Read Angami Naga Ezekiel 10 Bible Online

Ezekiel 10 - Angami Naga bible

Ezekiel 10

¹Süsie ae mehoshü, ru Cherub tsünie mhogei keba tei mhiekecüu mhogei safir kemhiekecü, kediba rhi kemhiekecü puo par.

²Siru puoe themia linenpfhe dziekecüu ki sie, “Cherubko khro garithuoko donu lecie; sidi cherubko donu nu mizhü ketu pie n dzie ketshu chüliecie, sidi süu kezapie nadiu ketshu chüshülie” sishü. Sitse puo a mhingu kinu leta.

³Themiau letakecü ki, cherubnie-e kiu nu thezatsa tha, tsiu kimhoue kiluo metsuou tshupfü bata.

⁴Sitse Jihova zapuzayie kechüu Cherub nunu sieta, sidi kiu kimhou thuo tshupfüta, mu kiluou Jihova zapuzayie ziekruoikecüu bu tshupfhü bata.

⁵Süki cherubnie shü pfhe si kiu chazoutsa rei vota, süusü Kuokejokejüu Ukepenuopfü[13] die pukeshü pfhe mhieta.

⁶Siro puoe linenpfhe dziekecüu ki, “Cherubnie donu nu garithuo geinu mi pieliecie,” sishü. Sitse puoe tuo le di garithuo puo khieki thata.

⁷Sitse Cherubnie donu Cherub puoe puo dzie yhapie Cherubnie donu keba mi nu shü, sidi süu chülie, di pie linenpfhe kedzieu dzienie nu shüshü; puo süu lielie di tuota.

⁸Cherubnie shü khro nu themia dzie kemhie bakecü ngu.

⁹Siro a mehosie ru, Cherubnie khieki garithuo dia ba, garithuo puoe Cherub puo khieki idi, tsiu garithuoko rhi-e beril tsiepfü rhi tuoi.

¹⁰Siro uko kengu-u liro uko diako rhi kemhie zo, mhathuo puoe mhathuo puo nu keba mhie zo.

¹¹Uko melekeshü ki, ukoe uko khie diako geinu mele phre, uko melekeshü sie rürei la mo zo; derei puo kerieu kirapuo tuo shi sükoe süu medzi vota.

¹²Siro uko mo pete, uko chie, mu uko dzie, uko shü mu uko thuo lutsa hatsa themhi thuo tshupfü tuo zo, mhathuo diako zorei sükemhie zo.

¹³Mhathuoko zokecü we, a kesi ki nu uko kiekecü “Rüwhikecü thuoko” isi.

¹⁴Uko puopuokecü u zie diadia; thezie kerieu Cherub zie, thezie kenieu themia zie, thezie seu losha zie mu thezie diau tsüüra zie.

¹⁵Sitse Cherubko siethalie. Hako Kebar rü khienu kengu kerhei khunuoko.

¹⁶Siro Cherubko meleshü tse, garithuoko rei uko ze mele zota; mu Cherubko kijü geinu ushü lhashü mu garithuoko rei uko khieki nu mele motaya.

¹⁷Uko thaketa ki, kekreiko rei thataya, mu uko siethalie ro, kekreiko rei uko ze siethalieya; kekreilamonyü khunuo kerheiko ruopfü uko gei tuokecü la.

¹⁸Sitse Jihova zapuzayie kechüu kicie nunu tuota di vo Cherubko mhogei thata.

¹⁹Siro Cherubko unie shü lhase sielie di a mhingu kinu kijü geinu khota tse garithuoko rei uko khieki tuota. Sidi uko Jihova kiu niathutsa careu ki thata; mu Israel Kepenuopfü zapuzayieu uko mhogei zhata.

²⁰Hako khunuo kerheiko Kebar rü khieki nu a Israel Kepenuopfü khro ba di ngukecüu zo; mu ukoe Cherub ücü a si.

²¹Mia puopuokecü u zie diadia, mu shü diadia, mu uko shü khro themia dzie kemhiekecü tuo.

²²Siro u zie-e a Kebar rü khieki nu kengu thezieko ze kemhie uko mia puopuokecü u mhodzütsa mezhü vo zo.