Read Angami Naga Jeremia 50 Bible Online

Jeremia 50 - Angami Naga bible

Jeremia 50

¹Jihova die Jeremia siedzekesiu geinu Babilon mu Chaldianmia kijü dze pukeshü:

²Seyieko donu pesishü mu pushülie, pfhelhau lhashülie di pesishülie, süu keviewa hie, pushülie: Babilon lieliete, Bel pie thenga nu shüwate, Merodak thenousuo bate. Puo rhuorhiko pie thenga chüwate, puo rhuorhiko thenousuo bate.

³Kekreilamonyü pesotsa seyie puoe puo petsou siertuo; süu puo kijü chü kemethuowatuo, mu miapuorei sünu lhou motatuo; themia mu khunuo rei sünunu tatatuo.

⁴Teisozha süko nu, mu sütei ki, Jihova puya: Israelmiako vorlietuo, uko mu Judamiako keze vortuo; ukoe kra di uko Kepenuopfü Jihova pfhü vortuo.

⁵Ukoe uko zie bu sütsa va di Zion nu kevo chau ketsotuo, sidi uko keze vor kechachie rükra motalie kelho dietseidiekho-u nu Jihova ze puo chülietatuo.

⁶A themiakoe tekuo jüketamia chü tuote; uko kepfhekoe uko chatha kekrüwate, uko ze rürei kijüthouko gei vowa; kijüthou geinu kijükhru gei vorte, ukoe uko kebachüu rükra mote.

⁷Uko kengu pete uko mezuliete, mu uko ngumvümiae sie, “Hiekoe jo mo, kekreilamonyü ukoe Jihova kemiatho sekebau, Jihova, uko puonuoko kemerüu gei phoumawaketa la zo” siya.

⁸Babilon nunu tatalie, mu Chaldian kijü nunu tuotalie, sidi puo kro taze ketuo mvüdo tuoiliecie.

⁹Kekreilamonyü ae kijü pesotsa nu seyie kezhazhakecü bu sier Babilon perhieketuo chüshütuo, sidi ukoe puo perhietuoü dojüse thalietuo; sidi sünunu puo tezetatuo, uko theütsie-e terhümiavimia theütsie ciekesimia miapuorei puo dzie methuo di la voryakemomia mhie zotuo.

¹⁰Chaldian pekawatuo; puo pekakecümia pete rei u kelhuo chülietuo, Jihova siya.

¹¹N thuo n nei ba rei, n thuo n noumvü ba rei, he-i a kayie pekakewako, nie thuo thuünuo nha cü di luokelie mhiei, mu gura tuoi ruo tha rei,

¹²N zuo bie kethenga tseishütuo, mu n penuokeshüpfü bie ketheseshütuo. Harie, puoe seyieko donu thelatho-u chütatuo, rayha, kijü keso, mu kijükesia chütatuo.

¹³Kekreilamonyü Jihova nouyie la puo gei themia lhou lho, derei süu methuo to zotuo; Babilon khie ki kevo kheko u mekeso chütuo, mu puo rüzako la tiema di u keropfhe chütuo.

¹⁴Babilon houlie di dojüse thalie, nie theü gayakezha kheko; ciepie puo peshülie, theütsie yopuorei peshashü hie, kekreilamonyü puo Jihova gei jowate.

¹⁵Lutsahatsa nu puo perhie di shieshülie, “Puoe mia khro lete; puo mvüdzeko tetsute, puo dahouko mete.” Kekreilamonyü hau Jihova khepuukecü la, puo gei khepu lielie, puo chükeshü mhiei chüpie puo gei lashü.

¹⁶Babilon geinu tsiapruyakezhau dathewalie, mu lieyie teiki zhiepfhinuo rükreikezhau rei, kekreilamonyü mia pekakezha zhiechau la pete u thuo u themiamia ki votatuo, mu uko pete rei ta u kijü nu la votatuo.

¹⁷Israel-e losha bu puo whuokewa tekuo puo chüte. Therieu Asiria kediu puo mezulie, mu tsie thela nu ro Babilon kediu Nebukadrezar bu puo ruko mehiewate.

¹⁸Süla krodiko Jihova, Israel Kepenuopfü hakemhie puya: Ae Babilon kediu mu puo kijüu siazha pie tsütuo, ae Asiria kediu siazha pie tsükeshü mhieshütuo.

¹⁹Ae Israel ze la vor puo tuo kijü nu lashütuo, sidi puoe Karmel mu Bashan nunu puo vapfhülietuo, tsiu Efraim kijükhruko gei siro Gilid nunu puo kelhou chülietuo.

²⁰Teisozha süko nu, mu süteiki, Israel kesuo kechü pfhü sietuo, derei puo rei ngulie lho, Jihova siya, siro Juda kephoumako pfhü sietuo, mu puorei ngulie lho; kekreilamonyü ae lhiepie kebako kejokemou vashü tsüwatuo.

²¹Merathaim[75] kijü nu kholie; kho di puo perhielie, tsiu Pekod[76] nu kelhouko perhielie, sidi thelathoko rei peka tseiwatuo[77], Jihova sidi puya; a nieko ki diekhakeshü pete chülie.

²²Kijü nu terhükechü pfhe, mu mhapeka kemeriekecü pfhe si bate!

²³Kimhie di kijü pete nu martul-u dathewa mu bie pesuoshü shi! Kimhie di Babilon-e seyieko donu kemeriekecü puo chüte shi!

²⁴N thuo kebie puo pethoupie zhü, sidi n maliete, he-i Babilon, derei noe süu si mo; n ngulie sidi n telie, kekreilamonyü no Jihova chieketa la,

²⁵Jihova puo rünyiebou hieshüte, sidi puo noupfhünouyie rünyieko separte, kekreilamonyü Chaldianmia kijü nu krodiko Niepuu Ukepenuopfüe mhatho puo chüshü morosuo keba la.

²⁶Kijü ke diako nunu vor puo perhiecie; puo lhakiko khrüshülie; süko pfhepie puo bu kepupfü zhütalie, sidi peka lotsowalie; puo nu mhapuorei peshashü hie.

²⁷Puo thudoko pete dukhriwalie; süko bu kedukhri nu votalie. He-i uko la, uko teisozhau vorte, uko siazha nguketuo teisozhau!

²⁸Rünyüliecie! Babilon kijü nunu tatuoketako mu kitamiako Zion nu vor di Jihova úko Kepenuopfü khepuu, puo rüsuoki khepuu pesishütuoüzhie.

²⁹Theü kepieko kie kengupie Babilon perhiecie, theü gayakezha pete. Puo khieümhoura houpfü balie; miapuorei bu ta prata hie. Puo mhatho kheki sü chü puo tsücie. Puo chükeshü kemhie tou di sükemhie chüpie puo gei shülie, puoe Jihova Israel Kemesau perhukecü la.

³⁰Süla puo khriesako chaüko nu tetsutatuo, siro teisozha sünhie puo chüpahiko pete dathewatuo, Jihova sikecü puya.

³¹Ae n perhieya, he-i, kemiakokecüu, krodiko Niepuu Ukepenuopfü siya; kekreilamonyü n teisozha vorte, a n siazha khashüketuo teiu.

³²Kemiakokezhau puo phi mesülie di tetsutatuo, miapuorei puo phoushülie lho, siro a puo nadi nu mi petushütuo, sidi puo houpfü keba pete thewatuo.

³³Krodiko Jihova hai di puya: Israelmiako mu Judamiako rei sa pechüwate, uko tepie kedie chükecüko pete uko thezetsalie di uko bu tuotalie kenjüte.

³⁴Uko Rhakelieu kuo; puo za sü krodiko Jihova zo. Puoe uko la pu menuo zotuo, mu puoe kerülei khapie kijü gei shütuo, derei Babilon nu kelhouko we kerülei balie lho.

³⁵Jihova puya, Chaldian petsoukecü zhiecha puo, mu Babilon nu kelhouko petsoukecü zhiecha puo, tsiu puo kezhako mu puo themia mhakesiko petsoukecü zhiecha puo!

³⁶Themoumia petsoukecü zhiecha puo, uko pie kenyamia chütaketuo la! Terhümiaviko petsoukecü zhiecha puo; uko pekawaketuo la!

³⁷Puo gurako mu guragariko petsoukecü zhiecha puo, tsiu puo donu sikemomia petsoukecü zhiecha puo, uko pie thenumia mhiewaketuo la! Puo kinyi pete petsoukecü zhiecha puo, süko vapielieketuo la!

³⁸Teikuo puo dzüko petsoukecü zhiecha puo, sidi süko pesowaketuo la! Kekreilamonyü terhuorhiko kijü zokecü la; mu ukoe terhuorhiko se nya bate.

³⁹Süla Babilon nu haina khunuoko ze batatuo, mu ostrik rapfü sünu lhoutatuo; sünu kechachie themia lhou salie lho; morei themia phou pete rei sünu lhoulie lho.

⁴⁰Ukepenuopfüe Sodom mu Gomora siro unie zanuoko pekakewa tuoiwatuo, Jihova siya, süla themia puorei sünu lhoulie lho, morei miapuorei sünu phetshe sa lho.

⁴¹Mehoshücie, pesotsanu themia vorzhie; kijü valatsanu seyie kuo se mu kedi kekra mele sierzhie.

⁴²Ukoe theü mu rüngou thezese tuo; uko zhosuo mu mia ngumezhieya mo. Uko pfhe-e dzükezha mehokecü pfhe tuoi; uko gura gei tuo, terhü nu votuoü dojü seketuo tuoi dojüse tuo, n perhietuo üdi, he-i Babilon nuopfü!

⁴³Babilon kediu uko dze sishü, sidi puo dzie pie mhapuorei chülie kenjü parta; thenou chükecü puo gei vorta, thenumia nuonuo vachü tuoi di.

⁴⁴Jordan ronyho-u nunu losha puo sier di perinuoko tuo puo petsoukecü tuoi, ae puo kinu süko whuo mhaiwatuo, sidi a kedakeliemia pie puo mho gei bawatuo. Kekreilamonyü supuo a mhie ga? Supuo a kielie ta? Tekuokepfhe supuonie a mhodzünu thalie ta?

⁴⁵Süla Jihovae Babilon kijü la mharhüu, mu Chaldianmia kijü perhietuoü rhükelieu nie rünyüshücie: Tekuokro-u nunu kecütho-u teshü seta tou zotuo; ketho zo, puo kro süu la puo mekeso chütuo.

⁴⁶Babilon lielieketa pfhe sikeshü ki kijüu petatuo, tsiu seyieko donu puo kekra pfhe si votuo.