Read Angami Naga Ezekiel 21 Bible Online

Ezekiel 21 - Angami Naga bible

Ezekiel 21

¹Jihova die a ki vor di sie:

²Themiau, n zie pie Jerusalem tsa valie di kemesachüu petsoucü die pushülie; Israel petsoukecü siedzekesidie pushülie.

³Sidi Israel kijüu ki, Jihova hakemhie puya: A nieko petsoutuoü vorzhie, mu a zhiechau puo zhiesha nunu shüzou se partatuo, sidi a geinu kemiathomia mu kerüzhümia dawatuo.

⁴Kekreilamonyü a geinu kemiathomia mu kerüzhümia dathewatuo, süla a zhiechau puo zhiesha nunu shüzou se par pekhrotsa nu vo pesotsa ketso petsoutuo.

⁵Mu chüüphou pete rei a Jihova zo kecüue a zhiecha puo zhiesha nunu shüzoulieketa silietuo; süu pie zhiesha nu lashülie lho.

⁶Süla thenousuolie, themiau; n meloukechü chülie mu uko kengu kinu thenousuo selie.

⁷Siro uko sie n ki, “No kiüdi thenousuo ba ga?” ikecü ki, no sie, “Kekreilamonyü dielie vorkecüko lalie. Thenou pete thachütatuo mu thedzie pete mezietatuo, ruopfü pete phisiatatuo, mu khoudza pete rei dzü mevitatuo. He-i süu vortuo mu süu chü tseishütuo” situo. Niepu-u Ukepenuopfü puya.

⁸Siro Jihova die a ki vor di sie,

⁹Themiau, siedzekesi die pushülie: Jihova hakemhie puya, Zhiecha puo, zhiecha puo kerüliete, süu chü kemesaliete.

¹⁰Süu se dukhriketuo la kerüliete, teikemela tuoi melei bate! Kiüdi hie hie nei balie ta? No ketheu rütsete, mu pethapetseikecüko pete.

¹¹Zhiechau chü kemesaketuo la khashüwate; thedzieu bu pielietuoü di; süu kerüliete, zhiechau chü kemesaliete, mia dukhriketuou dzie nu khashütuo.

¹²Kralie tsiu mepfülie, he-i themiau; kekreilamonyü a themia petsoutuo, süu Israel kedinuoko pete petsoutuoü, uko kelhoupie zhiechau ki shüwate, a themiako ze di. Hou! N do kepfhüshücie!

¹³Leshücie: Kedipuoa! Noe ketheu rütseta ro, süu si motuo me? Niepu-u Ukepenuopfü puya.

¹⁴Siro no, themiau, siedzekesidie pushülie; N dzie kepfhüshücie. Zhiechau bu va kenie, va se rei te tsucie; süue mia dukhriketuo zhiecha puo. Mia dukhri sewaketuo zhiecha puo; süu uko houpfüliete.

¹⁵Süla themiako melou thachü bate, mu mia kekra phi mesüwate. A uko kharu peteko nu zhiechau tha chüpie bate. Hou! Süu bie kemelei[28] se bate, süu mia dukhriketuo la chü kemesaliete.

¹⁶Thezatsa perhielie! Thevitsa va volie! Kehourapuorei nie zie petsou kebara.

¹⁷A rei a dzie nie kepfhüshütuo, a noupfhünouyieu rushütuo; a Jihova thuo pushüte.

¹⁸Jihova die a ki vor di sie:

¹⁹Themiau, Babilon kediu zhiechau bu vorlieketuo la cha kenie chüliecie; kenienie rei kijü puo nunu partuo. Sidi zasi tsie puo seshülie, süu nadi nu kele cha tietshü nunu seshülie.

²⁰Ammonmia kijü nu Raba morei Judamia morei Jerusalem dahou nu zhiechau bu vorlieketuo la cha puo chüshülie.

²¹Kekreilamonyü Babilon kediu chanie tietshü kiki, cha nie ketieriekecü nu, themoutuoü di thathate, puoe theüko chükenyie, puo terafim[29] ketso, puoe mha se meho.

²²Puo zatsa la Jerusalem la themou-u ba, mia kekhaketuou khashütuoü, dukhriketuo la shieshütuoü, rüyachü pfhe shieshütuoü, kharu petsouketuou khapie batuoü, tsiepfhe pfhetuoü, dahou houtuoü thate.

²³Derei süu uko ki we kemeduo themou tuoitatuo; uko pecü sekecü rüse puo rüsewa; derei puo uko bu rükraketuo la uko kejo-u se la vorshü, uko penyüwatuoü zhükecüu.

²⁴Süla Niepu-u Ukepenuopfü puya: Nieko nie kejoko rükratuoü bata kecü la, sünu nu nie kesuokechüko nguliete, sidi nieko mhatho pete nunu nie kephouma ngu parta; kekreilamonyü nie rükralietuoü, thedzie pie nieko telietuo.[30]

²⁵N la we, themia kesuou, Israel kedi kerüzhüu, puo teisozhau vorte, siazha thela teiu vorte,

²⁶Niepu-u Ukepenuopfü hakemhie puya: N tsüzeu rhuowalie, keditsüre chüwalie; mhatho thiedzü kemhie balie lho. Kerünuou chü kerükrielie, kerükriemia chü kerünuowalie.

²⁷Kepekau, kepekau, kepekau, a süu chüshütuo! (Sükemhie mhakipuorei chü mo.) Themia puotou vorlie kemochie si batuo; sidi a süu pie puo tsüwatuo.

²⁸N la we, themiau, siedzekesidie pushülie, Niepu-u, Ukepenuopfü Ammonmia dze tsiu uko pesekecü dze pu di sie: Zhiecha puo, zhiecha puo! Mia dukhriketuo la shüzouliete. Mha bie pejüwaketuo la chü kemesaliete[31], teikemela tuoi meleilietuoü di.

²⁹N la ziemho-u kekrükecü khashüya, n la themou-u kemeda puya, ukoe kesuomia, kerüzhümia vo-u pie n geishü, uko teisozhau vorketa la, siazha thela teiu vorte.

³⁰Süu bu puo zhiecha nu votalie! No kirapuonu n chülie shikecü sa, n penuokelie kijüu nu, a n dienya kecütuo.

³¹A a noupfhü rupie n gei shütuo, ae nouyie miu pie n gei mhe petushütuo. A n khapie u zhokesuomia, mia pekakecü do siyakezhamia dzienu shüwatuo.

³²No mi la midzü chütatuo, n zie kijü gei zhütatuo, n rükra salie lho, a Jihova süu pushüwata zocü la.