Read Angami Naga Ezekiel 13 Bible Online

Ezekiel 13 - Angami Naga bible

Ezekiel 13

¹Jihova die a ki vor di sie:

²Themiau, Israel siedzekesimia siedzekesidie puyakezhako petsou di siedzekesi pushülie, u thuo u kele nunu siedzekesi die puyakezhako ki pushülie; “Jihova die rünyüliecie!” siya.

³Niepu-u Ukepenuopfü hakemhie puya: U thuo u noukeleu medzi di mhapuorei nguya kemo siedzekesiko we ce, chülietie!

⁴He-i Israel nie siedzekesiko ha phera nu meseru kemhie zolie.

⁵Nieko dahou duphakewau nu vo mo, morei Israel kiu sozha puo rei kemieshü mo süu bu Jihova teisozha nhie terhükegeikecü nu thalieketuo la.

⁶Ukoe ketijü ziemho nguya, kemeda siedze puya, uko pukecü “Jihova puya” siya, Jihova uko ketseshü mo zorei, sidi uko die chülietuo nhiekecü merü baya.

⁷A pushü mo zorei, nieko ketijü ziemho ngu mu kemeda siedze pu di “Jihova puya,” idi puya moü me?

⁸Süla Niepu-u Ukepenuopfü hakemhie puya: Kekreilamonyü nieko ketijü die pu mu kemeda ziemho ngu, süla a nieko petsouya, Niepu-u Ukepenuopfü sidi puya.

⁹A dzie-e ketijü ziemho kenguko mu kemeda siedze puyakezha siedzekesiko petsouya, uko a themia kehou-u nu balie lho, morei Israel kiu nu u za thulie lho morei Israel kijü nu lelie lho; sitse noe a Niepu-u Ukepenuopfü ücü silietuo.

¹⁰Kekreilamonyü, ketho nu ro, uko a themia chatha kekrüwate, sidi sie, kezekevi jü rei “Kezekevi” iyacü la, siro themiako tsiepfhe puo pfhekelie ki, siedzekesi hakoe süu nyhü pekrakeshü la.

¹¹Siro mhapie süu nyhü pekrakeshüko ki süu metaketuo pushücie. Teirü seshütuo, prü kezha tetsurtuo, mu khriedi rükhrie partuo.

¹²Sozhau tetsuketa ki, “No nyhü pekrakeshü kirapuo vota ga?” isi di pu lhoü me?

¹³Süla Niepu-u Ukepenuopfü hakemhie puya: A noupfhü nunu a khriedi rükhrie partuo, mu a nouyie geinu tei bu rü seshütuo, tsiu noupfhü prü krütsur sü pekatuo.

¹⁴Nie nyhü pekrakeshü dahou-u a biemewatuo, sidi süu pie tsu kijü shüwatuo, sitse süko mvüdzeko rütou zhütatuo; süu tetsuketa ki, nie süu nunu kaüjütatuo; sitse a Jihova zo ücü nie silietuo.

¹⁵Sükemhie di a sozhau gei tsiu mhapie nyhü pekrakeshüko gei a noupfhü rushütuo; sidi a n ki, Dahou-u ba sa mote, morei süu nyhükeshüko rei, ituo,

¹⁶Israel siedzekesiko Jerusalem dze siedzekesidie pukecüko kezekevi ba mo rei kezekevi dze ziemho ngu ükecüko, Niepu-u Ukepenuopfü puya.

¹⁷Siro no, themiau, n zie pie n themia nuopfüko, u thuo u noule nunu siedzekesidie puyakezhako petsoushülie; sidi siedzekesidie puyakezhako petsoushülie.

¹⁸Sidi sie, Niepu-u Ukepenuopfü hakemhie puya: Mia kerheiro pfhüyakezhamia bouco kepha mu mia tsükeze terhüyakezha thenumiapfüko we ce, chülietie! Nieko a themiako donunu kerheiro lie, mu nie kerheiro we pekru se batuoü me?

¹⁹A themia donu barli lha u dziezhü ketshu puo la mu niekhrüda huoyo la nie kerheiro siatazhü kemoko dukhrituo, tsiu rhei ba zhü kemoko perhei lashü, kemeda rünyüyakezha a themiako ki kemeda pu di.

²⁰Süla Niepu-u Ukepenuopfü hakemhie puya: A nie se mia kerheiro whuoketuo nie dzieko petsouya;[16] a nieko bou geinu uko cierhawatuo, sidi kerheiroko bu pratatuo, nie perako kemhie di whuoketuoko bu.

²¹A nieko dziekeya pfheko cierhawatuo, sidi n dzie nunu a themiako kelalietuo; uko bu n dzie nu chüteu chü salie lho, sitse niekoe a Jihova zo ücü silietuo.

²²Kekreilamonyü nie meda di kemiathomia nou chü pesuowate, a sükosü nou chü pesuoshü mo zo ciü, sidi kerüzhümia dzie chü kemeteishü, sidi puo ki rheilieketuo dze pu di, puo bu puo kerüzhü nunu rüdilie kelho chüwa.

²³Süla no ziemho kemeda ngu salie lho morei themou salie lho morei themou reilie lhote; a n dzie nunu a themiako kelalietuo. Sitse noe a Jihova zoücü silietuo.