Read Angami Naga Ezekiel 25 Bible Online

Ezekiel 25 - Angami Naga bible

Ezekiel 25

¹Jihova die a ki vor di sie:

²Themiau, n zie pie Ammonmiako petsoulie, uko petsoukecü siedzekesi die pushülie.

³Ammonmia ki pushülie, Niepu-u Ukepenuopfü die rünyüliecie. Niepu-u Ukepenuopfü hakemhie puya, kekreilamonyü noe a kemesa chü perhukewa ki, mu Israel kijüu chü kemethuokewa ki, tsiu Juda kiu mia die chü voketa ki, “Yha” isi di pute;

⁴süla a niathutsa mia bu n pie u vie chülietuoü khashüwate. Uko nie donu nu u razhüchüko chülietuo mu uko pfhekiko pethoupie nie donu batatuo; uko nie nhasi cütuo, mu nie thunudzü krietuo.

⁵Siro a Raba chüpie ut kebachü chüwatuo, tsiu Ammon pie tekuo kebachü chüwatuo. Sitse niekoe a Jihova zoücü silietuo.

⁶Kekreilamonyü Niepu-u, Ukepenuopfü hakemhie puya; nieko dzieda mu phide tsiu Israel kijüu petsou di nieko nou kelhie di nie nei bate.

⁷Süla a a dzie yhapie n petsoutuo, sidi nie khapie seyieko bu pekawatuo. A mia donunu nieko kelhiwatuo mu a nie bu rünako nunu kaüjütatuo; a nieko pekawatuo. Sitse nie a Jihova zo ücü silietuo.

⁸Niepu-u Ukepenuopfü hakemhie puya; kekreilamonyü Moab[38] sie, Juda kiue seyieko kemhie zo.

⁹Süla a rünako[39] tierie nunu Moab tietsa puo khrüshütuo, rüna zayiekechüu, Beth-jeshimot, Baal-meon, mu Kiriathaim.

¹⁰A Amon sa di süu khapie niathutsa kebamia bu u vie chütatuo. Hamhie di seyieko donu Amon rükra motatuo.

¹¹Mu a Moab nyie kecütuo, sitse ukoe a Jihova zo ücü silietuo.

¹²Niepu-u Ukepenuopfü hakemhie puya: Kekreilamonyü Edom-e Juda kiu gei puo khepu mu uko gei khepu lie di uko nou chü pesuo sewate.

¹³Süla Niepu-u Ukepenuopfü hakemhie puya: A dzie yhapie Edom petsoutuo, sidi themiako mu khunuoko chüsetatuo, sidi süu chü kemethuowatuo; uko Teman nunu vo Dedan ketso uko zhiecha geinu tetsutuo.

¹⁴Sidi a themia Israelko dzie geinu Edom gei a kheputuo; sidi uko a nouyie tsiu a nou kerüpe medzi di Edom gei mhachütuo; sidi uko a khepukelieu silietuo, Niepu-u, Ukepenuopfü siya.

¹⁵Niepu-u Ukepenuopfü hakemhie puya: Filistinmia mia pesekecü puo kela jü di khepulie, tsiu u nou kelhie di miapekawatuoü khepulie.

¹⁶Süla Niepu-u Ukepenuopfü hakemhie puya: A dzie yhapie Filistinko petsoutuo, siro Keretmia kelhiwatuo, mu dzükezha khie peshapie kebako pekawatuo.

¹⁷A a noupfhü siazha se uko gei khepu kemeriekecü se vortuo. A uko gei a khepulieshü tse, a Jihova zo ücü silietuo.