Read Angami Naga Jeremia 6 Bible Online

Jeremia 6 - Angami Naga bible

Jeremia 6

¹He-i Benjamin nuonuoko, kelalieketuo la Jerusalem nunu tatalie! Sidi Tekoa nunu ketsüu khoushülie, mu Beth-hakerem nu zasiu piesieshülie; kekreilamonyü mha kesuo mu kepeka kemeriekecü pesotsa nu partatie.

²Ae Zion nuopfü pie nha kepejo kezivithopfü puo ze kemejüshü.[12]

³Kuopfheko u kuokro ze vor di puo petsoutuo. Ukoe u pfhekiko pethoupie puo houlietuo; uko mia puopuokecü puo chü nunu mhacütuo.

⁴“Puo ze terhü chütuoü dojülie; sielie, sidi úko khinhie gei vo puo re khe!” “Úko we ce chülietie! kekreilamonyü teisozhau votazhie, tsiu teizei khrüu chü pechaliete!”

⁵“Sielie, sidi úko pezei ze vo puo perhie khe, tsiu puo kedikiko peka khe!”

⁶Krodiko, Jihova hakemhie puyacü la; puo seiboko wilie; sidi Jerusalem kepetsou dahouu chücie. Siazha pie tsü morosuokeba nadi hau zo;[13] puo donu mha pesekecü sie mha kekrei puorei ba sa mo.

⁷Dzükhou nu dzü bu rheirhiepfü bayakezha tuoi, puoe puo kesuo kechüko rheirhiepfü baya; mia pekakecü mu mha biepesuokecü pfhe puo nou nu si; kesuokenyü mu rüzapfü a mhodzü ki ba seite.

⁸He-i Jerusalem, pethapfüliecie, moro a nyieta di n kinu rüreitatuo, mu n chü kemethuowatuo, sidi mha lhoulie kemo kijü chüwatuo.

⁹Krodiko Jihova hakemhie puya: Israel lhie se kebako khube tuoi bie kemesa mpouwatuo;[14] khubesi papie mekho nu shülieyakezhako tuoi, n dzie kerei la pie puo coko gei chücie.

¹⁰Suomia ki, rünyülieketuo la a diepu, tsiu kemichie vorkezhü dze pushütuo ga? Harie, uko nyietoe puo ki cie mo,[15] ukoe rünyülieya mo. Jihova die-e uko la krekenyü vie puo uko sünu u neilie mo.

¹¹Derei a gei Jihova noupfhüu tshu bate; ae süu pukecü la a nyiete. Süu rupie chanu keba nuonuoko gei shücie, mu khriesamia vo kengukebako gei rei shüwacie; siro thenu thepfu tsiu ketsamia tsatoketako sa di zetatuo.

¹²Uko kiko pie mia kekreimia tsüwatuo, uko lieko mu uko kimianuoko rei sa di; kekreilamonyü a dzie yhapie kijüu lhoukebako gei shütuo, Jihova sikecü puya.

¹³Kekreilamonyü kecütho nunu vo kezhatho ketso, pete rei mha mehou di puotou kemo nunu ngukelie le; siedzekesiu nunu vo zievo-u ketso, pete rei meda di mhachü phre.

¹⁴Ukoe, “Vitho, vitho” isikecü pu, vitho tuo mo zorei, sidi a themiako rüzako theke menuoshü mote.

¹⁵Uko thengatho chü, ukoe kerütsekecüko chü; sirei ukoe mengalie mo, mu uko zie merie reilie mo. Süla ukoe tetsuketako ze di tetsutatuo; a uko pechükeshü ki, uko kelhouwatuo, Jihova sidi puya.

¹⁶Jihova hakemhie puya: Nieko cha dzako nu tha di, mehoshücie, sidi thiedzü chako ketsocie, cha kevi kezhü ra; sidi sünu tuo volie, sitse nie ruopfü la, kerülei ngulietuo. Derei ukoe sie, “Hie sünu tuo lho!” sita.

¹⁷Sizomoü a n la kepfhemia pesieshü: “Ketsü kekhou pfhe rünyücie!” si. Derei uko sie, “Hie rünyü lho” sita.

¹⁸Süla rünyülie, he-i seyieko, mu siliecie, he-i kehouko, uko gei kikecüpuo chüshütie shi.

¹⁹Rünyülie, he-i kijüu; ae mha kesuo se themia hako gei vorshütuoüzhie, uko mharhü siko, kekreilamonyü uko a die rünyü mvü; mu a pethakeshüko, ukoe meliewate.

²⁰Kedipuo la üdi Sheba nunu mhare kethengu se a ki vor, morei kijü kepetse ra nu mhare kevi vor ga? Nie kethe ruosuoko lielie kenjü, morei nie ruosuoko a neilie mote.

²¹Süla Jihova puya: Harie, a themia mhodzünu thephi kemesü tsie khapie zhü ho, puo krü rei puo nuo rei sa di süko gei tetsutuo, u siezanuomia tsiu puo khriethomia kaüjütatuo.

²²Jihova hakemhie puya: Harie, kijü pesotsanu themia kro puo vorzhie, siro kijü kepecie nunu seyie kezha puo siertuo.

²³Ukoe theü mu rüngou se tuo, uko zho suo, mu mia ngumezhieya mo, uko pfhe-e dzükezha rüpfhü kemhie; uko gura gei tuoya, terhümiavimia terhü la dojü seketuo tuoi, di n perhie tuo, he-i Zion nuopfü!

²⁴“Hie uko dze site, hie dzie thachüte; thenoukemezhiekecü hie gei vor, thenumia nuonuo vachü ki kemezhiekecü mhie di kemezhie.

²⁵Lie nu tuo hie, morei cha nu tuo hie; kekreilamonyü ngumvümia zhiecha setuo, tsiu lutsahatsa pete nu kemichie bate.”

²⁶He-i, a themia mhakejüko, gakhropfhe seliecie, mu mige nunu n kephrelie; kralie, nuo puo zokecüu la kekra tuoi, thekrü chü kemerieliecie; kekreilamonyü kepekamia mhai uko gei vortuo.

²⁷A n chüpie themiako donu kedojüu mu chü kemesayakezhau chüshü, süusü n bu uko mhatho silie tsiu kevikesuo dojüketuo la.

²⁸Uko pete rei mia perhie kemerie chütuoyakezhamia phre, sieüchü di tuoya, ukoe merenyi tsiu thegi zo; uko mha kesuo kechümia phre.

²⁹Mimhepou mhe kemeriechüshü, miu nunu guli thewate; süu thepekru thedochü, kekreilamonyü kelhiecümia chüwa mote.

³⁰Mia üse, “Meliekewa rakachü” üdi kie, Jihova uko meliewaketa la.