Read Angami Naga Ezekiel 24 Bible Online

Ezekiel 24 - Angami Naga bible

Ezekiel 24

¹Siro cie thepfüu cie, khrü ker-u nu, zha ker nhie Jihova die a ki vor di sie:

²Themiau, thie teisozha, hauha no thuliecie. Hanhieha Babilon kediu Jerusalem perhiete.

³Siro mia perhie tuoyakezha kiu, dievi kepuu nunu kerhieshücie di uko ki, Niepu-u Ukepenuopfü hakemhie puya: Gali puo peleshülie, süu dzashülie, süu dzü rei rushülie;

⁴Sünu puo themuo khrieko khashülie, puokhrie kevi pete, puo do-u mu puo boukau; süu nu puoru keviko pie puo tshushülie.

⁵Tekuoko donu kevitho-u kedalie, sükhro nu seideko[34] theshülie; puokhrieko chashülie, süu nunu puoruko cha kemekhrolie.[35]

⁶Süla Niepu-u Ukepenuopfü hakemhie puya: Thezie kepekru nadiu, puo galiu mhouthie bate, mhouthieko khrü kemesalie kenjüketau ce, chülietie! Khrie puo puo di süu chü kemethuowalie, mhapuorei keda mo zo di.[36]

⁷Kekreilamonyü puo pekrukeshü zieu puo nu bate; hapfüe khapie tsiekrie methuo kezhüu geishü; puo süu rupie kijü shü mo, rünyopie süu whewa mo.

⁸A noupfhü pie sieshü, khepu lietuoü di, ae puo tsiekrie kemethuo-u gei thezie pekrukeshüu khapiezhüwe, süu whewa molieketuo la.

⁹Süla Niepu-u Ukepenuopfü puya: Thezie kepekru nadiu we ce, chülietie! A seithe pie mi chütuoükecüu chü pezha sashütuo.

¹⁰Seideko pfheshülie, mi petushülie; themuo cha pevi selie, mharekethengu kerei pevilie, puoruko thewalie.

¹¹Süsie puo bu methuota di süu pie mizhüko gei shülie, sitse süu lelietuo, süu merenyi bu le parlie, süu kerhuko the pezhawalie, puo gei mhouthieu bie pejüwaliecie.

¹²Kemethuo nu a thuo a bie kemezhielie; süu gei mhouthieu jülie mota. Süu mhouthieu mi nu bata!

¹³Sishierei a n kerhu kerütsekecü chü kemesawatuoükesie ki, no n kerhuko nunu mesalie mote; a nouyie pie n gei shü kemochie, mhakipuorei no n kerhu nunu mesalie lho.

¹⁴A Jihova thuo pushü; puoteiu vorzhie, a mhachüshütuo. A ketheta lho, a peshashülie lho mu n mhathoko ki ze a n dienya kecütuo, Niepu-u Ukepenuopfü puya.

¹⁵Jihova die a ki vor di sie:

¹⁶Themiau, a kepfhü kevi nunu n mhi menguyakezhau chüsetatuo; sishierei no kra morei thekrü chülie lho, morei n mhidzü krutsurlie lho.

¹⁷Kralie derei peto hie, kesiamia la thekrü puorei chü hie. N tsüzeu phapfülie, mu n phikou chüpfülie; n menyie peso-u whewa hie morei thekrü kechümia[37] niekhrüda cü hie.

¹⁸Süla a khise themiako ki diepushü mu thevatie a kimia siata. Siro süsie nhie a bu chünukeshüu chüwa.

¹⁹Sitse themiako sie a ki, “Mha hakoha no hai di chükeshü cako hie ki pushü lho me?” sita.

²⁰Sitse a uko ki, Jihova die a ki vor di sie;

²¹Israel kiu ki pushücie, Niepu-u Ukepenuopfü hakemhie puya: A a kemesa kiu perhuwatuo, nie kekuo kemelha bayakecüu, nie mhi keneiu, mu nie melou mengu-u; mu nie nuo thenu rei thepfu rei nie pesha pie kebako zhiecha geinu tetsutatuo.

²²Mu noe a chükeshü tuoi chütuo; no n menyie peso-u whelie lho, morei thekrükechüko niekhrüdau cülie lho.

²³N tsügei tsüzeu balie lho mu n phi gei phikou pfülie lho; no kra morei thekrü chülie lho, derei no n kejokemouko la thachütatuo, sidi huoniehuo gei meheimelotatuo.

²⁴Hamhie di Ezekiel nie la zasi puo chütuo; puo chükeshü tuoi nie rei chütuo. Mha hau kevor ki; niekoe a Niepu-u, nie Kepenuopfü ücü silietuo.

²⁵Mu no, themiau uko geinu uko dahou kemeteiu, uko kenei mu zayieu, uko mhi keneiu mu uko meloue khrie kebau, tsiu uko nuo thenumia mu thepfumia rei seketa nhie,

²⁶sünhie, takelieu ki thedzeko se vor pushütuo.

²⁷Sünhie n tie khrüshü di takelieu ki mha putuo mu no kemekrie ba salie lho. Süla noe uko la zasi puo chütuo mu uko a Jihova zo ücü silietuo.