Read Angami Naga Ezekiel 2 Bible Online

Ezekiel 2 - Angami Naga bible

Ezekiel 2

¹Puoe sie a ki: He-i themiau,[5] n phi gei thaliecie, sitse a n ki diepushütuo.

²Sidi puo a ki diepushü tse, ruopfü puo a nou leta, sidi a chüpie a bu thalieta, mu puo a ki diepuketa a silie.

³Puo a ki, Themiau, a n ketsepie Israelmiako, sier a perhieketa mia perhietuoyakezha seyie puo[6] ki shüzhie ho; uko mu uko puonuoko thie ketso rei a gei joümou tuote.

⁴Ukoe kemiakokecü tsiu u nou kere seyie zo. A n ketsepie uko ki shüzhie; mu no uko ki, “Jihova Ukepenuopfü Niepu-u hakemhie puya” ishülie.

⁵Uko thuo rünyü rei rünyü morei (kekreilamonyü ukoe mia perhietuoyakezha kiu zo), ukoe uko donu siedzekesimia puo keba silietuo.

⁶Mu no, he-i themiau, uko prei hiecie, mu uko dieko rei prei hiecie, kikhahu mu zohu thuo n zekecü chü zoshierei tsiu no seba donu keba chü zoshierei, uko dieko prei hie morei uko kengu-u la mezieta hie, ukoe mia perhietuoyakezha kiu zo.

⁷No uko ki a die pushütuo; uko thuo rünyü rei rünyü mo shierei, ukoe mia perhietuoyakezha kiu zo.

⁸Derei no we, themiau, a n ki kedipuo puya shi rünyüliecie; mia perhieyakezha kiu tuoi di mia perhie hiecie; n me mekuoshülie di a pie n ketsüu cüliecie.

⁹A mehoshü ru, thedzie puo petopie a kitsa shü, mu sünu leshütshü puo tuo.

¹⁰Puoe süu a mhodzünu kelhashü; mu süu puo mho shierei tsiu puo nou shierei thu, siro sünu thekrü mu kekra tsiu kemezhieketuo dze thupie tuo.