Read Angami Naga Jeremia 49 Bible Online

Jeremia 49 - Angami Naga bible

Jeremia 49

¹Ammonmia dze pukeshü. Jihova hai di puya: Israel-e puo nuo thepfumia jü me? Puoe puo kawemia jü me? Kiüdi siro Milkom-e Gad penyü se bata, mu themiako puo rünako nu lhou bata ga?

²Süla teisozhau vor zhü tou zo, Jihova siya, ae Ammonmia Raba petsoukecü terhü pfheu pesishütuo; süue methuo zhü, mu puo rünako mi pie thewatuo; sitse Israel-e puo penyükeliemia penyüwatuo, Jihova siya.

³Shiekhouilie, he-i Heshbon, Ai-e ruozhüketa la! Kraliecie, he-i Raba nuopfüko![70] Gakhropfhe dzielie, thekrü chülie, sidi seiro pie n thuo n vülie! Kekreilamonyü Milkom-e puo zievoko, mu puo kezeko sa di mia die chü votatuo.

⁴Kiüdi no n thuo n kekuo la kemelhaya ga? N kekuo krütatuo, he-i tsiesieketa nuopfü. Nie kinyiko pele di sie, “Supuo a penyülie ta?” iya.

⁵Nie zanuomia kinu ae kemichie se vor n gei shütuo, krodiko Niepuu Ukepenuopfü siya, sidi niekoe mia puopuokecü rükri ta cüretatuo, miapuorei rüshü ketuoko pfhü kengulie lho.

⁶Derei süsie ae thiesie Ammonmia ruo chü pevi lashü tuo, Jihova sidi puya.

⁷Edom dze kepu. Krodiko Jihova hai di puya: Teman nu mhakesi ba sa mote me? Kemenuomia gei kepetha jüte me? Uko mhasi jüte me?

⁸Talie, rüreilie, kerünuo nu kelie, Dedan nu kelhoumiako! Kekreilamonyü a Esau kemezhiekecü se puo gei vorshütuo, kepechü kha puo ketsü tei nhie.

⁹Khubesi pfhü kengukezhamia n ki vor ro, uko huo khapie ba lhoü me? Kerügumia theva ze vor ro, ukoe uko liekenyüu rübei chüsetatuo.

¹⁰Derei a we, ae Isau pfhenei rhuo tseiwate, ae puo kepekhre chüko hielashüte, mu puoe puo thuo puo kevielie kenjütatuo. Puo tsunuonuo pekawate, puo siezedzüriemia mu puo zanuomia rei; mu puoe ba sa mote.

¹¹Nie merünuoko kha pie bawalie, ae uko perheise balietuo; mu nie samipfüko bu a pele balie.

¹²Kekreilamonyü Jihova hai di puya: Mhanuü nieko mia huo tehie hau kriekecü mese moü ba rei süu krie zotuo, no siazhau ngulie lhoü ba me? No siazha ngu motalie lho; no süu krie bei zotuo.

¹³Kekreilamonyü a a thuo rüseshüte, Jihova sikecü puya, süusü Bozramia pie merie mu pesekelie viepuo, methuo, mu rüsekecü vie puo chütatuo; mu puo nadoko pete kechachie ra zhütatuo.

¹⁴Ae Jihova kinu dielie puo sishüte, mu dieliemia puo ketsepie seyieko donu shü di sie: “Nie thuo nie kezhulie di vor puo perhiecie, tsiu terhü la sieliecie!” isi.

¹⁵Kekreilamonyü ae nieko chüpie seyieko donu kecütho chüwatuo, tsiu themia bu thikecü chüwatuo.

¹⁶N ngu merieketuou, mu n melou kemiakoketuou n sewate, no tsiekrie ketsa gei lhoutuoyakezhau, kijükhru mezü teshüse tuoyakezhau. No n kru chü kerükrie pie tsüüra tuoilie zorei, a sünu nu zorei n teshü kerwatuo, Jihova sidi puya.

¹⁷Edom-e mia bu meriekecü puo chütatuo; sidi kehoupuorei süu pfüthe kevo pete u ngo mu rütsetatuo, süu pekaperuowaketa la.

¹⁸Sodom mu Gomora mu uko zanuomiako penyükewa mhiei, Jihova puya, sütuoi miapuorei sünu balie lho, morei themia puorei sünu lhou lho.

¹⁹Puoe Jordantsa kesoutho nunu sier nha pejo sei keba thechü perhiekecü tuoi, ae sünunu Edom whuo mhaiwatuo; sidi a kedakelie pie süu mho kekhatatuo, kekreilamonyü supuo a mhie ga? Supuo a kielie ta? A mhodzüki thalieketuo kuopfheu sü supuo ga?

²⁰Süla Jihovae Edom perhietuoü di rhiekeshü mu Taman nu kelhouko perhietuoü di chükelie rünyüshücie, ketho zo, tekuoko donu kecüthoyo zorei teshüsetatuo; ketho zo, uko kro-u uko kepekau la kemeriechütatuo.

²¹Uko tetsuketa pfhe sikecü ki kijüu meleta; uko krakeshü ki Kemerie Dzükezhau[71] nu rei si votsota.

²²Harie, puoe tsüüra tuoi thukho mu thukertuo, sidi puo shü kelhapie Bozra petsoutuo, mu teisozha sünhie Edom nu terhümiavimiako, meloue thenumia nuonuovachü tuoitatuo.

²³Damaska dze pukeshü. Hamath mu Arpad u ziejü bate, kekreilamonyü ukoe thedze kesuo site; ukoe michie di zejüte, ukoe dzükezha tuoi kehoukeruo chü bate,[72] süue kemekrie balie kenjüte.

²⁴Damaska thachü miemiete, puoe tatatuoü rüreite, tsiu kemichieu puo gei vorte; thenou kemezhiekecü mu nousuo puo gei vor, thenumia nuonuo vachü tuoi di.

²⁵Kimhie di nadi kemeyieu khawate shi,[73] kenei nadiu lie![74]

²⁶Süla teisozha sünhie khriesako ziekeko nunu tetsutatuo, mu chüpahimiako pete pekawatuo, krodiko Jihova sidi puya.

²⁷Siro ae Damaska dahou nu mi puo petushütuo, sidi süu Ben-hadad dahouko thewatuo.

²⁸Kedar mu Hazor kedirüvie, Babilon Nebukadnezar-e pekakewako dze pukecü Jihova hai di puya: Sielie, Kedar perhietuoü kholie! Niathutsa themiako pekawalie!

²⁹Uko pfheko mu uko kicükiriko setalie, uko kikhapfheko mu uko nyaürako pete, nie la uko utko setalie, mu shiekhoui di sie: “Kemichie lutsahatsa bate” ishülie.

³⁰Tatalie, kepetse nu votalie, thechü kesou nu rüshütalie, he-i Hazor nu kelhouko! Jihova siya. Kekreilamonyü Babilon kediu Nebukadnezar-e nie perhieketuo la mharhüliete, mu n perhieketuo la mharhü puo chüliete.

³¹Sielie, di rüü keba seyie, khrukhre di lhou kebako, perhiecie, Jihova siya, uko kharu morei uko cakha kejümiako, u rübei lhou tuoyakezhamia ki votalie.

³²Uko utko ketaliete, uko kicükiri pekawate. Ae u tsüle thiekepfümia bu teikhrie pete nu ta votatuo, siro lutsahatsa nu kepeka se uko gei shütuo, Jihova sidi puya.

³³Hazor pie meseru bou chü chüwatuo, kechachie methuotatuo; mhapuorei sünu lhou lho, morei miapuorei sünu tuo motatuo.

³⁴Jihova die Juda kediu Zedekia di sedekelie ki Elam perhieketuo la Jeremia siedzekesiu ki vor.

³⁵Krodiko Jihova hai di puya: Ae Elam theüu, uko kekuo kezhau bietshewatuo;

³⁶mu ae teigei puo ke diako geinu teikhrie diako se Elam gei vortuo; sidi Elam nu whuokeshü themiako vo kemo seyie puorei tuolie lho.

³⁷Ae Elam ngumvüko mu puo kerheiro pfhü ketuoko mhodzünu nu puo chü kemideshütuo; ae kepeka mu a noupfhüu se uko gei vorshütuo, Jihova siya. Ae zhiechau ketsepie uko whuotuo, a uko pekawa kemochie situo zotuo;

³⁸tsiu a kediba pie Elam gei shülietuo, sidi uko kediko mu kezhako pekawatuo, Jihova sikecü puya.

³⁹Derei teisozha thelatsa, ae Elam mia die chü ketuoko ze la vorshütuo, Jihova sikecü puya.