Read Angami Naga Thekrü 2 Bible Online

Thekrü 2 - Angami Naga bible

Thekrü 2

¹Kimhie di Niepuue puo nouyieu pie Zion nuopfü chü kemengashü shi! Puoe teigei nu Israel ziviu chü kelhoupie kijü shüwate; puoe puo nou meyiekelie nhie puo phi khrau rükra mote.

²Niepuue pete ngumezhie moto zo di Jakob kelhou chüko pekawate; puoe puo nou kemeyie geinu Juda nuopfü dahou kemeteiu biemewate; kedirüvie mu süko kezhako bie kezhasewate.

³Puoe puo nei mo seketa geinu Israel kekuou dathewate; puoe ngumvümia mhodzünu nu puo dzie puo zatsa teshüliete; sidi puoe miü tuoikecü pie Jakob thewate, süue puo khie keba lutsahatsa thewate.

⁴Puoe ngumvümia puo tuoi puo theü gase bate, ngumvümia puo tuoi puo dzie puo zatsa dojü se thate; puoe Zionnuopfü pfhekiu nu keba, hie u la kemiakoyakezha kheko dukhriwate; puoe puo nouyie mi kemhie rushüte.

⁵Niepuue ngumvümia puo tuoite, sidi Israel pekawate. Puoe uko kedikiko pete pekawate, tsiu uko dahou kemeteiko ruo zhüte, sidi Juda nuopfü nousuo mu thekrü kechü chü pekrashüte.

⁶Puoe puo rüsuokiu tezie puo tuoi bierhuowate, puoe puo pfhekiu bie pesuowate; Jihovae Zion nu thenyiko tsiu sabat-u khawate, tsiu puo nou meyiethorkecü nunu kediu mu zievo-u rei meliewate.

⁷Niepuue puo ruosuobau thiwate, puoe puo kemesachüu meliewate; puoe puo kediki dahouko pie ngumvümia dzienu shüwate; thenyi puo nhie tuoi Jihova kiu bouübite.

⁸Jihovae Zion nuopfü dahou bie pesuoketuo rhüliete; puoe therie puo rhieshüte; puo mhakepeka nunu puo dzie ketheshü mote; puoe kuda tsiu dahouko bu kra khouite; uko kemezhie zhüte.

⁹Puo kharuko kijü tsute; puoe puo roko peka tsiu bietshebietshawate; puo kediu tsiu kedimia nuonuokoe seyieko donu ba; chatha ba sa mote, tsiu puo siedzekesiko Jihova ki nunu ziemho ngu sa mote.

¹⁰Zion nuopfü pehüko kemekrie di kijü bate; ukoe nyophe kelhoupie uko tsü geishü, mu gakhropfhe dzie bate. Jerusalem rüüko u tsü pesupie kijü tsu tuote.

¹¹A krakecü la a mhi meziete; a va chü bate; a se a rie kerülapie kijü shüwate, a themiako pekawaketa la, kekreilamonyü nhicuko tsiu kenunuoko nadiu chaüko nu phisia zhüketa la.

¹²Ukoe sie uko zuonuoko ki, “Niekhrüda mu khubezu kirapuo ba ga?” iya. Ukoe nadiu chaüko nunu rüzakeliemia mhie phisia zhüte, ukoe u zuonuo merü geinu u kelhou voketa ki.

¹³A n la mha kikecüpuo pulietuo mu? N pupie kedipuo mejütuo ga? He-i Jerusalem nuopfü. N khapie kedipuo mhieütuo ga? N nou thupeluoketuo la, he-i, Zion nuo phousepfü. Kekreilamonyü n pekakewae zhapie dzükezha mhiete; supuonie n chü keshürho lalie ta?

¹⁴N siedzekesikoe n la kemeda mu miasekedokecü ziemho ngushüte. Ukoe mia die chüketuo nu kela lalieketuo la, n kephoumau hielashü mote, derei n la kemeda mu chatha kekrükecü die pukeshü ngu.

¹⁵N pfüthe kevoko pete u dzie dziedapie n kiete; ukoe Jerusalem nuopfü pese tsiu u tsü kege di sie: “Nadi hau üse, zivi tsei zokecüu, kijü pete keneiu üdi kieyakecüu me?” si.

¹⁶N ngumvümia pete u tie tiehiepie n petsou; uko n pese tsiu u hu thegeipie tuote, ukoe sie, “Hieko puo mezuliete! He-i, hieko merüketuo teisozhau sü haha tou zo; tsiewe hie süu ngushüte!” isiya.

¹⁷Jihova chüketuou chüwate, puo kepechüu se vorshüte; puoe thiedzütho pupieketuou, ngumezhie moto di pekawate; puo ngumvümia bu n gei u neikecüu chüshüte, tsiu n ngumvümia kekuo chü pezhashüte.

¹⁸Niepuu ki shie petoshülie![1] He-i Zion nuopfü dahou-u! Teiso gei tsiu teizei gei n mhidzü bu kerü puo tuoi kru tsuliecie! Rüleita hie, mu n mhi bu mele mo bata hie!

¹⁹Sielie, theva gei krashülie, rükhou therie nunu sede di! Dzü kemhie di n nou rupie Niepuu mhodzünu shülie! N nuonuoko chaü pete nu merü di phisia zhüketako kerheiro la n dzie yhapie puo ki shülie.

²⁰He-i Jihova, mehoshücie, sidi leshücie! Supuo gei hau chüshü ga? Thenupfümia bu u geinu kepar, u penuokeshü nuonuoko cütieya me? Niepuue kemesachüu nunu zievomia, mu siedzekesimia dukhriwatuo me?

²¹Nhicumia mu phichümia chaüko nu tetsu zhüte; a rüüko mu a khriesako, zhiecha geinu tetsute; no n nou meyieketa nhie uko dukhriwate, ngumezhie moto di dukhriwate.

²²Noe thenyi teinhie kemhie, lutsahatsa nu a ngumvümiako kieshüte; tsiu Jihova puo nou meyiekelie nhie, miapuorei talie lho morei rhei balie lho; ae meho mu theke se sierkecüko a ngumvümia thuo pekawate.