Read Angami Naga Jeremia 51 Bible Online

Jeremia 51 - Angami Naga bible

Jeremia 51

¹Jihova hai di puya: Ae Babilon mu Leb-kamai[78] nu kelhouko perhieketuo la, mhakepeka teikhrie[79] puo piesieshütuo;

²siro ae mha heyakezhamia ketsepie Babilon nu shütuo, sidi ukoe puo hepetawatuo. Ukoe puo kijü chü kemethuowatuo, kemezhiekecü nhie ukoe lutsahatsa nu puo perhie phirtuo.

³Theü kepieu bu puo theü ga hiecie, tsiu puo bu terhü boulie se di dziepfü thata hie. Puo khriesako peshashü hie; puo rüpfhünuoko peka lotsowalie.

⁴Chaldianmia kijü nunu uko dukhri pie zhüwatuo, mu puo chaü nunu rüzapfü zhütatuo.

⁵Israel mu Juda rükra mota lho, uko Kepenuopfü, krodiko Jihova uko khawa mo zo, uko kijüe Israel Kemesau mhodzünu kephouma thuo tshupfü zhüta zorei.

⁶Babilon donunu latalie, sidi n kerheiro kelalie, nie kehoupuorei! Puo kejo la kaüjüta hiecie, kekreilamonyü hau Jihova khepu teiute, puoe puo zha chüpie puo tsüzhie.

⁷Babilon-e Jihova dzienu suna hie chü, kijü pete die kemezewa; seyiekoe puo zu krie mezelie, süla seyiekoe nyate.

⁸Babilon-e te mhai tsu zhüte mu biephro phawate; puo la thekrü chücie! Puo rüza pfü la daru se vorlie; puo chü kemenelie rei si lhomu.

⁹Hie we Babilon chü kemeneshütuoü sie zo, derei puo chü kemenelie kenjüte. Puo khawataliecie, sidi kehoupuorei u thuo u ra vota khe; kekreilamonyü puo kepejo kho tei tso bate mu sie teigei tuote.

¹⁰Jihovae hie la chüshütuoü ketuo-u chüshüte; vorlie, uko Zion nu vo di Jihova úko Kepenuopfü mhatho-u pesishü khe.

¹¹Theütsieko chü kemethelie! Theütsie bou nu pelilie! Jihovae Medes kediko nou chüshüte, kekreilamonyü puoe Babilon la lekecüu sü puo pekawaketuou zo, süu Jihova khepuu, rüsuokiu khepu zokecü la.

¹²Babilon dahouko perhietuoü puo pfhelha pesieshülie; rükhouko chü kemeteishülie; rükhoumia bu rüshü uko perhietuoü dojülie; kekreilamonyü Jihovae Babilon nu kelhouko gei chüshüketuo rhülie mu chü phreshüte.

¹³Nie dzü zha phikecü gei lhouketuoko, nie kinyi kekra nyikecüko, n thelau sü vorte, n kelhou kemejü ro-u sü dawate.

¹⁴Krodiko Jihovae puo thuo rüseshü: Ae kuprie kro mhie chüpahi kekra se n ketshu chü tou zotuo, sitse ukoe n mho kuokelie shieshütuo.

¹⁵Puoe puo kekuo üse kijü chüshü, puo mhasi üse chüshü, tsiu puo kesikele pie teiko mhoshülie.

¹⁶Puoe puo pfhe phrakeshü ki teiko gei dzü meleta, tsiu puoe kijü valatsa nu mhoutsa bu khu sietaya. Puo teirü la teikemela chüshü, puoe mhakengupie keba bou nunu teikhrie se par.

¹⁷Themia kehoupuorei melo mu kesikele jü; rükreimia pete puoe rhikeshü terhuorhiko la mengatatuo; kekreilamonyü puoe rhikeshü miarhikoe kemethuo zo, tsiu süko nu keha tuo mo zo.

¹⁸Süko kemethuo zo, u sekecü vie zo; puo siazha khakeshü ki uko kaüjütatuo.

¹⁹Jihova we sümhie mo, Jakob yau we si mo, kekreilamonyü puoe mha pete chükeshüu zo, tsiu Israel-e puo ka seyie zocü la, puo zae krodiko Jihova.

²⁰Noe rüyachü nu a seitau zo, terhü nu a rünyieu; a n ze di seyieko vütshiewaya: a n ze di kedirüvie pekawaya;

²¹a n ze di gura mu puo gei ketuou vüdawaya; a n ze di gura gari mu guragari geiketuou vüdawaya;

²²a n ze di thenumia mu thepfumia vüdawaya; a n ze di phichümia mu nhicumia vüdawaya, a n ze di khriesamia mu thenunuomia vüdawaya;

²³a n ze di kuopfhemia mu uko kuoko vüdawaya, a n ze di lieciemia mu uko kezeko vüdawaya, a n ze di kezhamia mu mha kekhayakezhako vüdawaya.

²⁴Siro ae Babilon mu Chaldian nu kelhou themia pete gei uko nieko mhingu kinu Zion nu mha kesuo chükeshü kheko chüshütuo, Jihova siya.

²⁵A n petsouya, he-i mia pekayakezha kijüthou-u, Jihova sidi puya, puoe kijü pete pekawaya; a dzie yhapie n perhietuo, sidi tsiekrie geinu n phou ketoushütuo, tsiu n chüpie thekewa kijüthou puo chüwatuo.

²⁶N geinu puo ke nu la ketsie yopuorei, mu puo mvüdze tsie yopuorei chülie lho, derei noe kechachie methuo zhütatuo, Jihova siya.

²⁷Kijü nu pfhelha piesieshülie, seyieko donu ketsüu khoushülie; puo ze terhü chüketuo la seyieko kezhulie, puo perhieketuo la kedirüvieko kekieshülie, Ararat, Mini, mu Ashkenaz kie kengulie; puo perhieketuo la kezhamia kedalie, pekrie kuprie tuoi gura ze vorlie.

²⁸Puo perhieketuo la seyieko kezhulie, Medes kediko, uko kezhako mu mha kekhayakezhako sa di, tsiu uko khrükhro keba kijü kehoupuorei.

²⁹Kijüu rüsü khrokhro bate, mu kijüu rüperüle bate, kekreilamonyü Jihovae Babilon petsouketuo rhü baketa la, sidi Babilon kijü chü kemethuowa mu mia puo bu rei lhou motatuo.

³⁰Babilon terhümiavimiako kegeikecü khawate, ukoe uko dahou kemetei nu bate, uko kekuo jüte, ukoe thenumia chüte; uko kebachüko mi pie thewate, uko cakhako bierhuowate.

³¹Dieliemia ta vo kekrei puo ze kesetuoü, mu dieliemia puoe kekreimia puo ze kesetuoü vo, Babilon kediu ki puo nadi tietsa puo nu vo kekreitsa ketso lielieketa thashütuoü di.

³²Dzüpfükecü chüko teliete, mi pie guodzüko thewate, mu puo rüpfhünuoko michie bate.

³³Kekreilamonyü krodiko Jihova, Israel Kepenuopfü hakemhie puya: Babilon nuopfüe shie kemhie puo zo lie nyükecü teiki; sirei puotei huoyo sie lieyie teiu vortuo.

³⁴“Babilon kediu Nebukadrezar-e a mezuliete, puoe a gedawate; puo a chüpie mhabou kemethuo puo chüwa; puoe khunuo kemeriekecü puo tuoi a mezuliete; puoe a vie keviko pie puo vadi ketshu chülie, puo a whuowate.

³⁵A ciechücierhakewau Babilon gei khepuliecie,” idi Zion nu kelhoukoe putuo. “A zie khepu bu Chaldian nu kelhouko gei batacie” idi Jerusalem-e putuo.

³⁶Süla Jihova hakemhie puya: Ae n yalietuo mu n la khepu lieshütuo. ae puo dzükezha bie pesowatuo, mu puo dzüluoko chü pesowatuo.

³⁷Siro Babilon pekapie kepoupfü zhütatuo, meseruko kebachü, mia bu meriekecü mu rütsekecü chü, miapuorei lhou ba moketa chü chütatuo.

³⁸Losha tuoi uko keze mehotuo; ukoe losha nuonuo tuoi ruotuo.

³⁹Ukoe kedzüle keba ki, a zuko keseshütuo, sidi uko die kemezetuo, uko bu mevükhouilie kemochie, süsie uko bu kechachie ze zhütatuo, mu co lasielie lho, Jihova siya.

⁴⁰Ae tekuo ze kedukhri nu kevo tuoi mu temvüko tuoi uko teshü kershütuo.

⁴¹Kimhie di Sheshak lieliete shi, kijü pete mhokuo-u jüte! Kimhie di Babilon-e seyieko mhodzü kemeriecü puo chüte shi!

⁴²Dzükezhau Babilon mho siete, dzürüpfhü puo zepfülie.

⁴³Puo nadiko meriekecü chüte, sotsai mu kijükesia chüte, miapuorei lhou kemo kijü, mu miapuorei süu pfüthe voya mote.

⁴⁴Ae Babilon nunu Bel pechütuo, sidi puo bu mezukelieko melou se la parshütuo. Seyiekoe kru puo ki tsu salie lho, Babilon sozhau mete.

⁴⁵A themiako, puo ki nunu partaliecie! Sidi kehoupuorei Jihova nouyie kemeriekecüu nunu puo kerheiro kelaliecie.

⁴⁶Kijü nu diekrieko sikecü la n melou thachüta morei michieta hie, teicie puo nu diekrie puo vortuo, mu teicie kekrei puo nu die kekrei puo vortuo, kijüu gei kepeka vortuo, mha kekhayakezhamia thuo mha kekhayakezhamia petsoutuo.

⁴⁷Ketho zo, teisozhako vorzhie, a Babilon nu miarhiko gei siazha khakeshü ki; puo kijü pete bu thenga chütuo, tsiu puo dukhrikewako pete te puo donu tsutuo.

⁴⁸Sitse teiko mu kijüu, siro sünu keba pete, u nei di Babilon la chielituo; kekreilamonyü kepekamia pesotsa nu uko petsou vortuo, Jihova sidi puya.

⁴⁹Babilon-e Israel dukhrikewa la tetsu zotuo, kijü pete Babilon la nu siaketa tuoi di.

⁵⁰Nieko zhiecha nunu takelieko, tuoshülie, rüge thata hie! Kijü kepetsera nu Jihova rükra balie, tsiu Jerusalem bu n nou vorlie:

⁵¹Hieko pie thenga nu shüwate, hie kengakeshü pfhe sishüte; thenga hieko zie zepfü bate, Jihova ki kemesa chüko nu solhimia lerketa la.

⁵²Süla puoteiu vorzhü tou zo, Jihova sidi puya, süki ae puo thedzie pie rhikelie miarhiko gei siazha khashütuo, sidi puo kijü pete nu rüza pfükelieko meheimelo zhütatuo.

⁵³Babilon thuo tei meli kho shierei mu puoe puo chü kerükrieko chü kemeteilie zorei, a ki nu kepekamia puo gei vortuo, Jihova siya.

⁵⁴Rünyüshücie! Babilon nunu kekra pfhe! Chaldian kijü nunu tetsu krakecü!

⁵⁵Kekreilamonyü Jihovae Babilon pekapie methuo zhütuoüzhie, puo pfhe chü toutou bebe chü kezhüu bu zeite. Uko pfhephrakoe dzü rüpfhü kesier tuoi zo, sidi uko pfhe phra pfü keza vo.

⁵⁶Kekreilamonyü kepekau puo gei vorte, Babilon petsou di; puo terhümiaviko teliete, uko theüko bietshewate; kekreilamonyü Jihovae u zhakhra chüshüyakezha Kepenuopfü zo, puoe süu zha chü tseishütuo.

⁵⁷Ae puo kezhako mu puo themia mhakesiko bie kemezewatuo, puo ahngko, mha kekhayakezhako mu terhümiaviko rei sa; ukoe kechachie zezhütatuo, co lasierlie lho, kediu siya, puo zae krodiko Jihova.

⁵⁸Krodiko Jihova hai di puya: Babilon dahou kemeyako biepie kijü ze kemezhüwatuo, tsiu puo kharu kerükrieko mi pie thewatuo. Themiako mhachü kemezhie thedo chü, tsiu seyiekoe mi pie thewaketuo puo pie u pelho ketuo zo.

⁵⁹Juda kediu Zedekia puo kedi chükelie cie dia cie, Jeremia siedzekesiu, Babilon nu kele ki, die khapie Seraia, Neria nuou, Mahseia tsuu ki shü. Seraia-e mhakepfhe kezhau.

⁶⁰Siro Jeremia-e mha kesuo Babilon nu vorketuo pete, Babilon kepetsou die hako pete thupie leshü tshü puo nu shülie.

⁶¹Süsie Jeremia Seraia ki, “No Babilon nu kevor ki, die hako pete phrüketuo meholieluo,

⁶²di sie, ‘He-i Jihova, noe thechü hau pekawaketuo, sidi mhapuo bu rei sünu lhoulie kelho, themia rei morei khunuo rei, sidi kechachie methuo zhütaketuo dze pu’ sishülie.

⁶³Sidi no leshütshü hau phrü tseiwa tse, ketsie puo pie süu sa phalie, di kelhoupie Eufrat metsou nu shüwalie,

⁶⁴di sie, ‘Hakemhie di Babilon rületatuo, mu sie lalie lho, a kepeka puo gei se kevorko la’ sishülie” si. Jeremia die ha ketso zo.