Read Angami Naga Jeremia 5 Bible Online

Jeremia 5 - Angami Naga bible

Jeremia 5

¹Nie ta Jerusalem chako nu lukihaki vocie, sidi mhameho whishü di siliecie! Puo kitiezhako nu pfhücie di nie-e themia puotou chüyakezhamia, ketho-u pfhüyakezhamia puo ngulie di, a bu Jerusalem kejo vashülie vituo me.

²Uko thuo sie, “Jihova rhei ketuo tuoi” isikecü pu rei, uko tijü di rüse.

³He-i Jihova, n mhi-e ketho-u pfhüya moü me? Noe uko vüshü, derei uko kemezhiekecü rei silie mo; noe uko pekawa, derei ukoe pethapfülie mvüte. Ukoe uko zie chü perepie tsiekhrü ki rei khrükuote; sidi ukoe la vor mvüte.

⁴Süla ae sie, “Hako mhakejümia zo, ukoe u kele jü; kekreilamonyü ukoe Jihova chau, uko Kepenuopfü zho-u silie mote.

⁵A bu kenyiko[10] ki vo di uko ki mha pucie; ukoe Jihova chau, uko Kepenuopfü zho-u silieta tou zo” sishü. Derei uko pete rei vocieu bietshawate, ukoe kero-u biethewate.

⁶Süla ketsa nunu losha puoe uko tewatuo, tsiu kijükesiara socie bu uko pekawatuo. Khurhü bu uko petsou di uko sünunu kepra kheko ciechücierha phawatuo, kekreilamonyü uko kephoumako krathorta ze ru, uko tsiesiethor vote.

⁷Kiüdi a n kejo valietuo mu? N nuonuoko a khakegewate, tsiu uko rhuo kejü kro puo bu rüse. Ae uko va chü pevüshü tse, uko pieü chü, tsiu thethenuko kinu vo kengupfü bate.

⁸Ukoe u mengu bu u ketshu chükecü kro puo, mia puopuokecü puo zanuou kimia these.

⁹Mha hako la a siazha pie uko tsü zhü moü me? Jihova siya, tsiu seyie haikecü gei a a khepukecü mese moü me?

¹⁰Puo khubelie chau gei pfüthe vocie di pekawacie, derei puo thela chü tseiwa hie; puo coko douwalie, kekreilamonyü ukoe Jihova mia mote.

¹¹Kekreilamonyü Israel kinuko mu Juda kinuko a pele mo tseite, Jihova sikecü puya.

¹²Ukoe Jihova pu kecürüwate, sidi sie, “Puoe mhapuorei chülie lho. Mhakesuo u gei vorlie lho, morei we zhiecha morei pekriekecü ngulie lho” siya.

¹³Siedzekesiko kemethuo, teikhrie puo zo, dieu uko gei tuo mokecü la. Hamhiekecü pie uko gei shüshütuo!

¹⁴Süla krodiko Kepenuopfü Jihova hakemhie puya: Ukoe die hako pucü la, a a die bu n me nu miü chütuo, sidi themia hako pie sei chütuo, sidi mi bu uko thewatuo.

¹⁵Ae kepetsera nu seyie puo bu nieko gei vortuo ho, he-i Israel kinuko, Jihova sidi puya. Süu seyie kemetei puo, süu seyie kewe puo, seyie süu die no silie lho, morei uko kedipuo pu ba shiü no silie lho.

¹⁶Uko theüboue mekhru thiepie kezhü tuoi; uko pete rei terhümiavi kekuomia phre.

¹⁷Uko n lha mu n kecüca cü phrelietuo; ukoe n nuonuo thepfumia mu thenunuoko cü phrelietuo; ukoe n kuokro tsiu n kicükiriko cülietuo; ukoe n khube tsiu n chiede cülietuo; ukoe nadiko dahou, pele bayakezhako zhiecha pie biemewatuo.

¹⁸Derei teisozha süko nu, a nieko peka tseiwa lho, Jihova siya.

¹⁹Siro n themiako sie, “Kiüdi úko Kepenuopfü Jihova mha hako pete pie u gei shü shi?” Siro, noe uko ki, “Nieko a khawata, sidi nieko kijü terhuo kekrei rüsuoketa tuoi, nieko bu nie kijü kemora nu kekreimia lie chütuo” situo.

²⁰Mha hau pie Jakob kinuko ki pushülie, tsiu süu pie Juda nu pesishülie:

²¹Hau rünyüliecie, he-i kenya mu mhalekemo themiako, u mhi ba, derei nguyakemoko, u nyie ba, derei mhapfhe siyakemoko.

²²Nieko a prei mo me? Jihova siya: Nieko a mhodzünu pelie lho me? A theshünyo pie dzükezha nu therie chüshü, kechachie nie süu pfüphalie kenjü; dzü thuo rüpfhü sie zorei, ukoe süu pfüphalie lho, uko pfhe kemerie chü zorei, ukoe süu tsepalie lho.

²³Derei themia hako u nou khrüthor mu mia perhie tuoya; uko rüreite sidi tuote.

²⁴Uko nou nu, “Úko Kepenuopfü Jihova preilie khe, puoe puotei nu teirü khashü, therü teirü mu bayie teirü khashüya, tsiu úko la lieyie tei zhadoudo rei khashü” idi leya mo.

²⁵Nieko kesuokoe mha hako kelawate, tsiu nieko kephoumae nieko lanu mha keviko kha se bate.

²⁶Kekreilamonyü a themiako donu themia kesuomia ba nguliete; uko mia kekreimia vie pielieya. Ukoe kebie pethoupie kebamia tuoi; uko themia malieya.

²⁷Pera ra puo nu pera thuo tshupfü keba tuoi, Uko kiko nu mhasekedokecü bu tshupfü ba; süla ukoe zha miemielie mu mhanyilie,

²⁸Ukoe luo mu meju ba. Ukoe mha kesuo kechütsa we puo kela si mo; ukoe merünuomia bu kuolietuoü di kethoca nu capi chüya mo, tsiu ukoe ketsopfhümia mezhüu rüguoya mo.

²⁹Mha hako la a uko pechü zhü moü me? Siro seyie haikecümia gei a khepukecü mese moü me? Jihova sikecü puya.

³⁰Kijü nu mha u ngo zokecü, tsiu kemeriekecü puo chüwate.

³¹Siedzekesiko ketijü siedzedie pu, mu zievokoe siedzekesiko pukeshü medzi di mha kekha;[11] a themiakoe sikecü u neite; derei nieko puo thela kevor nhie kedipuo chütuo ga?