Read Angami Naga Ezekiel 20 Bible Online

Ezekiel 20 - Angami Naga bible

Ezekiel 20

¹Siro cie thenieu cie, khrü pengou-u nu zha ker nhie, Israelmia phichü kropuo Jihova ki mha ketsotuoü vor, di a mhodzünu balie.

²Sitse Jihova die a ki vor di sie:

³Themiau, Israel phichüko ki pushülie, uko ki: Niepu-u, Ukepenuopfü hakemhie puya: Kiüdi nieko vorya ga? A ketsotuoü le? A rheiketuo mhie, Niepu-u, Ukepenuopfü puya, a nieko pie a kitsalie lho.

⁴No uko dienyakecütuo me? Themiau, no uko dienyakecütuo me? Siüro no uko bu u puonuoko kerütsekecüko siliecie,

⁵sidi uko ki: Niepu-u Ukepenuopfü hakemhie puya: A Israel kedakelie teisozha nhie, a Jakob seyieu ki rüseshü, Ijipt kijü nunu a thuo a pie uko pesishü, a uko ki rüse di sie, a Jihova nie Kepenuopfü, sishü.

⁶A Ijipt kijü pfhüpie tsükeshüu, mithunudzü mu mepfhidzü krukezhü kijü nu kijü pete donu vithedze chü zokecüu nunu uko ze kepar nhie uko ki rüseshü.

⁷Sidi a sie uko ki, themia kehoupuorei puo mhi ki mha kerütsekecüko chü kelhouwalie, sidi Ijipt terhuorhiko se nieko chüperhuwa hiecie; Jihovae nie Kepenuopfü zo.

⁸Derei uko a petsou, sidi a pfhe rünyü mvü; uko miapuorei u mhi ki mha kerütsekecüko chü kelhouwa mo, morei uko Ijipt nu terhuorhiko khawa mo. Süla ae a nouyie rupie uko gei shü di Ijipt donu nu a nouyie pie uko petsoutuoükecü leta.

⁹Derei a za la mhachüshü, uko bu pelekemomia donu lhou bayakezhako mhingu kinu a perhuwa molie, mu uko mhingu kinu Ijipt kijü nunu uko ze parkeshü geinu a thuo a chüpie uko pesipengukeshüko la.

¹⁰Süla a Ijipt kijü nunu uko chatha ze par sidi uko ze rayha nu vorshü.

¹¹A a zhoko khapie uko tsüshü, mu a kepethadieko pie uko pekieshü, kehoupuorei süko medzikeliemia sügeinu rheilieketuoko.

¹²Sümhorei a sabatko pie uko tsüshü, uko mu a donu zasi puo chütuoü di, sidi uko bu a uko chü kemesashüyakezha Jihova zoücü silieketuo la.

¹³Derei Israel kiu rayha nunu a petsouta; uko a zhoko se balie mo derei a kepethadieko kehoupuorei medzi ro rheiketuoko khawate; sabatko perhupie kemerie chüwate. Süla ae rayha nunu a noupfhü rupie uko gei shü di uko pekatseiwatuoü lesie.

¹⁴Derei a za la mhachü, sidi uko bu seyie, u mhingu kinu uko ze parkeshüko mhodzünu uko perhuwa molietuoü di.

¹⁵Sümhorei a rayha nunu uko ki rüse di a mithunudzü mu mepfhidzü krukezhü kijü, kijü pete donu vithedze chü zokecü kijü pie uko tsütuoü keshüu nu uko ze vo lhoüwa.

¹⁶Kekreilamonyü uko a zhoko khawa mu a kepethadieko sebalie mote, sidi a sabatko perhu; kekreilamonyü uko noue süko rhuoko kitsa vota.

¹⁷Sishierei a mhi uko therta mo, sidi a uko pekawa mo morei rayha nunu uko peka tseiwa mo.

¹⁸Siro a rayha nunu uko nuonuoko ki pu di, Nie krünuoko zhoko medzi hie morei uko terhuorhiko se nie perhuwa hie.

¹⁹A Jihova nie Kepenuopfü; a zhoko medziliecie, sidi a kepethadieko ze menuo baliecie.

²⁰Siro a sabatko se kemesalie, süu a mu nieko donu zasi puo zo, nieko bu a Jihova nie Kepenuopfü silieketuo la.

²¹Derei nhicuko a petsoute; uko a zho ze mvüte, mu a kepethadieko kehoupuorei medzilie ro rhei balietuoükeshüu se menuo balie mo; sidi uko a sabatko perhuwa. Süla ae rayha nunu a noupfhü rupie uko gei shü mu a nouyie se uko petsoutuoü lesie.

²²Derei a dzie kethewa, sidi a thuo a za la mhachü, uko bu a uko mhingu nunu uko ze parkecü seyieko mhodzünu nu u perhuwa motuoü di.

²³Sümhorei a uko seyieko bu cüre tuota mu uko bu rünako nu kezakezi tuotatuoü di rayha nunu a uko rüsewa,

²⁴Kekreilamonyü ukoe a zhoko zelie mo, derei a kepethadieko khawa di a sabatko perhuwa, tsiu uko mhi bu uko puonuoko terhuorhiko meho.

²⁵Sizomonyü a thezho vi kemo medzi liro uko rheibalie motaketuo kepethadieko rei khashü.

²⁶A uko mha methuo khakeshüko nunu uko bie perhuwa, uko nuorie pete se ruosuo kechü nu, a uko bu kemerieketuo chüshü, sitse ukoe a Jihova zo ücü silietuo.

²⁷Süla, themiau, Israel kiu ki pushülie, sidi sie Niepu-u Ukepenuopfü hakemhie puya: Nieko puonuokoe a gei dietho mokecü hau nunu a zha sewate.

²⁸Kekreilamonyü a uko ze rüse di uko tsütuoükeshü kijü nu vorlie tse, uko kehoukipuorei kijükhru kerükrie morei nhanyü kehoupuorei ngu shü, sidi uko ruosuo chü di a nou chü kemeyie; sünu nu uko mharekethengu khashü, tsiu kekrie ruosuo rukeshü la.

²⁹(A uko ki, nieko voyakezha thechü kerükrieu kedipuo ga? Süla thie ketso süu üse Bama[27] üta.)

³⁰Süla Israel kiu ki pushücie, Niepu-u Ukepenuopfü hakemhie puya. Nie nie puonuoko zhoko mhie mu uko mhakerütse chükecü mhie di nie perhu latuo me?

³¹Nieko mhakhakeshü tsiu nie nuonuo thepie rüsuo di nie thuo thie ketso rei nie terhuorhiko se nie chü perhuwate. Sidi nieko vor a ketsokecü mese me, he-i Israel kiu! A rheiketuo mhie, Niepu-u Ukepenuopfü puya; nieko bu a ketso lho.

³²Nieko kedipuo nie nou ba shi, nie lekecü, “Uko seyieko mhielie khe, rünako nu seyieko mhie khe, sidi sei mu ketsie rüsuo khe” ibaketa mese mo.

³³A rheiketuo tuoi, Niepu-u Ukepenuopfü puya, a dzie kekuo se mu a bou yhapie di, tsiu a noupfhü rushü di, a nieko mho kedi chütuo.

³⁴A a dzie kekuo mu a bou yhapie di mu a noupfhü rushü di themiako donu nu nieko pfhü kengulietuo;

³⁵mu a nieko ze rayha nu themiako ki vortuo, sidi sünu nu a mhotsou nie dienya kecütuo.

³⁶A thiedzü Ijipt kijü nu rayha nunu nieko puonuoko dienya kecükecü tuoi, sütuoi a nieko dienya kecütuo, Niepu-u Ukepenuopfü siya.

³⁷A nieko bu ketheu khro votuo, di a nieko ze dietseidiekho pie kebau nu vortuo.

³⁸A nieko donu mia perhieyakezhamia mu a gei jowaketamia chü kemesawatuo; a uko chazoumia chü di lhou baketa ranu uko ze parshütuo, derei ukoe Israel kijü nu lelie lho. Sitse uko a Jihova zo ücü silietuo.

³⁹Siro no we, he-i Israel kiu, Niepu-u Ukepenuopfü hakemhie puya: Nieko a pfhe rünyülie lho zotakecü sie, tuo vo di mia puopuo puo thuo puo terhuorhi rüsuo tuotacie, tsierei hasie rei si tuotaliecie, derei nie bu cüsie mha khakeshü nu nie terhuorhiko se di a za kemesau perhu salie lhote.

⁴⁰Kekreilamonyü Niepu-u Ukepenuopfü puya, a kemesa kijüthou gei, Israel kijüthou mezü gei, sünu Israel kiu pete, uko pete, kijüu nunu a lie chütuo; sünu a uko lielietuo, mu sünu nu nie mha khakeshüko mu mha methuo khakeshü kevithoko nie kemesa vieko sa di a lietuo.

⁴¹Ae mharekethengu puo tuoi di nieko lielietuo, a themiako donunu nieko ze parkelie ki, mu nieko cüre tuoketa rünako nunu nieko ze par kengukelie ki, a seyieko mhingu kinu a za kemesau nie donu nu tha pekieshütuo.

⁴²Siro a nieko ze Israel kijü nu, nie puonuoko tsütuoü di rüsekeshüu nu vorkelie ki, niekoe a Jihova ücü silietuo.

⁴³Sitse sünu nu niekoe nie zhoko mu nie mhatho chü di nie perhuwaketako rükralietuo; mu nie mhathokesuo pete la nie thuo nie mecütatuo.

⁴⁴Siro a nie mhatho kesuoko morei nie tho puotou kemo chükecü mhie mo di, a thuo a za la nie gei mhachükeshü ki, nieko a Jihova zo ücü silietuo, he-i Israel kiu, Niepu-u Ukepenuopfü puya.

⁴⁵Jihova die a ki vor di sie:

⁴⁶Themiau, n zie pie pekhrotsa valie, sidi pekhrotsa petsoukecü pushülie, sidi Negeb nu nhatsa kijü petsoukecü siedzekesidie pushülie.

⁴⁷Negeb nhatsa ki pushülie, Jihova die rünyüliecie: Niepu-u Ukepenuopfü hakemhie puya, a nie gei mi petushütuo, mu süue nie gei seibo kepejo pete mu seibo kesia pete thewatuo, miüu tshülie kenjütatuo, sidi pekhrotsa nu vo pesotsa ketso nu keba pete thewatuo.

⁴⁸Sitse chüüphou kepfü pete a Jihova süu petushü ücü silietuo; mu süu tshülie kenjüta zotuo.

⁴⁹Sitse a sie, “Hou, Niepu-u Ukepenuopfü! Ukoe a pu di, ‘Dieviko chükeshüu puo mo me?’ ituo” sishü.