Read Angami Naga Thekrü 1 Bible Online

Thekrü 1 - Angami Naga bible

Thekrü 1

¹Kiüdi themia ketshu chüpfü keba nadiu nu themia tuo mote shi! Kiüdi puo bu samipfü tuoite shi! Puoe seyieko donu kezhau chü! Puoe kedirüvieko donu kedipfü chü ba ru kituomia chüte.

²Puoe theva gei kra phi baya, puo mhidzü puo dzo kerhiekerho pfü di, Puo kekhrieko donu miapuorei puo nou thupeluoketuo ba mo. Puo zemia pete rei puo gei kelhie, ukoe puo ngumvümia chüte.

³Judae kemezhie mu miakhro leta di mia die chü vote; puo tsie seyieko donu tuote, sidi kerülei chü puorei ngulie mo; puo kemezhie keba donu rei puo whuoketuomia puo houliete.

⁴Zion nu kevo chako thekrü chü, miapuorei thenyiko nu vor mote, puo kharuko pete methuote, puo zievoko meheimelo bate; puo rüüko kra bate, mu puo kemezhiekecü nu bate.

⁵Puo peseyakezhamia bu puo niepumia chüte, puo ngumvümia vikehie siete, Jihova puo bu kemezhielie, puo kephouma kekra baketa la; puo nuonuoko ngumvümia mhodzü kedie chü vote.

⁶Zion nuopfü zivi pete puo ki nu tuote. Puo kedimia nuonuokoe tekhra nha pfhü pejüketuo mhiete; ukoe u kekuo jü di u whuoketuomia mhodzü tatuote.

⁷Jerusalem-e mia puo kepese teiki, tsiu rühouketuo tei ki, puoe thiedzü mha u kenei ngukecüko rükralie. Puo themiako ngumvümia dzienu leketa ki, mu miapuorei puo kekhruohi tuo moketa ki, puo ngumvümiae puo meho di puo kekrü kreta.

⁸Jerusalem phoumathorwata zo, süla puoe mia krenyü chüte; puo rhuyakezha pete puo rütsete, kekreilamonyü uko puo kemethuo nguketa la; puo puo thuo rei meheimelo, sidi puo zie kereiliete.

⁹Puo kerhue puo chiecha nu tuote; puoe puo siedze la mhapuorei le mo; puo tetsuketae kemerie zo, miapuorei puo nou thupeluokecü jü. “He-i Jihova, a kemezhiekecü mehoshücie, kekreilamonyü ngumvümia kuoliete!”

¹⁰Ngumvümia dzie yhapie puo vie puoma kere pete mho geishüte; puoe seyieko puo kemesachüu nu whuo leketa rei ngute, noe u bu n kehou nu lelie suo üdi pukeshüko.

¹¹Puo themia pete niekhrüda pfhü meheimelo bate; ukoe u kekuo chü kemeteilietuoükecü la, uko kinyiko se thelhi chü di kecüca pfhü. Mehoshücie, he-i Jihova, sidi leshücie, ae kidepuo mhacümhatho kemomia chüte shicü.

¹²Nieko pfüthe vokecü mhapuorei mo zo me? Mehoshücie sidi leshücie, a nousuo mhiekecü thenoukesuo huo ba me, süu a gei vorte, Jihova puo nei mo pie kemerie chüketa nhie hai di kemezhiekecü pie a gei shüwaketa la.

¹³Pesogei nu puoe mi ketseshü; süue a ruko nu leta; puoe a phi la dorü kelhashü; puo a teshü pesie vote; puo a kedethe pie, teisozha pete a bu phisiate.

¹⁴A kephoumako phapie vocie puo chüshü; puo dzie thuo süko pha kesaliete; süko pie a vo gei shüshü, a kekuo jüte; Niepuu a khapie a uko ze thalie kenjü zokecüko tsüwate.

¹⁵Jihova a khieki nu a terhümiavimia pete meliewate; puoe a khriesako bie pejüwatuoü di teisozha puo chiepie a petsoute; Niepuue khubedzü kethe bounu tuoi, Juda nuo rüü phousepfü kedewate.

¹⁶Mha hako la a kra; a mhi nu mhidzü kru tsur; kekreilamonyü thukepeluou a ki nu peciete, a kekuo chü perheishükezhau rei; a nuonuoko u dzükezei chü bate, ngumvümia kuolietakecü la.

¹⁷Zion-e puo dzie yhashü, derei miapuorei puo nou thupeluokeshü jü; Jihovae Jakob petsoulie nu diekhashü, puo siezanuomia bu puo ngumvümia chütaketuo la; Jerusalem-e süko donu mhakerhu puo chü bate.

¹⁸Jihova mezhü zo, kekreilamonyü ae puo die petsoute; derei rünyüliecie, nie themia pete, a rüünuoko mu khriesako mia die chü vote.

¹⁹A a neimiako kieshü derei uko a sewate; a zievoko mu phichümiako, uko kekuo chü penyilietuoü di, uko kecüca pfhüketuo ki nu nadiu nunu kate.

²⁰Harie, he-i Jihova, a kiderei kemezhie bate mu; a va chü bate, a nounu a melou ciethewate, kekreilamonyü a suothor tuota zo. Cha nu liro zhiecha la thenousuo; kinu liro kesia kemhie zo.

²¹Ukoe a kidepuo meheimelo ba shi sishüte, miapuorei a nou thukepeluo jü. A ngumvümia pete a kemezhie keba sishü, ukoe no süu chükeshü la uko nei bate. No shiekeshü teisozhau se vorshücie, sidi uko bu a kemhietacie.

²²Uko kerügekerüzhü pete bu n mhodzü vorlie; sidi a kephouma peteko la, no a gei chükeshü tuoi, uko gei rei chüshücie; kekreilamonyü a meheimelothor bate, mu a melou nu a phisiate.