Read Angami Naga Jeremia 7 Bible Online

Jeremia 7 - Angami Naga bible

Jeremia 7

¹Jihova die Jeremia ki kevor:

²Jihova kiu care nu thalie, sidi die hau pie shieshülie, sidi sie, Nie Juda peteko, care hako nunu Jihova rüsuotuoü di leyakezha khe, nie Jihova die rünyüliecie.

³Krodiko Jihova, Israel Kepenuopfüe hakemhie puya: Nie zhoko mu nie thoko nunu rüdiliecie, sitse a nie bu thechü hau nu lhou balietuo.

⁴Nie kemeda die: “Haue Jihova rüsuokiu, Jihova rüsuokiu, Jihova rüsuokiu” icüko peleta hie.

⁵Kekreilamonyü niekoe nie zhoko mu nie mhathoko chü kemezhü lalie mu nie mia puoe mia puo ze mezhü lalie liro,

⁶solhimia, merünuomia, samimia morei kejokejümia zie thechü hau nunu pekru molie mu nie thuo kemezhietuoü di terhuo kekrei siemedzita molie liro,

⁷a nieko bu thechü hau, a pie nie puonuoko bu telhekechachie lhoutuoü di tsükeshü kijüu nu balietuo.

⁸Harie, niekoe kemeda die, kemevi kejü dieko pele tuote.

⁹Nie mharügou, miadukhri, mu pieü chü, tsiu tijü di rüse, mu mhare kethengu thepie Baal tsü, mu nieko sikemo rhuo kekreiko siemedzi,

¹⁰Sidi ki hau nu a za kieyakezhau nu a mhodzü ki vor thalie di sie, “Hie kelaliete,” iya, sidi mha kerütsekecü hakoha chütuo zotieya me?

¹¹Ki hauha, a za nunu kieyakezhau, nieko mhingu ki mia viesekecümia bou chüte me? Nieko siba, a rei mehoba we, Jihova sikecü puya.

¹²Nieko vo Shilo nu a ba mehocie, a sünu a za khapie ba kerietho chü, sidi a themia Israel kerüge kerüzhü la a süu gei kedipuo chüshü shiü mehoshücie.

¹³Siro tsie, nie mhatho hako pete chükecü la Jihova siya, a nie ki pu tha zo, derei nie rünyü mote, mu a nie kekie ki, nieko a pfhekho mote.

¹⁴Süla a ki hau, a za nunu kieyakezhau, nieko peleyakezhau, tsiu a khapie nieko mu nie puonuoko ketsü thechüu, ae Shilo nu chükeshüu kemhiewatatuo.

¹⁵Sidi a mhingu kinu nieko kelhouwatuo, ae nie siezedzürieko, Efraim yie pete khawakecü mhiewatuo.

¹⁶Süla no we themia hako la kecha chü hie, uko sounu n pfhe phra morei cha hie, tsiu a ki n mezhiemelo hie, a n pfhe rünyülie lhokecü la.

¹⁷Ukoe Juda nadiko nu mu Jerusalem chaüko nu kedipuo chüshü ba shi no nguya moü me?

¹⁸U nuonuokoe sei pfhü kengushüya, sidi u puonuoko mi chü petushüya, tsiu thenuko niekhrüda nelie, sidi pie teigeiketuo kedipfü tsütuoü tsiu kekrie ruosuo perupie terhuo kekrei tsütuoü di a nou chü kemeyietuoüya.

¹⁹Ukoe a nou chü kemeyieya me? Jihova sikecü puya. Ukoe uko thuo uko nou chü kemezhielieta moü me?

²⁰Süla Jihova hakemhie puya: A neikemo mu a nouyie rupie thechü hau nu, themia gei, khunuo gei, tsiu lie nu seiboko gei, mu kijüu nunu lhou keparko geishütuo; süu thetuo tsiu tshülie lho.

²¹Krodiko Jihova Israel Kepenuopfü hakemhie puya: Nie kethe ruosuo pie nie rüsuokechüko sa kesawalie, sidi puochü cülie.

²²Kekreilamonyü a nie puonuoko Ijipt kijü nunu ze kepar nhie, kethe ruosuo dze morei rüsuo chükecü dze uko ki pu mo, morei chünu di diekhashü mo zo.

²³Derei ae die hau, khapie uko ki shü, “A pfhe zelie, sitse a nieko Kepenuopfü chütuo, tsiu niekoe a themia chütuo, siro a nie bu chünu di khakeshü zhoko rübei nu tuolie, sitse nieko la vilietuo.”

²⁴Derei ukoe rünyülie mote, morei uko nyieto kereilie mo, derei uko noule kesuo kekhrüu se di u thuo medokelieu nu tuo, sidi tsiesie miemie voketau sie pedzü volie mo.

²⁵Nieko puonuoko Ijipt kijü nunu parkelie teiso yawinu vor thie ketso, a a kituo siedzekesimiako pete ketsepie uko ki shü zo, puo sie puopuo idi,

²⁶Sirei ukoe a pfhe rünyü mo, morei uko nyieto kereishü mo, derei uko vo meteithor. Ukoe uko puonuoko ki rei suokuokecü chüta.

²⁷Süla no die hako pete pie uko ki pushülie, derei ukoe n pfhe rünyülie lho. No uko kietuo, derei uko n pfhekho lho.

²⁸Noe uko ki putuo; seyie hauha uko Kepenuopfü Jihova pfhe zeya mo, mu pethakeshü lielieya mo; ketho-u tuo mote; süu uko tie nunu jüte.

²⁹N tsütha dawalie di süu kelhouwacie; thechü kerükrie[16] geinu thekrü chücie, kekreilamonyü Jihovae puo nou bie kerüpekeshü seyieko meliewa tsiu khawate.

³⁰Kekreilamonyü Juda themiae a mhingu kinu mha kesuo chü, Jihovae sidi puya; ukoe a za nunu kieyakezha kiu nu uko vie kerütsekecüko khapie ba, sidi süu perhuwa.

³¹Siro ukoe Tofet thechü kerükrieu[17] chü zhü zo, süu Hinnom nuou razha nu ba, uko nuonuo thepfumia mu thenumia mi nunu thetuoü di, süu ae uko bu chünushü mo, morei a noule rei mo.

³²Süla, teisozha vorzhie, Jihova siya, süu üse Tofet üdi kie salie lho, morei Hinnom nuou razha ülie lho, derei Kedukhri razhau üdi kietuo; kekreilamonyü ukoe Tofet nunu mia khrutuo, thechü ba sa mota kemochie si ba zotuo.

³³Themia hako kesiamo pie tei rako tsiu kijüu nu khunuoko vachütuo; sidi miapuorei süko kechü peta lho.

³⁴Sitse ae Juda nadiko nu, mu Jerusalem chaüko nu, thenou kemvü pfhe, mu kenei pfhe, yasau pfhe, mu yasapfü pfhe bu ba sa motatuo, kekreilamonyü kijüu kemethuo chütatuo.