Read Angami Naga Ezekiel 12 Bible Online

Ezekiel 12 - Angami Naga bible

Ezekiel 12

¹Jihova die a ki vor di sie:

²Themiau, noe mia perhieyakezha ki puo nu lhou bate, uko mhi nyi derei mia nguya mo, u nyie bu mha rünyüketuo la ba derei mhapfhe siya mo.

³Kekreilamonyü uko mia petsouyakezha kiu zo. Süla, themiau n thuo n la tataketuo mhanyako keseliecie, sidi khinhie gei uko kengu nunu ta parlie. No uko kengu kinu thechü puo nunu tuo thechü kekrei puo nu votalie. Uko thuo mia petsouyakezha kiu zoürei uko mhalelie rei si lhomu.

⁴No khinhie gei uko kengu kinu n vienyako, se tataketuo mhanyako se parlie, sidi thevatie ki mia die chü votaketuomia mhie, uko mhingu kinu tuo pratalie.

⁵No uko kengu kinu sozha bie phalie, sidi süu nunu n vienyako toupfü prataliecie.

⁶No uko mhingu kinu n bouka geinu n vienyako toupietuo, sidi teizei geinu süu toupfütuo; kijüu ngu moketuo la n zie dzeliecie; kekreilamonyü a Israel la n pie zasi puo chüshüte.

⁷Diekhakeshü mhie di ae chülie. Khinhie geinu a vienyako, mia die chü votaketuomia vienya mhie di se parlie, siro thevatie a thuo a dzie pie sozhau duphalie; teizei geinu süu se parlie, mu uko kengu kinu a bouka geinu süu toupfülie di tuota.

⁸Siro khise Jihova die a ki vor di sie:

⁹Themiau, Israel kiu, mia petsouyakezha kiu n ki, “No kedipuo chüya ga?” idi pu mo me?

¹⁰Uko ki, “Niepu-u Ukepenuopfü hakemhie puya: Die hauha Jerusalem kedinuomia mu sünu Israel kiu pete la puya” sishü.

¹¹Hai di pushülie, “A nie la zasi puo zo, a chükeshü mhie, sütuoi uko gei rei süu chüshütuo; uko miadiemia chü di ta miara votuo” sishü.

¹²Siro uko donu kedinuou teizei zenu puo bouka geinu puo vienya toupietuo, sidi tuo pratuo; puoe sozha duphalietuo di sünu nu süko toupie pratuo; puo mhi pie kijü ngu moketuo la puo zie dzelietuo.

¹³A a jal kelhapie puo bolietuo, sidi a bie nunu puo malietuo; sidi a puo ze vortatuo, Chaldianmia kijü nu vortatuo, sishierei puo bu süu ngulie lho; sidi sünu nu siatatuo.

¹⁴A puokhie puomhou houkebako puo kekhruohiko mu puo rüpfhünuo pete bie kecürepie teikhrie pete nu shüwatuo; mu a zhiechau shüzou se par uko whuotuo.

¹⁵A uko biepie seyieko donu kezakezikeshü ki mu uko bu rünako nu cüre voketa ki ukoe a Jihova zo ücü silietuo.

¹⁶Derei a uko mia huoyo bu zhiecha, pekriekecü nu mu thepetheruo nu tapralietuo, uko bu uko kevoko nu seyieko donu uko mha kerütsekechü pete pushülieketuo la; sitse ukoe a Jihova zo ücü silietuo.

¹⁷Jihova die a ki vor di sie:

¹⁸Themiau, pekhrukhru di n niekhrüda cüliecie, mu perüsürüsa zo mu michie se di n dzü krieliecie;

¹⁹sidi kijüu nu themiako ki pushülie, Niepu-u Ukepenuopfü Jerusalem Israel kijüu nu lhou kebako ki hakemhie pushüya: Ukoe michie di u niekhrüda cütuo mu u nousuo di u dzü krietuo, kekreilamonyü uko kijü nu keba peteko bu methuo batatuo, süusü sünu kelhouko mia pekakecü la.

²⁰Themia lhou keba nadiko ratatuo mu kijüu methuo zhütatuo; tsiu nieko a Jihova zo ücü silietuo.

²¹Jihova die a ki vor di sie:

²²Themiau, Israel kijü dze mhasidie, “Teisozhako chü pechawate, mu ziemho pete mhapuorei mote” idi pukeshüu ca kedipuo ga?

²³Süla uko ki, “Niepu-u Ukepenuopfü hakemhie puya: A mhasidie hau bu ba sa motatuo, tsiu uko bu Israel nu süu pie mhasidie üdi se salie lho” idi pushülie; derei uko ki, teisozhako penuo bate, mu ziemho pete chü tseilietatuo.

²⁴Kekreilamonyü Israel kiu nu ziemho kemeda morei mia sekedo di themoukecü ba salie lhote.

²⁵Derei a Jihova thuo puketuo dieu pushütuo, sidi süu chü tseishütuo. Süu chü menuotalie lho; derei nie teiki he-i Israel kiu, a dieu pushütuo mu süu chü tseishütuo, Niepu-u Kepenuopfü siya.

²⁶Jihova die a ki vor di sie:

²⁷Themiau, Israel kiu hai di puya, “Puo ziemho kengu teicie kekra baluo; puoe puotei kekra tuo luokecü siedzekesidie puya” si.

²⁸Süla uko ki pushülie, Niepu-u Ukepenuopfü hakemhie puya: A die puorei chü menuotalie lho, derei a die pukeshüu chü tseishütuo, Niepu-u Ukepenuopfü siya.