Read Angami Naga Ezekiel 16 Bible Online

Ezekiel 16 - Angami Naga bible

Ezekiel 16

²Themiau, Jerusalem bu puo kejokemou siliecie.

³Pushülie, Niepu-u Ukepenuopfü Jerusalem ki hakemhie puya: N sedeu mu n kepenuochüu sü Kanan kijü nu zo; n puo sü Amormia, mu n zuo sü Hitmia.

⁴N penuokeshü liro, n penuokelie nhie n luo rei re mo, morei n chü kemesaketuo la dzü nunu rei n khrü mo, morei metsie pie n kenhe mo, morei pfhe nunu rei n kezü mo.

⁵Themhi puorei n ngumezhie mo, mha hakoha puorei n ngumezhieketuo la chüshü mo; derei n kelhoupie phouyo nu shüwa, n penuokelie zha nhie nu n thi zo.

⁶A n pfüthe vo, ru no n thuo n zie nunu rüzapfü zhükecü ngu. N thuo n zie nu zhükecü ki, a n ki, “Rheiliecie!

⁷Sidi lie nu sei kemhie memie sieliecie[17]” sishü. No memie sielie, rükrielie sidi thenumiapfü puo chülie;[18] n nunie rüchülie, siro n tha thelie; sizorei noe methuo tsiu n kewhe tuo mo zo.

⁸Süsie a n pfüthe la vo di n mehoshü ru; noe mia ngu n neikecü teiu nu bata, süla a pfhe khoupie n wheshü, di n kemethuo wheshü: A rüse n kishü, sidi n ze dietseidiekholie, Niepu-u Ukepenuopfü puya, sidi n pie a vie chüliete.

⁹Süsie a dzü pie n khrüwa, n geinu thezieko pete rei khrü phrewa, sidi tier pie n kenheshü.

¹⁰Pfhe puokhu kethu pie n wheshü tsiu chüzhü pie n phikou chüshü, siro a linenpfhe pie n phashü mu pfhe kevithopfü pie n wheshü.

¹¹A cümenyie pie n ketsoshü, tsiu a ketho pie n dzienie nu shü, kedoukecü cü chüpie n vo nu shüshü,

¹²nyhükha pie n nyhü nu shüshü, menyie pie n nyie nu shüshü, tsiu keditsüre kezivi pie n tsü gei shüshü.

¹³Suna mu rakachü se n rütso chüshü, tsiu linen pfhenei kememhiepfü, kevithopfü, tsiu puo khukethu se n pfhenei chüshü; noe thoulha kememhiepfü mu mepfhidzü tsiu tier cüükrie. No memie zivithor sierlie, sidi kedimiapfü chülie vita.

¹⁴Siro n zivi la seyieko donu n dze meyie vota, kekreilamonyü a zivi süu pie n geikeshü la, Niepu-u Ukepenuopfü siya.

¹⁵Derei no n thuo n zivi peleta, sidi n zivi la no thethelieta, sidi n ki kevor[19] pete ze pieü chüta.

¹⁶Siro no n pfheneiko pielie, sidi n thuo n la rüsuoki kemhie kezivi se chülie, sidi süko geinu thethelie; mha haikecü thiedzü rei chü mo morei hasie rei chü lho zo.

¹⁷Siro a khapie n ketsü a suna rakachü pie kechü n pienyie keziviko chülie, sidi n thuo n la thepfumia miarhiko chülie, di süko ze pieü chüte.

¹⁸Siro no khuthupfheko chüpie süko kezülie, sidi a tier mu mharekethengu pie uko mhodzünu shü.

¹⁹Süsierei a pie n ketsü niekhrüda, a pie n vakechü thoulha kememhiepfü, tier mu mepfhidzüko se noe uko mhodzünu mharekethengu chü di khashüwa, sidi süu chülie, Niepu-u Ukepenuopfü puya.

²⁰Siro no penuopie a ketsü n nuo thenu thepfu rei zelie, sidi no hakoha pie süko bu mezulieketuo la ruosuo chü. N rügerüzhüko n kelhuo chülie kemo mhie!

²¹No a nuonuoko dukhriwa, sidi uko kelapie ruosuo puo tuoi di süko tsüwa.

²²Siro no kerütsekecü pete nu tsiu n rügerüzhü n khriesarüü teiki, no methuo tsiu n wheliekemo ki, mu n zie nunu no rüzakezhü rükra mote.

²³N rüzhü pete sie (ce, no we chülietie! Niepu-u Ukepenuopfü puya).

²⁴No zieke pete nu n thuo n la thethe ki, mu thechü kerükrie chülie;

²⁵cha bouthu kheko nu n thuo n la thechü kerükrie chülie, sidi n ziviu chüpie kerütsekecü chüwa, sidi n thuo n khapie n pfüthe kevor pete tsü, mu n rügerüzhü chü pekra miemielie.

²⁶Siro no rügerüzhüyakezha n siezanuomia, Ijipt n ze di thethelie, n rügerüzhü chü pekrapie a nou chü kemeyie.

²⁷Süla a a dzie yhapie n petsou, n kecücako chü petsawa mu n khapie n ngumvümia, Filistin nuopfüko n zho rüli la mengakezhako tsüwatuo.

²⁸No Asiriamia ze di thethe lie, kekreilamonyü n mengu chü tseilie kenjü zocü la, no süko ze thethe lie, mu tsie rei n mengu chü tseilie mo.

²⁹No Chaldian, thelhitheü kechü kijüu ze di n rügerüzhü chü pekra miemielie, hau zorei n mengu chü tseilie mo.

³⁰N melou kedithede thachü shi, Niepu-u Ukepenuopfü puya, noe hako pete chü, thethenupfü kethepfu mhathoko;

³¹no chabouthu pete nu n la thechü kerükrie chülie, tsiu zieke pete nu n tha kerükrie chü! Sirei no zhakhra lie mvü, thethenupfü kemhie we chü mo.

³²Mia kimianuo chü di thethekeliemia, puo nupfu sounu thepfu kekrei ze!

³³Mia methuo khapie thethekeliemia tsüya, derei no we mha methuo khapie n ze thethekeliemia tsü, thesopie lutsa hatsa mia tsü, mia bu vor n ze thethe lie.

³⁴Süla noe thetheliekecü thenumia kekreimia ze kekrei, miapuorei thethelienu di n meshüshü mo, tsiu n zha rei khrü mo, no mia zha khrü; noe mia ki krei.

³⁵Süla, he-i thethenupfü, Jihova die rünyüliecie:

³⁶Niepu-u Ukepenuopfü hakemhie puya, N khriethomia ze thethe lie di n kesuoko rushü mu n kemethuo whe moketa la, tsiu n kerütsekecü terhuorhiko pete la, mu n nuonuoko zie se süko ketsü la,

³⁷süla a n khriethomia pete, no uko geinu n kenei ngulieyakezhako, no khrieyakezhako pete mu no ngumezhieyakezhako pete ze vor kengulietuo; a lutsa hatsa nu uko ze kengulie di n ngumvütuo, n kemethuo hieshü uko bu ngutuo, sitse uko n kemethuo pete ngutuo.

³⁸A n dienyakecücü ki n pie thenumia pieükechümia mu thezie pekrukecümia mhie di ketsotuo, mu noupfhü nunu tsiu mia ngu urokecü geinu thezie se n gei vortuo.

³⁹Siro a n pie uko dzie nu shüwatuo, sidi uko n thethe thako mu n thechü kerükrieko vawatuo, uko n pfhenei lhewatuo di n pienyie keziviko setatuo, sidi n bu methuo tsiu n kewhe se mo batatuo.

⁴⁰Ukoe mia doupuo bu sier n petsoutuo, sidi uko ketsie pie n va mu u zhiecha se n zetuo.

⁴¹Ukoe mi pie n ki thetuo mu thenumia kekra donu nu n dienya kecütuo; a n bu thethe lie sa motatuo mu mia zha rei khapie mia tsü salie lho.

⁴²Sidi a n gei a noupfhü khashüwatuo, tsiu a rokecüu bu n gei rüreitatuo; süze a kemekrietatuo, tsiu a noumeyie sa motatuo.

⁴³Kekreilamonyü no n khriesarüü zhako rükra mote, derei mha hako pete pie a nou chü kemeyie, süla a n mhathoko pie n tsü gei lashütuo, Niepu-u Ukepenuopfü puya. No mha kerütsekecü pete mhogei kerügekerüzhü mhatho chüwa moü me?

⁴⁴Harie themia dievi seyakezha pete rei n dze hau setuo, “Puo zuo tuoi, puo nuopfü rei zo” isituo.

⁴⁵No n zuo nuopfü zo, puo nupfu mu puo nuonuo ngumecüyakezhapfü, mu noe n dzüriepfüko siezeko zo, u nupfunuo mu u nuonuo ngu mecüyakezhapfüko. N zuoe Hitmia mu n puoe Amormia.

⁴⁶N dzüriepfü sü Samaria, puo nuopfünie ze di pesotsa baya, tsiu n siezepfü sü Sodom, puo nuopfünie ze di pekhrotsa baya.

⁴⁷No we uko zhoko medzikecü rübei mo, mu uko mha kerütsekecüko chükecü rübei mo, puotei huoyo donu n zho pete nu uko ki rei suokuo.

⁴⁸A rheiketuo tuoi, Niepu-u Ukepenuopfü puya, n siezepfü Sodom mu puo nuopfü no mu puo nuopfünie chükecü mhiei chü mo zo.

⁴⁹N siezepfü Sodom kephouma sü hauha: Puo mu puo nuopfünie kemiako, kecüca ketshukelhuo cükecü mu kruopie puo thela jü zo, derei kejü ketsopfhümia khruohishü mo.

⁵⁰Ukoe kezhanoupfü, mu a mhodzünu mha kerütsekecü chü; süla a süko ngukeshü ki süko chüwa.

⁵¹Samaria we n kephouma tie rei chü mo, noe uko ki rei mha kerütsekecü chü krakuo, sidi no kerütsekecü chükewa pete la n siezepfü mezhükecü mhiete.

⁵²No zokecüu rei, n kethengau pfüliecie, kekreilamonyü dienya kecükecü ki n mhathoko la n siezepfü mezhükuoüte; kekreilamonyü no kephouma chükewako uko ki kerütsekuote, uko n ki rei miatho krakuote. Süla mengaliecie, no rei, sidi n kemengu-u pfüliecie; kekreilamonyü noe n siezepfü miathokuoketa thashüte.

⁵³A uko bu lhou lalietuo, Sodom mu puo nuopfünie, tsiu Samaria mu puo nuopfünie bu lhou lalietuo, mu uko ze di n bu rei lhou lalietuo.

⁵⁴n bu n ngau toupfülietuoü mu no chükewa la mengalietuoü di, tsiu süu bu uko nou thukepeluou chülietuo.

⁵⁵N siezepfünie la we, Sodom mu puo nuopfünie thiedzü thau nu la volietuo, Samaria mu puo nuopfünie thiedzü thau nu la volietuo, siro no mu n nuopfüko thiedzü thau nu la votatuo.

⁵⁶N kevi teiki n siezepfü Sodom pie n tie nu diebo-u chü moü me?

⁵⁷N kerüzhü hielakeshü mhodzü. Tsiewe no Aram[20] nuopfü mu puo zanuomia pete, tsiu Filistinmia nuopfüko, n khie n mhou keba n meshüyakezha pete krenyü chüte.

⁵⁸Süla no n rügerüzhü tsiu kerütsekechü zhakhra toupfü morosuote, Jihova siya.

⁵⁹U zo, Niepu-u Ukepenuopfüu hakemhie puya: No rüseu rütseyakezhau, sidi dietseidiekhokelieu varhuowa, süla a n mhatho kemhie chüpie n gei shütuo,

⁶⁰sishierei a n khriesarüü ki n ze dietseidiekhokelieu rükrashütuo, mu a n ze kechachie dietseidiekholietuo.

⁶¹Sitse no n zhoko rükralietuo, mu a n üpfünie, n dzüriepfü mu n siezepfü zelie di unie pie n nuo chükeshü ki no mengalietuo, derei süu a ze dietseidiekhokelieu geinulie lho.

⁶²A n ze dietseidiekho chütuo, sitse noe a Jihova zo ücü silietuo,

⁶³süusü n bu rükralie di theziekejü chü batatuoücü la, mu n ngau la mhakipuorei n tie tiehie lashü hienukecü la zo, no chükewa kejo pete a vawakecü ki, Niepu-u Ukepenuopfü siya.