Read Angami Naga Ezekiel 17 Bible Online

Ezekiel 17 - Angami Naga bible

Ezekiel 17

¹Jihova die a ki vor di sie:

²He-i themiau, mha kesou puo pushülie, mu Israel kiu ki dievi pushücie.

³Pushülie: Niepu-u Ukepenuopfü hakemhie puya: Tsüüra kezha se puo, puoshü zha mu puomie tshukepfü puo, puorhi doneiünei, Labanon nu vor. Puoe sedarbo puozü kerükrietho-u pieta.

⁴Puozü kerükrietho-u thewa, puo süu se thelhi chüyakezha kijü nu tsuta, sidi süu pie thelhi chüyakezhamia nadi nu shüwa.

⁵Süsie puo kijüu nunu mhatsia pielie, sidi süu khapie kijü kevi nushüwa; mu pie dzü kekra bakecü nunu pelhoushü, tsiu süu khapie sopfüciekhrie tuoishü.

⁶Süu zhalie di khubebo puoco the kepar tuoilie, derei rünuo; puo coko the puo kitsa vata, puo mieko puo kebachüu nu ba zo. Sidi süu khubebo chülie; süu puoco pou parlie, mu puo nyü the parlie.

⁷Siro tsüüra kezha kekrei puo, puoshünie zha phi mu puomie kekra nyikuokecü puo tuo. Mu harie! khubebo hau puomie kre puo petsou vor; süu coko gei puo nuotheko puo kitsa va vota, puo bu dzü pie puo petsetuoü vor. Siro puo leikeshü thechüu nunu

⁸puo phe se vor kijü krokecü dzükevira lei lashü, sidi süu bu puoco pou parlie mu puo si vülie tsiu khubebo kevi puo chülietuoü di.

⁹Pushülie: Niepu-u Ukepenuopfü hakemhie puya: Süu vi parlietuo me? Puo süu mieko biewa, sidi puo siko bu suota di rüwita, mu puo nyü kesa the keparko bu pieta lhoü me? Süu phewaketuo la themia kekuo, mu chüpahi kekra se morei vi.

¹⁰Süu phe kedikeshü ki, süu memie sielie vi me? Niathutsa teikhrieu süu heshü ro, süu rüwi lotsota, mu süu kirapuo nu lhou par shi süranu rüwita lhoü me?

¹¹Süsie Jihova die a ki vor di sie:

¹²Tsie mia petsouyakezha kiu ki pushülie: No mha hako ca si mo me? Uko ki pushülie: Babilon kediu Jerusalem nu vor, sidi uko kediu mu uko kezhako telie di uko puo sa ze la Babilon nu vorte.

¹³Siro puoe kediu yiemia puo zelie sidi puo ze dietseidiekholie, puo bu rüse di (puoe kijüu nu kezhamiako teliete),

¹⁴Süsü kedirüvieu chü kerünuowa di puo bu sielie lhoü di, mu dietseidiekhokelieu bu thalietuoü di zo.

¹⁵Derei puo sie süu perhie di themia ketsepie Ijipt nu shü, süusü uko bu gura tsiu chüpahi kekra ketseshüketuo la. Siüro puo süu chülietuo me? Mia puo mha haikecü chüshü di talie vi me? Puoe dietseidiekho-u bierhuoshü zorei talie vi me?

¹⁶A rheiketuo mhie, Niepu-u Ukepenuopfü puya, puo bu dikelie kediu kebachüu nu, puo rüsekeshü rütseketa, mu dietseidiekho-u bierhuokewa thechüu Babilon nunu puo bu siatatuo.

¹⁷Faro bu puo chüpahi kekra ze mu themia kra se di terhü nu puo khruohi, terhü peko dou lalie mu rünau khahoulie di themia kekra kerheiro pevokewa ki.

¹⁸Kekreilamonyü puo rüseu rütsete mu dietseidiekho-u bierhuo, kekreilamonyü puo puo dzie khashü sizorei mha hako pete chüshü, puo talie kenjü.

¹⁹Süla Niepu-u Ukepenuopfü hakemhie puya; A rheiketuo mhiei, a puo thiketau rüseu tsiu puo a ze dietseidiekhokelie bierhuokewau la a puo tsü gei a khepu zotuo.

²⁰A jal kelhapie puo gei shütuo, mu a ciephrie nunu puo malietuo; a puo ze Babilon nu votatuo sidi sünunu puo a petsou di mhakesuo chüyakecü la puo dienyakecütuo.

²¹Puo chüpahi kevithoko[21] zhiecha geinu tetsutatuo, mu peshakelieko kezapie teikhrie nu shüwatuo; sitse noe a Jihova zoükecüu pushüketa silietuo

²²Niepu-u Ukepenuopfü hakemhie puya: A a thuo zokecü sedarbo kerükrietho-u geinu puoco kerükrietho-u lielietuo; a süu khapie bawatuo. A puoco medzü kebau mezü geinu puo nuothe puo thelietuo; a a thuo süu pie thechü kerükrie mu kijüthou kerükrie geinu seshütuo.

²³Israel kijüthou kerükrie geinu a süu seshütuo, süu bu puoco the parlie, di puosi rüchülie, di sedarbo kevi puo chülieketuo la. Siro puo khronu pera kehoupuorei lhoutuo; mu puo coko khrükhro nu puoshü chükepfü ra pete vor rüsetuo.

²⁴Lie nu seibo pete rei a Jihova zo ücü silietuo. A seibo kerükrieko bie kerünuowa, seibo kerünuoko bie kerükriewa. A seibo kepejoko bu siata mu siaketa seiboko bu lhou vi se partuo. A Jihova thuo pushü; a chü tseishütuo.