Read Angami Naga Thekrü 3 Bible Online

Thekrü 3 - Angami Naga bible

Thekrü 3

¹Ae Kepenuopfü nouyie theu geinu, kemezhiekecü ngukecü themiau zo;

²puoe a chatha ze zeibouikecü kezie puorei bakemo nu vorshü;

³puo a rübei petsou di puo dzie yhashü teisozha pete si sei ba tsote.

⁴Puoe a chü tsiu a zhü bu wetoite; tsiu a ruko bietshebietshawate;

⁵puoe mhakepfhü tsiu kemezhiekecü bu a petsou mu a houpfüliete;

⁶puoe a bu kezei nu bate, thiedzütho siaketamia tuoi.

⁷puoe a cakha pie a boliete, a talie kenjüte; puoe thegi ro mesi sekecü puo pie a phaliete,

⁸a kekhruohi cha shiekhouishü zorei, puo a kecha khawate;

⁹puoe radatsie pie a chako khawate; puoe a cha chü kerüwiwate.

¹⁰Puoe thega puo tuoi a pfhe zhüte, losha puo rüshü kezhü tuoi;

¹¹puo a ze chakhie vo di a ciechü cierhawate; puoe a chüpie a bu a dzükezei chüte.

¹²puoe theü gapie bate, tsiu a pie kedzieguowate.

¹³Puoe puo theütsiebou nunu theütsieu ciepie a kevi nu vawate.

¹⁴Ae a themia peteko krenyü chüte, zhate uko thekre tsaliuta zo.

¹⁵Puoe mhakepfhü pie a ketshu chüwate, puo a bu ciena krie di mezete.

¹⁶Puoe a bu a hu pie ketsie tsiesenuo ta, mu a bu mige nu rüphre;

¹⁷a ruopfüe noune jüte, kenei sü kedipuo shi ae rükra mote;

¹⁸süla ae sie, “A zayieu tuo mote, tsiu Jihova gei kemerü tuo mote” ibate.

¹⁹A kemezhiekecü mu a kiükru jüketa lekeshüe, ciena mu chüthesie mhie zo!

²⁰A ruopfüe süu rükra sei di, a nounu rünuo kete.

²¹Derei hau a sie le vorlie, di a kemerü nyilie.

²²Jihova kekhrie rüdirüli kemoe mhakipuorei jütaya mo,[2] puo u ngukemezhie puo thela jü.

²³Süko teisoduü kesa sei baya; n kedietho zha zalie.

²⁴“Jihova sü a yau zo” a ruopfüe siya, “Süla a bu puo khre merü batuo.”

²⁵Jihovae puo pfhe bayakezhamia gei tseiüvi, mu ruopfü puo mengu bayakezhau gei tseiüvishüya.

²⁶Mia puoe zei di Jihova kelakelieu pfhe bakelie-e vi.

²⁷Mia puoe puo khriesarüü ki, vocieu pfükelie-e vi.

²⁸Kemekrie di Niepuu u pie dakeshüu pfükelie,

²⁹u tie pfü tsu nyophe nu zhüketau rei, (sita zorei u kemerü ba zo),

³⁰u dzo kereipie u kevümia tsüshü, mu u pesekecü pie u tshupfülie rei,

³¹kekreilamonyü Niepu-ue kechachie u khawalie lho.

³²Puoe thenoukesuo khashü zorei, puoe ngukemezhie kra phikecü kize u ngumezhieshütuo;

³³kekreilamonyü puoe puoneipuonyü chü di, themianuo pechüpenyü morei u nou chü pesuoya mocü la.

³⁴Kijü nu kediemia pete, mia phi khro nu kedewacü ki,

³⁵Kuokejokejüu mhingu ki nu themia ketho mezhüu bie kedikewa ki,

³⁶mia puo mezhü biekerüwikewa ki, Niepu-u süu ngu lhoü me?

³⁷Mhanuü Niepu-ue süu chüshü mo üro, supuonie süu pushü mu chüshülie vi ga?

³⁸Keviu rei kesuou rei, Kuokejokejüu me nunu par moü me?

³⁹Themia u keha kenyi supuonie phouma la siazha ngukelieki, panyalie vi ga?

⁴⁰Úko úko chako kimhie ba shiü mehoshü khe, sidi rürei Jihova ki la vor khe.

⁴¹Úko u melou mu u dzie yhapie teigei Ukepenuopfü ki shülie khe.

⁴²We phoumawa tsiu n petsousiete, mu no vashü mote.

⁴³No nouyie chü dzielie di hie whuo, ngumezhie moto zo di dukhriwa.

⁴⁴No kimhou puo se n keziliete, süla kecha puorei n pfüthe volie kenjüte.

⁴⁵Noe hie chüpie themia donu mha kerhu, tsiu kelhoukewa nyopfhü chüwate.

⁴⁶Hie ngumvümia pete u tie tiehiepie hie petsou;

⁴⁷kemichie tsiu mha preikecü hie gei vorte, mha vakecü mu kepeka vorte.

⁴⁸A themia kepeka la, a mhidzü kerü nu dzü kekru tuoite.

⁴⁹A mhidzü kruzhü zotuo, kerülei jü di,

⁵⁰Jihova teigei nu mehoshü kemochie si ba zotuo.

⁵¹A nadi nu thenumia kemedzüko la, a mhi-e a nou chü pesuote.

⁵²A ngumvüko puocapuola kejü nu, pera kewhuo chü a whuo kemerie chü tuote;

⁵³ukoe a perhei kelhoupie kheho nu shü, mu ketsie kelhou pie a va,

⁵⁴dzü a tsü mho siete; sitse a sie, “A sü tseite” si.

⁵⁵He-i Jihova, a kheho kesou nunu n za kieshü;

⁵⁶noe a pfhe sishüte, “A kekhruohi chakeshü ki n nyieto kegulieta hiecie, derei kerülei kha a tsücie!”

⁵⁷A n kiekeshü nhie no a penuo vor; no a ki, “Michie hiecie” isi.

⁵⁸He-i Niepu, no a yapieshüte, noe a kerheiro kelashüte.

⁵⁹He-i Jihova, noe a gei kekrükeshüko ngu shüte; a nyie pepishücie.

⁶⁰Noe uko kelhiekecüko, tsiu uko a petsoukecüko ngushüte.

⁶¹He-i Jihova, noe uko a krekecüko, mu a petsoukecüko ngushüte.

⁶²A ngumvüko zhate kenupu mu mebe di a petsou.

⁶³Uko ba tsu rei tsiu sietha rei mehoshücie; ukoe a mecha di thepfhe chü.

⁶⁴He-i Jihova, uko mhatho tuoi uko zhakhra chüshü uko tsücie!

⁶⁵Thenoukesuopie uko tsücie; n rüsepie uko gei shücie.

⁶⁶Jihova teiko khronu n noupfhü se di, uko whuo vo uko pekawacie.