Read Angami Naga Jeremia 52 Bible Online

Jeremia 52 - Angami Naga bible

Jeremia 52

¹Zedekia kedi chükelie ki puoe cie mepfüepuota, puoe Jerusalem nu teicie kerepuokrü kedi chü. Puo zuo za Hamutal, Libna-u Jeremia nuopfü.

²Puoe Jehoiakim mhiei Jihova mhodzü mha kesuo ücüko chü.

³Ketho zo, Jerusalem mu Judae Jihova nou bie kemeyiewa di puo mhodzünu nu uko whuowa Zedekia-e Babilon kediu perhie.

⁴Siro puoe kedi chükelie cie thepfü cie, thekhrü ker-u nu, zha ker nhie, Babilon kediu Nebukadrezar puo chüpahi pete ze vor di Jerusalem perhie, sidi ukoe sünu razhü chülie, ukoe dahou chüpie süu houlie.

⁵Süla nadiu whuo zo ba Zedekia kedi cie kerepuokrü tso.

⁶Thekhrü diau nu, zha thepfü nhie, nadiu nu pekrie kriedi vorta, süla kijü süu nu themiako la kecüca ba mota.

⁷Sitse nadiu dahou prota, sidi rüpfhünuo pete tata mu pezeize kediu zie khie ki sozha kenie donu kharu chau ze di tuo prata; Chaldianmia thuo nadiu houpfü ba rei. Sidi ukoe Araba kevatsa vota.

⁸Derei Chaldianmia chüpahikoe kediu whuo zo vo, sidi Jeriko razhau nunu Zedekia tsolie; mu chüpahi pete puo kinu ta cüre tuota, sidi puo khawata.

⁹Sitse uko kediu telie, di puo ze Hamath kijü nu Ribla nu Babilon kediu ki vor, sidi puoe puo dienya kecü.

¹⁰Siro Babilon kediu Zedekia mhingu nunu puo nuoko dukhriwa, siro puoe Ribla nu Juda kezhako pete rei sa dukhriwa.

¹¹Puoe Zedekia mhi nie kerülawa; sidi thegi kedoukecü ro pie puo phalie, mu Babilon kediu puo ze Babilon nu vota, sidi puo siata kemochie puo khapie kedieki nu bawa.

¹²Siro thekhrü pengouu nu, khrü zha ker nhie, süu Babilon kediu Nebukadrezar kedi chükelie cie kerethepfü cie Nebuzaradan, kepfhe kezhau, Babilon kediu lie chüyakezhau, Jerusalem nu vor,

¹³puoe Jihova kiu thewa mu kediu ki, mu Jerusalem ki pete, tsiu kezhamia ki pete mi pie thewa.

¹⁴Sitse Chaldianmia chüpahi pete, kepfhe kezhau ze ketuoko, Jerusalem khieümhou houpfü keba tsiepfheko biemewa.

¹⁵Siro kepfhe kezhau Nebuzaradan-e themia kejüthoko, tsiu nadi nu keba themiako, mu uko kitsatie vor ketako, Babilon kediu ki vor ketako siro themia mhachü kesimiako teze kediechü vota.

¹⁶Derei kepfhe kezhau Nebuzaradan-e mhakejüko huo bu khubebo kemehomia chü, mu lieciemia chütuoü khapie bawa.

¹⁷Siro Jihova kinu merenyi pie kechü coko, mhakhrü kebako, siro Jihova kinu keba merenyi pie kechü dzükezhau, Chaldianmia biephrowa, sidi merenyi süko pete toupfü Babilon nu vota.

¹⁸Ukoe galiko, nyopfhü khouko, mha kebenyako, mhabouko, kecieko, mu merenyi khouko, ruosuo kechü nu seyakezhako chü seta.

¹⁹Siro kepfhe kezhaue chütholi, dzieteikhou, galiko, mu mitubako, kecieko, tehieko, siro mhabouko suna se kechüko rei mu rakachü se kechüko rei setuota.

²⁰Co kenie, dzükezha puo, mhakhrü sekeba khro keba merenyi pie kechü thudo kerekenie, Solomon kediu Jihova kinu chükeshü; mhabouko merenyi pie kechü hako pete mejü hulie kelho chü zo.

²¹Siro coko liro, co puo rükrie-e thu kerethetha, siro mha lhopie süu ketsokecü thu kerekenie süu whi vo; tsiu puo keshüe u dziezhü dia mese, süu puo kicie.

²²Siro merenyi pie kechü co puo süu gei ba, siro co puo puo rükrie thu pengou, coko gei mhakedoukecü mu touraü rhikecü, merenyi pie chü phre di houpfü ba. Co kenieu rei touraü rhikecü hako mhie.

²³Siro tietsa puo turaü hiethepfüesorou mu kedoukecü gei keba turaü rhikecüko lutsahatsa krie puopuo houpfü ba.

²⁴Sitse kepfhe kezhau phichü kezhatho-u Seraia, mu phichü kezha süsieso-u Zefania, tsiu kikha kepfhe mia seko zelie;

²⁵mu puoe nadiu nunu iunok mia puo, terhü themia seyakezha; siro kediu kehou nu mia thenie nadiu nunu ngukelieko; siro rüpfhünuoko donu leshükesitho-u kijü nu themiako phrüyakezhau; mu kijü nu themia hiesorou nadiu nu ngukelieko zelie.

²⁶Sidi kepfhe kezhau Nebuzaradan-e süko zelie di uko ze Ribla nu kediu ki vor.

²⁷Sitse Babilon kediu uko biewa di Hamath kijü nu Ribla nunu uko bu siata. Sidi Judae puo thuo puo kijü nunu teze kedie chü vota.

²⁸Nebukadrezar-e teze kedie chü voketa themia hade: teicie thenie cie Judamia nyie se di mepfüese,

²⁹cie kerethetha cie Nebukadrezar-e Jerusalem nunu mia krie thetha di serekenie teze kedie chü vota.

³⁰Nebukadrezar dikelie cie mepfüese cie kepfhe kezhau Nebuzaradan-e Judamia krie thenie di hiediaepengou teze kedie chü vota; themia pete kesa nyie dia di krie sorou.

³¹Juda kediu Jehoiakin kedie chüketa cie serethenie cie khrü kerekenieu khrü zha mepfüepengou nhie, Babilon kediu Evil-merodak, puoe dikelie cie thenie ki, Juda kediu Jehoiakim gei tseiüvikecü thashü, sidi kedieki nunu puo ze parwa;

³²siro menuo di puo rüchü, sidi puo bu Babilon nu puo ze dikeba kedi kekreiko mho bata.

³³Süla Jehoiakin-e puo kedie pfheneiko kediwa, sidi puo kerhei chie teisonhie kediu ze mhacümhakrie sei bata.

³⁴Puo se morokesuo la, Babilon kediu kinu teisonhie se morokesuoko khashü puo tsü sei zo, puo kerhei chie, vo puo se ketso, teisonhie puoya khashü seiya.