Read Angami Naga Ezekiel 11 Bible Online

Ezekiel 11 - Angami Naga bible

Ezekiel 11

¹Siro ruopfüu a chüse sielie, di a ze Jihova kiu niathutsa careu, niathutsa petsou kebau nu vor. Sünu care kikhau kiki mia mepfüepengou ba; süko donu themiako mho kezhamia Azur nuou Jazania mu Banaia nuou Pelatia, rei keba ngu.

²Puo a ki, “Themiau, themia hako mha kesuo rhüyakezhamia mu mezhü kemo kepetha pie nadi hau nu khashüyakezhako,

³uko sie, ‘Ki chüketuo tei moluo; nadi hau sü li puo zo, mu we sü themuou zo’ isiya.

⁴Süla siedzekesidie pu uko petsoushülie; siedzekesidie pushülie, he-i themiau,” sita.

⁵Sitse Jihova ruopfüu a gei tsurta, mu puo a ki, “Pushülie, Jihova hakemhie puya; Nie mha hai di leya, he-i Israel kiu nie nou lekebau a si baya.

⁶Nieko nadi hau nu mia kekra dukhriwa, sidi dukhrikewako pie chaüko tshuwate.

⁷Süla Niepu-u Ukepenuopfü hakemhie puya; nieko dukhripie sünu kezhüko sü themuou zo, nadi hauha galiu zo; derei a süu donu nu nieko chü se parwatuo.

⁸Nieko zhiechau prei, mu a zhiechau se nieko gei vorshütuo, Niepu-u Ukepenuopfü siya.

⁹A sünu nu nieko chü se parwatuo, sidi nieko khapie chazoumia dzienu shüwatuo, mu ketsokecüu pie nie geishütuo.

¹⁰Nieko zhiecha geinu tetsutuo, mu a Israel tierie nunu nie dienya kecütuo. Sitse nieko a Jihova zo ücü silietuo.

¹¹Nadi hau bu nie galiu chülie lho, nie bu sünu muou rei chülie lho; a Israel tierie nunu nie dienya kecütuo.

¹²Sitse niekoe a Jihova zo ücü silietuo, nie puo zhoko medziya mo, mu puo kepetha rei se balieya mo, derei nieko khieümhou kebako seyieko zho medzi di lhoute” sita.

¹³Siro a siedzekesidie pu ketha ki, Benaia nuou Pelatia siata. Sitse a tsu zerepfü zhülie di kra peto di sie, “He-i Niepu-u Ukepenuopfü! No Israel peshapie kebako pejü lotsowatieya me?” sita.

¹⁴Siro Jihova die a ki vor di:

¹⁵Themiau, n siezedzürieko, n se n yiemia, tsiu mia die chüketuo n zeko[14], Israel kiu pete, uko pete, Jerusalem nu kelhoumiakoe “Ukoe Jihova kinu pecie phite; kijü hau u bu wetuoü di pie u tsüwate,” idi pukeshüko zo.

¹⁶Süla pushülie, Niepu-u Ukepenuopfü hakemhie puya; A uko chüpie kepetse nu seyieko donu shüwata zorei, mu uko bu rünako nu cüre vota zorei, a puotei huonu uko voketa rünako nu rei uko la kemesachü puo chü vor zo.

¹⁷Süla pukeshü; Niepu-u Ukepenuopfü hakemhie puya; A themiako donu nu nieko ze vor kengulietuo, nieko cüre tuoketa rünako nunu nie pfhü kengulietuo, sidi a Israel kijü pie nieko tsüshütuo.

¹⁸Sidi uko sünu vorkelie ki, ukoe sünu nu mha kesuoko pete tsiu mha kerütsekecüko pete chüwatuo.

¹⁹Siro a uko nou chüpie puo[15] chüshütuo, mu ruopfü kesa puo pie uko nou shütuo, siro a uko geinu thenou kekhrü tsieu chüsetatuo sidi thenou kemene chüu kha lashütuo.

²⁰Sitse uko a zhoko medzilie mu a kepethadieko se balie, mu süko ze balietuo. Süsie uko a themia chütuo, mu a uko Kepenuopfü chülietuo.

²¹Derei themia u nou pie mha kesuoko tsiu kerütsekecütsa voketako we, a uko garithuoko chüpie uko tsügei lashütuo, Niepu-u Ukepenuopfü sidi puya.

²²Süsie cherubko u shü kelha sesieta, tsiu uko khieki garithuoko rei satuo, mu Israel Kepenuopfü zapuzayieu uko mhogei zha.

²³Siro Jihova zapuzayieu nadiu metsuo nu sieta, sidi vo nadi niathutsa kijüthou gei zhata.

²⁴Sitse ruopfüu a piesieta, sidi ziemho geinu Ukepenuopfü ruopfüu nunu a ze Chaldian nu miadie chükebako ki vorshü. Süsie ziemho a kengu-u a khawata.

²⁵Mu mia die chü kebako ki Jihova pie a pengukeshüko pete a pushü.