab teikhie pekawate, rübvürübie ketuo themia tsüzhüu thewatuo.

⁴⁶He-i Moab, no we ce chülietie! Khemosh themiako kate, n nuonuo thepfuko te ze mia die chü voketa la, mu n nuopfüko mia die chü vote.

⁴⁷Sirei ae teisozha thelatsa Moab mia die chüketuo ze la vorshütuo, Jihova sidi puya, Moab pechüketuo hakemhiekecü ketso votuo.