Read Angami Naga Ezekiel 22 Bible Online

Ezekiel 22 - Angami Naga bible

Ezekiel 22

¹Jihova die a ki vor di sie:

²No, themiau, no dienyakecütieya mo, no thezie krukezhü nadiu dienyakecütuoüya me? Siüro süu mhatho kerütsekecü pete se puo pesishücie.

³Sidi no sie, Niepu-u Ukepenuopfü hakemhie puya: Nadi puo! Thezie kepekru thuo puo nu tshupfü; puo teiu vorte; puo terhuorhiko chü di puo thuo puo perhuyakezhau.

⁴No thezie pekrukecü nunu jote, mu terhuomiarhiko chükecü nunu n perhuwate; no teisozhako bu penuo vorkelie chüshü mu chiepie keba n teicieko vor bate; süla seyieko bu n pesetuoü mu rüna pete krenyü chütuoü n chüshüte.

⁵N penuo keba tsiu n ze kepetseketuoko rei n kretuo no mhathomharo kemo-u, kemezhiekecü thuo tshupfü bate.

⁶Israel kedinuonuo n gei kebako, mia puopuokecü u thuo u medo chü, thezie pekrutuoü rü tuo zo.

⁷N gei mia puo mu mia zuo üse mhaü mote, chazoumia n donu lhou ketuoko u kechükedecü la kemezhie, n geinu merünuoko mu samipfüko pese.

⁸No a vie kemesako rütsete, tsiu a sabatko bie perhuwate.

⁹N gei mia dukhri di theziepekrutuoükecüko ba, n geinu ukoe kijüthouko geinu mhacümhakrie, n donu nu uko rügerüzhüya.

¹⁰N geinu uko u puonuo kemethuo ngu, n geinu ukoe thenumia kerhusekebapfü zhasewa.

¹¹Siro mia puoe puo zanuou kimia ze mha kesuo chü, kekreimia puoe rügerüzhü di puo miepfü perhu, tsiu n geinu mia puoe puo üpfü, puo puou nuopfü ze zhü.

¹²N geinu uko thezie pekrutuoü theso pielie; noe pedzüperie puo pra tsiu puo meviko lielie, di n zanuoko kechükede di mevilie; mu a rükra mote, Niepu-u Ukepenuopfü hakemhie puya.

¹³Harie, no tijü di mha prakelie lanu tsiu n gei keba thezieu pekruketa la a a dzienie kepfhüshü.

¹⁴N gei mhachükeshü nhie no thepfu thalie morei n dzie metei thalie vi me? A Jihova thuo pushü, mu a süu chüshütuo.

¹⁵A nieko bu seyieko donu cüretatuo mu nieko bu rünako nu kezakezi votatuo tsiu n geinu n kerhuko bie pejüwatuo.

¹⁶Sidi seyieko mhingu nunu n geinu a perhuwatuo; sitse nieko a Jihova zo ücü silietuo.

¹⁷Jihova die a ki vor di sie:

¹⁸Themiau, Israel kiu a la bouthuota zo; uko pete, rakachü, merenyi, tinyü, thegi tsiu sethi rei.

¹⁹Süla Niepu-u Ukepenuopfü hakemhie puya: kekreilamonyü nieko pete bouthuo chüketa la, a nieko kengupie Jerusalem metsuo nu shülietuo.

²⁰Mia puoe rakachü, merenyi, thegi, sethi mu tinyü kengupie thekecüu nu shülie, sidi the pezhawaketuo la puo mhogei mi mheshüyakezha tuoi, sütuoi a a noupfhü tsiu a nou kerüpe nunu nie pfhü kengulie, sidi a nieko khapie sünu shü di nieko the pezhawatuo.

²¹A nieko pfhü kengulietuo, sidi a noupfhü nunu nieko gei miu mheshütuo, tsiu nieko süu nunu the pezhawatuo.

²²Rakachü miü nu the pezhawayakecü tuoi, sütuoi nieko süu nunu thepezhawatuo; sitse niekoe a noupfhü rupie nieko gei shüshü ükecü silietuo.

²³Siro Jihova die a ki vor di sie:

²⁴Themiau, puo ki pushülie: Noe mesalie kemo, noupfhü teisozha nhie teirü tsurlie kemo kijüuta zo.

²⁵Puo kedinuokoe[32] losha puo chüte pfhü di mehoketuo mhie zo; uko themia kerheiro mezuliete; uko kinyi mu mhama kereko lieliete; uko samimia kekra chüliete.

²⁶Puo zievoko a kepethadieko varhuo mu a vie kemesako perhuwa; uko mha kemesa mu kerhu vieko chü kekreilie mo; mu uko a sabat rhu mo, sidi uko donu nu a perhuwate.

²⁷Puo donu keba kezhako socie puoe chüte pfhü keba mhie zo, thezie pekrutuoü tsiu kemeda nunu mevituoü di kerheiro pekaya.

²⁸Puo siedzekesiko sounu u nyhü pekrapfü, ziemho kemeda ngu mu uko la kemeda pu di sie, “Niepu-u Ukepenuopfü hakemhie puya,” siya. Jihova mhapushü mo zoürei,

²⁹kijüu nu themiako mia kechükede mu mia vie seya; uko ketsopfhümia mu kejümia peseya, mu chazoumia gei puotou mo di mha pecüpelhieya.

³⁰Siro a uko donu sozhau memielieketuo mu kijüu sounu a mhodzünu thalieketuo pfhü, sidi a süu pekawa motuoü sie; derei a miapuorei ngulie mo.

³¹Süla a a noupfhünouyie rupie uko geishü; sidi a nouyie miu nunu uko thepejüwa; a uko zho-u chüpie uko tsüko gei lashü, Niepu-u Ukepenuopfü puya.