Read Angami Naga Ezekiel 1 Bible Online

Ezekiel 1 - Angami Naga bible

Ezekiel 1

¹Teicie ser cie, khrü diau nu, khrü süu nu zha pengou nhie, ae Kebar rü khie ki kediemia donu bakecü ki, teiko koshü, sitse ae Ukepenuopfü ziemhoko ngu.

²Thekhrüu nu zha pengou nhie, (süusü kediu Jehoiakin-e mia die chü tuoketa cie pengouketa cie.)

³Jihova die Kebar rü khieki Chaldianmia kijü nu keba Ezekiel zievo-u Buzi nuou ki vor; mu sünu Jihova dzie puo gei tuo.

⁴A mehoshü ru, pesotsa nu teikhrie khriedi puo vor; kimhou kezha puo puokhie puomhou ziekruoi süu whi mu miu sünu par ba tso, siro miü donu thegi meriedakecü puo ba.

⁵Siro süu donu khunuo kerhei kemhiekecü dia par. Siro uko rhiu hakemhie; ukoe themia rhi kemhie,

⁶siro mia puopuokecü puo zie diadia; mu mia puopuokecü puo shü diadia.

⁷Uko phi-e mezhü, siro uko phizhüe mithunuo mou kemhie, sükoe merenyi kezhü kemepreikelie tuoi vavai.

⁸Uko khie lutsa hatsa uko shü diako khro themia dzie tuoikecü ba. Sidi uko zie mu uko shü chüpfü.

⁹Uko shü vo huoniehuo nyü mu uko rürei la mo zo di mezhü vo phre.

¹⁰Siro uko zie kengu-u la we hamhie: uko diako themia zie, thezatsa losha zie, thevitsa pedo zie tuoi, mu tsüüra zie tuoi;

¹¹uko zie-e hakemhie uko shüe kelhapie pesotsa va; mia puopuokecü puoshü kenienie, mu uko shükoe vo huoniehuo khe, tsiu kenie pie u mo whe isi.

¹²Sidi mia puopuokecü u mhodzütsa mezhü vota; ruopfüu kevora, uko rei süra vo, uko voketara rürei la mo zo.

¹³Rheiketuo khunuoko donu[1] miü nu mizhü tukezhü tuoi, tsiu mitu tuoi, süu khunuo kerhei diako donu kho mu ke ituo; miu ziekruoi mu miu nunu teimela par.

¹⁴Siro rheiketuo khunuoko ta kho mu ke teimela phriephriekecü mhie di.

¹⁵Ae khunuo kerheiko meho ba tse, kijüu gei khunuo kerheiko khieki puo khunuo diako puo la garithuo puopuo keba ngulie.[2]

¹⁶Garithuoko mu kechürhiko kengu-u hakemhie: Uko kengu-u beril tsiepfü tuoi; tsiu uko diako rhi kemhie phre, garithuo puo garithuo kekrei puo nu keba mhie.

¹⁷Uko melekeshü ki, ukoe rürei la mo zo rei lutsa hatsa valielie zo.

¹⁸Puo thuo khieko rükrie mu kemerie zo; kekreilamonyü puo thuo diako lutsa hatsa themhi thuo tshupfütuo.

¹⁹Siro khunuo kerhei diako melekeshü ki, garithuoko uko khieki mele vota; mu khunuo kerheiko kijü nunu sieta tse, garithuoko rei sieta.

²⁰Ruopfüu kevora, uko sünu vo, mu garithuokoe uko ze sieta, kekreilamonyü khunuo kerheiko ruopfü sünu tuokecü la.

²¹Uko meleshü tse, kekreiko rei meleta, uko thata ro, kekreiko rei thata, mu uko kijü geinu sieta ro, garithuoko rei sa uko ze uko khieki sieta isi. kekreilamonyü khunuo kerheiko ruopfü garithuoko nu tuotacü la.

²²Siro khunuo kerheiko tsü mhogei teikhru kemhiekecü ketsie thega kemelei mhie phriephrie[3] di uko yapfü ba.

²³Teikhru khro, uko shü kelhapie mezhütshoi, huohiehuo peze ba, khunuo kerheiko pete rei u shü kenienie pie puo mo-u whe phre.

²⁴Ukoe meleshü tse, ae uko shüko pfhe, dzükezha pfhe tuoi, Kerükrietho-u[4] teikese pfhe tuoi themia kekra pfhe chüpahi kro puo pfhe tuoikecü si mu uko thata ro uko shü se kerünuo la kertata.

²⁵Siro uko tsü mho teikhru mhogei nu mhapfhe puo par; sitse uko thata mu uko shüko pie rünyhu keta.

²⁶Uko tsü mho teikhru mhogei kediba kemhieikecü puo ba, süu kengu-u safir tsie tuoi, siro kediba kemhiekecüu mhogei kebau rhi-e themia puo rhi kemhiei.

²⁷Puo chieca mhotsa puo rhiu, thegi kemelei kemhiekecü a ngu, süu nu mi kemhiekecü zepfü ba, tsiu puo chieca pekhrotsa, ae miü tuoikecü ngu, siro puokhie puomhou pete mha kezie puo whipfü ba.

²⁸Puokhie puomhou kezieue teirü ki kimhou gei pfhesei kezha tuoi. Jihova vithedze chü zokecüu kengu-u hakemhie zo. A süu kengu ki, a zere tsu zhüta, sitse ae mia puo diepukecü pfhe si.