Read Angami Naga Ezekiel 14 Bible Online

Ezekiel 14 - Angami Naga bible

Ezekiel 14

¹Siro Israel pehümia huo a ki vor di a mhodzünu balie.

²Siro Jihova die a ki vor di sie:

³Themiau, themia hako u terhuorhi pie uko melou nu shülie, tsiu uko kephoumako thephi mesüwayakezha pie u mhodzü ki ba zo; siüro a uko bu mhaketsokecü meseü me?

⁴Süla uko ki pushülie, sidi uko ki, Niepu-u Ukepenuopfü hakemhie puya: Israel kiu nu themia kehoupuorei puo melou nunu puo terhuorhi toupfü ketuomia, tsiu puo mhodzünu kephouma thephi kemesü tsieu pie kezhümia, a siedzekesiu ki vor üro, a Jihova, terhuorhi kekra se di kevorko die kelashütuo,

⁵uko melou pete pie a kitsa shü lalieketuo la uko pete rei u rhuomiarhi geinu a ze kepecietuote.

⁶Süla Israel kiu ki pushücie, Niepu-u Ukepenuopfü hakemhie puya. Thenoukedilie di nie rhuorhiko kinu rüreiliecie tsiu nie mha kerütsekecü pete nunu nie zie kereiliecie.

⁷Kekreilamonyü Israel kiu pete rei morei chazoumia Israel nu lhouketamia rei, a kinu puo kelakrei se ketamia, u rhuomiarhi se u melou nu ketuomia mu u kephouma pie thephi kemesü puo tuoi di u mhodzünu pie kebamia, sidi siedzekesimia ki vor di a ketsotuoü vor zorei, a Jihova thuo uko die kelashütuo.

⁸A a zie kereipie uko petsoutuo, a uko chüpie zasi puo tsiu mia diebo puo chüwatuo sidi a themia donunu uko dathewatuo; sitse niekoe a Jihova zo ücü silietuo.

⁹Mhanuü siedzekesimia puoe mia bu puo sewa di die puwa ro, a Jihova thuo siedzekesi süu se kedowate, mu a a dzie yhapie puo petsoutuo, sidi a themia Israelmia donu nu puo pekawatuo.

¹⁰Mu uko u siazhau toupfütuo, siedzekesiu siazha mu vor puo ketsokecüu unie siazha kemhie zotuo.

¹¹Israel kiu bu a ze kepetseta mo, morei u thuo u kejokemou nunu u perhu sa molieketuo la. Sitse uko a themia chülietuo, mu a uko Kepenuopfü chülietuo, Niepu-u Ukepenuopfü siya.

¹²Jihova die a ki vor di sie:

¹³Themiau, kijü puoe kekrüthorta di a gei phoumakewa ki, mu a a dzie yhapie süu petsou, tsiu süu kecüca dathewa di pekriekecü ketse süu nu shü, sidi sünu themia tsiu khunuo dathekewa ki,

¹⁴mhanuü Noah, Daniel mu Job uko sünu ba zoshierei, süko u thuo u miatho nunu uko thuo uko kerheiro rübei kelalietuo, Niepu-u Ukepenuopfü siya.

¹⁵Mhanuü a khunuo kekhriekezei bu kijüu pfüthe vo, di süu pekawa, khunuoko la miapuorei süu pfüthe volie kenjüta;

¹⁶mhanuü mia se hako sünu ba rei, a rheiketuo mhie, Niepu-u Ukepenuopfü puya, uko la u nuonuo thepfumia morei thenumia kelalie lho; uko rübei kelalietuo, derei kijüu we methuotatuo.

¹⁷Morei mhanuü a zhiecha se kijü süu nu vor di sie, “Zhiechau bu kijü pfüthe vocie,” isishü, sidi a sünu nu themia mu khunuoko dathewa;

¹⁸süki themia se hako sünu ba zorei, a rheiketuo mhie, Niepu-u Ukepenuopfü puya, ukoe nie nuonuo thepfumia morei thenumia rei kelalie lho, derei uko rübei kelalietuo.

¹⁹Morei mhanuü a thepetheruo ketsepie kijü sünu shü, mu a noupfhüu thezie sa di rupie süu gei shü, sidi sünu themia mu khunuoko rei dathewa;

²⁰süki Noah, Daniel mu Job, hako sünu ba shierei, a rheiketuo mhie, Niepu-u Ukepenuopfü siya, ukoe nie nuonuo thepfumia morei thenumia rei kelalie lho; uko u thuo u kemiatho la u kerheiro rübei kelalietuo.

²¹Kekreilamonyü Niepu-u Ukepenuopfü hakemhie puya: A kemeriekecü mhatho dia hako, zhiechau, pekrie kecüu, khunuo kekhriekezeiu tsiu thepetheruou pie Jerusalem nu themiako mu khunuoko dathewaketuo la ketsekeshü ki kidepuo rei kemerie chü zotie shi!

²²Sirei, mia huo sünu peshapie balietuo, mia nuonuo thepfumia mu thenumia ze parshülietuo mu uko n ki vortuo. Siro nie uko zhoko mu uko mhathoko ngukecü ki, a mha kesuo se Jerusalem gei kevor, a mha se süu gei kevor pete donu rei nie thukepeluo ngulietuo.

²³No uko zhoko mu uko mhathoko ngukeshü ki, ukoe u nou thupeluolietuo, mu niekoe a puocapuola jü zo di mha hako chüshü mo zo ükecü silietuo, Niepu-u Ukepenuopfü puya.