Read Angami Naga Ezekiel 23 Bible Online

Ezekiel 23 - Angami Naga bible

Ezekiel 23

²Themiau, thenupfümia kenie ba, unie miapfü puo nuo,

³unie Ijipt nu thethelieya; unie u rüü teiki thethelietuota; unie nu mu unie merü mia bu biewa.

⁴Phichüpfü za Ohola mu nhicupfü za Oholiba. Unie a vie chüta, sidi unie nuo thepfumia mu thenumia rei penuo. Unie za kemhie, Ohola liro Samariamia, mu Oholiba liro Jerusalemmia.

⁵Ohola a vie chü keba nu rügerüzhü tuota; puoe puo kekhriemia Asiriamia terhü miavimia ze rüzhütuota,

⁶sümia pfhe keloshükecü dzie, kezhamia mu mia kekhayakezhamia, uko pete rei khriesa medzü di zivi phi phre, gura gei ketuomia phre.

⁷Puoe puo keneiu khapie uko gei shü, Asiriamia kevithomia pete geishü, sidi uko terhuorhiko se puo thuo puo perhuwa.

⁸Hapfüe Ijipt nunu chüyakezha puo rügerüzhüko khawa mo zo; kekreilamonyü puo rüü teiki nu thepfukoe puo ze zhü, tsiu ukoe puo phouse merü bie mu uko chüüphou menguko pie hapfü geishü.

⁹Süla a puo khapie puo kekhriemiako dzie nu, Asiriamia puo menguketako dzie nu shüwa.

¹⁰Hako puo kemethuo nguwata; sidi uko puo nuo thepfuko mu thenuko rei telie; sidi uko zhiecha pie puo dukhriwa. Süla ketsokecüu pie puo geishü, sidi puoe thenumia donu miadze miase chü.

¹¹Siro puo siezepfü Oholiba hau ngushü, sirei puoe mia rüzhükecü nu mu thetheliekecü nu hapfü kirei suokuo, sidi puo dzüriepfü kirei suokuota.

¹²Puoe Asiriamia kezhako mu mia kekhayakezhako, terhümiavimia rünyie pete se ketuoko, gura themia gura gei ketuoko, uko pete rei khriesa zivi phikecüko ze rügerüzhü.

¹³Siro a puo rhuketa ngu, unie kenienie cha kemhiekecü puo nu vota.

¹⁴Derei hapfü we thepfumia rhipie ketha ngu, Chaldianmia miarhi merieyharakecü pie kechü.

¹⁵Uko chieca nu uchiepha pie phapfü, u tsü gei tsüze mesümedekecü se, uko pete rei ngupie kezhamia kemhie Babilonmia Chaldian kijü nu kelhou miarhi ngukeshü ki rügerüzhü kuota.

¹⁶Hapfüe süko ngukeshü ki süko mengu vota, di dieliemia ketsepie Chaldian nu shü.

¹⁷Sitse Babilonmia kekhrie zhüu nunu puo ki ler, sidi uko menguko pie puo perhuwa, sitse hapfüe uko bu puo bie perhukewa sie, puoe puo nei mo se di uko ki nunu tuota.

¹⁸Siro hapfüe mia mhingu nunu rügerüzhü tsiu puo kemethuo mia bu nguketa ki, a puo dzüriepfü ki nunu rüreiketa mhie, puo gei a nei mo di puo ki nunu rüreita.

¹⁹Sishierei hapfüe puo rüü teiko Ijipt kijü nunu rügerüzhü tuo shicü rükralie, di rügerüzhü miemieta,

²⁰mu hapfüe themia uchü umo mengu-u gura tuoi menyhumezhie zo di mia ze rügerüzhü.

²¹Sidi noe n rüü ki Ijiptmia n phouse nu n merü mu n nu biekecüu mengute.

²²Süla, he-i Oholiba, Niepu-u Ukepenuopfü hakemhie puya: A n kekhriemia, no n nei mo di uko kinu rüreiketamia, bu sier n petsoutuo, sidi ae lutsa hatsa nu uko bu vor n petsoutuo;

²³Babilonmia mu Chaldianmia pete, Pekod mu Shoa mu Koa, tsiu uko sa di Asiriamia pete, khriesa kezivi pete, ahngko mu mia kekhayakezhako pete, kezhako mu terhümiavimia[33] pete, uko pete rei gura seyakezhamia phre.

²⁴Sidi ukoe pesotsa nu guragariko mu themia krodi ze vor n petsoutuo; sükoe lutsa hatsa keya, pezhü mu thegi tsüre se di n petsoutuo, mu a ketsokecüu pie uko gei shütuo, tsiu ukoe uko zhoko medzi di n dienya kecütuo.

²⁵Siro a nouyie kereipie n geishütuo, uko bu nouyie se di n ze keseketuo la. Siro uko n nyhüca mu n nyieto dathewatuo, mu keshako zhiecha geinu tetsutatuo. Ukoe n nuonuo thepfuko mu thenuko rei telietuo, mu nie peshapie kebako mi bu thewatuo.

²⁶Siro ukoe n pfhe lhewatuo, tsiu n pienyie keziviko sesetatuo.

²⁷Sidi a n geinu n rügerüzhü, siro Ijipt nunu se vor di thetheliekecüu bu ba sa motatuo; no süko mengu salie lho, morei Ijipt rükra sa motatuo.

²⁸Kekreilamonyü Niepu-u Ukepenuopfüe hakemhie puya: A n ngumecüyakezhako dzie nunu n kelashütuo, no n nei mo di uko kinu rüreiketako dzie nunu uko kelashütuo;

²⁹mu ukoe n ngumecütuo, sidi n mhatho siko pete chüsetatuo, mu n bu methuo mu phoulhuo zhütatuo, tsiu no thethe lie di methuo kezhüu mia bu ngutuo. N rügerüzhü mu no thethe liekecü.

³⁰Hanie se n gei vortuo, kekreilamonyü noe seyieko ze di thethelie, di uko terhuorhiko se n thuo n perhuwate.

³¹Noe n dzüriepfü cha ze vote; süla a puo hieu pie n dzie nu shütuo.

³²Niepu-u Ukepenuopfü puya: No n dzüriepfü hieu krietuo, sou mu zha; mia n thitatuo mu n kretuo, süu mha kekra ba eru.

³³Kemeze tsiu thenoukesuo bu n tshupfülietuo. Kemeriekecü hieu mu thedzükekou hieu sü n siezepfü Samaria hieu zo.

³⁴No süu krietuo mu süu metelietuo, mu süu kezeu bierhawatuo; siro n merü cierhawatuo; kekreilamonyü a pushüwate, Niepu-u Ukepenuopfü siya.

³⁵Süla Niepu-u Ukepenuopfü hakemhie puya: Kekreilamonyü no a khawa mu a kelhoupie n sietsa shüwaketa la, süla n thuo n rügerüzhüko mu thethe liekecü zhakhrau toupfüliecie.

³⁶Siro Jihova a ki: Themiau, no Ohola mu Oholiba unie capi chütieya me? Siüro unie mhatho kerütsekecüko se unie ki pushüliecie.

³⁷Kekreilamonyü unie pieü chü, mu thezie unie dzienu tuote; unie terhuorhiko se di unie thethe lietuote, mu unie-e penuopie a ketsü nuonuoko se unie rhuoko la kecüca puo chü di ruosuo chü.

³⁸Sümhorei mha hau chüpie a geishü; unie sünhie zo di a kemesachüu perhu mu a sabatko perhuwa.

³⁹Kekreilamonyü unie nuonuo dukhripie unie terhuorhiko tsü, sünhie zo di unie a kemesachüu perhutuoü di khor. Hanhie kemhie di unie a kiu gei mhachüwate.

⁴⁰Süsierei no themia kepetsera ketuomia bu vornu di kie, süko ki dieliemia puo ketseshü, mu süko vor. Süko la noe n thuo dzürüluwa, mhapie n mhi kenhelie, tsiu rütsonyako pie n thuo n ketsolie;

⁴¹sidi n zhü gei balie, süu mhodzünu mizhü puo khashülie, sidi sügei a vie mharekethengu tsiu a tier khapie balie.

⁴²Siro miakra pfhe mevükhoui di puo houpfü ba, rayha nu themia kesuo mezekecü kekra ze vor; mu sükoe thenumia thuo setuo, mu keditsüre kezivi u tsü gei pfütuo.

⁴³Sitse a sie: He-i hapfüe pieü chü di puo nyietuote, derei ukoe hapfü ze pieü thoko se tuo zo.

⁴⁴Kekreilamonyü ukoe hapfü ki lete, mia puoe thethepfüpuo ki kele tuoi. Hamhie di uko Ohola mu Oholiba ki lete, thenu rügerüzhükecünie.

⁴⁵Derei kemiathomia capi-e pieükechü mu thezie pekrukecü kejo-u thashü uko kietuo; kekreilamonyü ukoe pieükechüpfü mu thezie u dzie nu ketuo chüte.

⁴⁶Kekreilamonyü Niepu-u Ukepenuopfü hakemhie puya: Uko petsouketuo la themia kro-u ze vorlie, sidi uko la kemeriekecü mu pekakecü vie chüshülie.

⁴⁷Themia kro-u ketsiepie uko vatuo mu zhiechako se uko dathewatuo; ukoe uko nuo thepfuko mu thenuko dukhriwatuo, mu uko gurako thewatuo.

⁴⁸Sükemhie di kijüu nu rügerüzhüketuo pie puo thela chüwatuo, sitse thenumia pete rei michielie di unie kemhie rügerüzhü molietuo.

⁴⁹Uko u rügerüzhü zhada vü tsiu niekoe nieko terhuorhiko la phoumaketa siazha pfütuo, sitse nieko a Niepu-u Ukepenuopfü ücü silietuo.