Read Angami Naga Ezekiel 18 Bible Online

Ezekiel 18 - Angami Naga bible

Ezekiel 18

¹Jihova die a ki vor di sie:

²Nie kedipuo la Israel kijü hau dze mhasidie pu la mu pu la di, “Mia krünuokoe khubesi kekhro cüshü ru u nuonuoko hu mekre bate” iba ga?

³A rheiketuo mhie, Niepu-u Ukepenuopfü puya, mhasidie hau Israel nu nie bu pu salie lho.

⁴Kerheiro pete a vie, mia krünuoko kerheiro tuoi mia nuonuo kerheiro rei a vie ücü siliecie, themia kephouma chüyakezhau rübei sia zotuo.

⁵Mhanuü mia puoe miatho mu thezho tou tsiu kemezhüu chüya liro,

⁶Mhanuü puo kijüthou geinu mha cüükrie mo morei tosie puo mhi bu Israel kinu terhuorhi mehota mo, puo zanuou kimia perhuwa mo, morei thenumia kerhu se keba ki penuo vo molie,

⁷mia puo rei pesewa mo, derei puo diekhakeshü se di thepupfüketuo kelashülie, mhapuorei rügu mo, niekhrüda pie merüketuou tsüshü mu pfhemenei pie methuoketuou wheshü,

⁸pedzüperie puoprapuoshü lie mo morei puopra phrüpie puosou salie di puopra phrü la mo, kesuokechü nunu puo dzie kethelie, kenya kethanie donu kemezhü cau chüshülie,

⁹a zhoko medzi, mu menuo di ae pethakeshüko sebalie, dietho di mhachülie, sikecümia miathomia; puo rheilie petuotuo, Niepu-u Ukepenuopfü siya.

¹⁰Mhanuü puo puo nuo thepfumia mha kesuokechü puo, mia zie pekrukezhamia puo,

¹¹mha hako kehoupuorei chüta (puo puo mha süko puorei chü morei), sidi kijüthou gei mha cüükrie, puo zanuou kimiapfü bie perhu,

¹²mhakejümia mu ketsopfhümia pese, mia vie rügu, puo die khakeshüu se balie mo, tosie terhuorhiko mehota, mha kerütsekecüko chü,

¹³pedzüperie mia ki mhapie mu puoprapuoshü pielie, siliro puo rheilie vi me? Puo rheilie lho zo. Puo mha kerütsekecü hako chüwate; puo sia petuo zotuo; puo zie thuo puo tsü gei pfütuo.

¹⁴Derei mhanuü mia puo puo nuo thepfu puo nyi mu puo kephouma chükecü pete ngu, süko leshü, di sükemhie chü molie.

¹⁵Sidi kijüthou geinu mha cüükrie molie, morei tosie Israel kinu terhuorhiko meho molie, puo zanuou kimiapfü bie perhu molie,

¹⁶mia puo gei rei kekrü molie, mia ki diekhakeshü pie molie, mia vie rügu mo, derei puo niekhrüda pie kemerüko tsü mu pfhenei pie methuokezhüko tsü,

¹⁷mhakesuokechü[22] nunu puo dzie kethelie, pedzüperie mia ki mha lie mo morei puoprapuoshü lie mo, a zhoko se balie, a kepethadieko medzilie; siliro puo puo kephouma la puo siatalie lho; puo rheilie petuo zotuo.

¹⁸Siro puo puo la we, puo mia kechükede, puo siezeu vie rügu, mu puo themia donu mha vi kemo-u chü la ro, puo thuo puo kephoumako la siatuo.

¹⁹Sishierei nie sie, “Kiüdi puo nuo bu puo puo kephouma la kemezhie mo ga” isiya. Puo nuou thezho tou-u mu kemezhüu chükecü, tsiu u zhoko pete menuo se balie ro, puo rheilie petuo zotuo.

²⁰Themia kephouma kechüu siata zotuo. Mia nuonuo bu puo krünuo kephouma la kemezhielie lho, morei mia krünuo bu puo nuonuo kephouma la kemezhielie lho, kemiathomia kemiatho-u puo vie zo; mu kerüzhümia kerüzhüu rei puo vie zo.

²¹Derei mhanuü kerüzhümia puo chüyakezha kephouma nunu rüdilie di a zhoko se balie mu thezho tou-u tsiu kemezhüu chülie ro, ukoe rheilie petuo zotuo, uko siatalie lho.

²²Uko kejokemou chükewa puorei rükra la di uko pejolie lho; uko chükelie kemiatho nunu uko rheilietuo.

²³Kerüzhümia siaketa geinu a kenei huo bayaü me mu, Niepu-u Ukepenuopfü siya, uko bu uko zhoko nunu rüdilie di rheikelie a neiya moü me?

²⁴Derei kemiathomia u kemiatho nunu tsiesie la se kephouma mhatho kechü nu vota di kerüzhümia chüyakezhako mhie di chütaü ro, uko rheilie vi me? Uko kemiatho mhatho kechü puorei rükralie lho; kekreilamonyü uko kejokechü mu uko kephouma chükewa la uko sia zotuo.

²⁵Sishierei nie-e sie, “Niepu-u zho-u puotou mote,” iya. Süla tsie rünyüliecie, he-i Israel kiu: A zho-u puotou mote le? Nie zhoko puotou mota moü me?

²⁶Kemiathomia u kemiatho nunu tsiesieta di mha kesuo chüta ro, uko süu la sia zotuo; uko mha kesuo kechü la uko bu sia zotuo.

²⁷Sirei kerüzhümia puo kerüzhü mhatho kechü nunu rüdilie di thezho tou mu kemezhüu chülie ro, uko kerheiro kelalietuo.

²⁸Kekreilamonyü uko mha kesuo chükewa pete leshü di sü nunu rüdilie ro, uko rheilie petuo zotuo, uko siatalie lho.

²⁹Sirei Israel kiue sie, “Niepu-u, a zhoko puotou mote” iya. He-i Israel a zhoko puotou mo le? Puotou moketa sü nie zhoko moü me?

³⁰Süla a nieko dienya kecütuo, he-i Israel kiu, nie pete rei nie zho ki ze di, Niepu-u Ukepenuopfü puya, thenoukedilie di nie kesuokechü pete nunu rüdiliecie; simo liro kesuokechüu nie pekawatuo.[23]

³¹Nie a petsou di mha kesuo kechü pete chü kediwaliecie, sidi nie thuo thenou kesa tsiu ruopfü kesa lieliecie! Kiüdi nie siatatuoüya ga? He-i Israel kiu.

³²Kekreilamonyü a mia bu siaketa a neiya mo, Niepu-u Ukepenuopfü puya. Süla rüreilie di rheiliecie.