Read Angami Naga Jeremia 9 Bible Online

Jeremia 9 - Angami Naga bible

Jeremia 9

¹He-i a tsüe dzüluo chü, tsiu a mhi-e mhidzü rü chüücü we, a teisoteizei a themia kejüko mia u dukhrikewako la kralietuomu ru!

²He-i kijükesia nu rüvemia la pru puo baücü we, a themia khawa di süko kinu tuotatuo mu ru! Kekreilamonyü uko pete rei pieü kechümia, kelhiekecü kro-u zo.

³Ukoe theü tuoi u meü kekhrelieya; ukoe kijüu nu kethotsa mo di, kesuo kechütsa meteilie; kekreilamonyü ukoe kesuo kechü sie chütuoya, sidi uko a siya mo, Jihova siya.

⁴Nie zanuomia kinu menuolie, mu nie seyiemia[19] puorei pele hie; nie seyiemia[20] pete mhasekedoyakezhamia phrecü la, tsiu zanuo pete rei mia pejoyakecümia mhie tuoya.

⁵Uko pete rei u zanuomia sekedoya, sidi miapuorei ketho-u puya mo; uko meü pie kemeda putuoü pethapfüliete; ukoe kephouma chü tsiu thenoukedituoücü mecüthor.

⁶Mia pesekecü sie pese, mhasekedokecü[21] sie kedo! Ukoe silie mvüte, Jihova siya.

⁷Süla krodiko Jihova hamhiekecü puya: A tsie uko ketso kemesa di uko dojütuo, kekreilamonyü a themia kephoumako[22] la kedipuo chü sa ta?

⁸Uko meüe theü ciekeshü tuoi; u me nunu kemeda pu par. Uko pete rei u zanuou ki we khrietho die pu, derei thenoutsa we kebie pethoupie mawatuoü rhü tuoya.

⁹Mha hako la a siazha pie uko tsü zhü moü me? Jihova siya; tsiu seyie haikecümia gei a khepukecü mese moü me?

¹⁰Kijüthouko la kra mu thekrü chücie, tsiu rayhanu nha kepejoko la thekrü chücie, kekreilamonyü süko vawatuo miapuorei süko pfüthe volie lho, siro periko mokecü pfhe rei silie lho; teirako tsiu khunuoko tate, di tuo mote.

¹¹A Jerusalem pekapie puo bu puo kro chü pfü zhütuo, meseru ki chüwatuo; tsiu Juda rünako chü kemethuowatuo themia puo rei lhou motatuo.

¹²Supuonie mhasi di hau ca silie vi ba ga? Jihova tie puo ki pukeshü themiau supuo ba di süko pesishülie vi ba ga? Kiüdi kijüu pekawa mu chükemethuo pie rayha mhie miapuorei bu süu pfüthe vo mota ga?

¹³Siro Jihova pukecü: Kekreilamonyü a thezho khapie uko mhodzünu keshüu ukoe khawate, sidi a pfhe ze mo, morei sünu tuolie mote,

¹⁴derei uko nou kekhrü la u puonuoko u pethakeshü mhie u thuo u noudo tsiu Baal sie medzi tuote.

¹⁵Süla krodiko Jihova Israel Kepenuopfü hakemhie puya. A ciena pie themia hako vachütuo, tsiu therei dzü pie uko bu krietuo.

¹⁶A uko kezapie pelekemoko, uko rei uko puonuoko rei sikemo seyieko donu shüwatuo; tsiu a uko pekawa kemochie zhiecha ketsepie uko whuotuo.

¹⁷Krodiko Jihova hakemhie puya: Mhaleshücie, sidi thenupfüko kie ze vorlie; thekrü chü ketuo la, thenupfümia thekrü chü kesiko ze vorlieketuo la mia ketseshücie;

¹⁸Uko bu rükri sie u la thekrü chüshülie, sitse mhidzü kru u mhi nu tsurlietuo, tsiu u mhinhe gei dzü kru tsurlietuo.

¹⁹Kekreilamonyü Zion gei thekrü kechü pfhe puo site; “Kimhie di u pekawate shi! U bie kethenga tseiwate, kekreilamonyü hie kijüu khawaketa la, kekreilamonyü ukoe hie lhoukeba chüko vawate” si.

²⁰He-i thenupfüko, rünyüliecie, Jihova dieu, tsiu nie nyie pie puo tie nu dieko rünyüliecie; nie nuopfüko ki thekrü kechü pethashülie, tsiu mia puopuokecü thekrü kechü pie puo zanuomia pethashülie.

²¹“Kesiae vor u khirkiko tso bate, süu u kedikiko nu lerte, chaüko nunu nhicuko dukhriwatuoü, tsiu ziekeko nunu khriekesako dukhriwatuoü di,”

²²Pushülie! Jihova hakemhie puya; “Kesia mo zorei thubuo tuoi phouyo nu tuoi zhütatuo, liekeremia sie lhakhro tuoitatuo, tsiu miapuorei uko chü kengulie lho” siya.

²³Jihova hakemhie puya: Mhakesimia bu puo mhasi la kemiako hie, kekuomia bu puo kekuo la kemiako hie; kenyimia bu puo kinyi la kemiako hie;

²⁴derei kemiakokezhau bu hau nu kemiakoliecie, süusü puo a dze si mu a sikecü nunu lie, ae Jihova, ae kijüu gei rüdirüliya kemo kekhrie se mia khrieya, kethoca, tsiu kemezhüu chüya, a hako nu a neiyacü la, Jihova sikecü puya.

²⁵Teisozhau vor tou zotuo, Jihova siya, süu ae u zhü kereko rübei mehotuo;

²⁶Ijipt, Juda, Edom, Ammonko, Moab, tsiu vo ketsekethou kijükesia nu ketuoko. Kekreilamonyü seyie hako pete u zhürekemo mia, tsiu Israel kinuko pete u melou nu u zhüreliekemomia zo.