Read Angami Naga Ezekiel 26 Bible Online

Ezekiel 26 - Angami Naga bible

Ezekiel 26

¹Siro cie kerepuo-u cie, khrü zha puo nhie, Jihova die a ki vor di sie:

²Themiau, kekreilamonyü Tur-e Jerusalem dze pu di: “Yha, themiako kharu chau bierhuowate; süu ta a ki vorte; a ketshuchülietuo, tsie süue methuozhüte” isite.

³Süla, Niepu-u Ukepenuopfü puya: Harie, a n petsouya, he-i Tur! A seyie kekra bu dzükezha rüpfhü tuoi sier n petsoutuo.

⁴Sidi uko Tur sozhako durhuowatuo, mu puo tsiepfheko biemewatuo. A puo geinu puo rünyoko kezhüwatuo, sidi tsiekrie mhapuorei ba kemo chüwatuo.

⁵Puoe dzükezha metsuo nu jal kelhoukecü thechü puo chütatuo. A pushüwate, Niepu-u Ukepenuopfü siya. Süue seyieko pekakecü puo chütatuo.

⁶tsiu puo rüna nu rünako zhiecha pie dukhriwatuo. Sitse uko a Jihova zo ücü silietuo.

⁷Kekreilamonyü Niepu-u Ukepenuopfü pushüwate: A pesotsa kedi puo Babilon nu kediu, kediko mho kediu, gurako; guragariko, gura kesemia, tsiu chüpahi zha mu kuo phikecüko sa ze vor Tur petsoutuo.

⁸Puoe n kijü nu n nuopfüko-rünako zhiecha pie dukhriwatuo. Puoe n petsou di tsiepfhe pfhelietuo, n petsou di puo keya puo chülietuo, tsiu n petsou di pezhü sozha chülietuo.

⁹Puo n sozhako petsou di terhü vienya se vatuo, mu n tsiepfheko puo seidurüko pie duphrowatuo.

¹⁰Puo gura kekra zetuotuo, süla uko nyopheko n zepfülietuo. Gura kesemia, mhathuoko mu guragari pfheko la, n sozhako shükeniewatuo, puoe n kharuko nu keler ki nadi dahou pfüpha leketa mhie keshü ki.

¹¹Puo guramouko bu n chaü pete kedewatuo. Puo n themiako khapie zhiecha tsüwatuo, mu n co kemeteiko tetsu kijü zhütatuo.

¹²Uko n kinyiko pekawatuo, mu lhitholhiüko rüsetatuo; uko n sozhako bie mewatuo, mu uko n ki keviko pekawatuo. N tsieko mu n seiko, n nyako kelhoupie dzükezha nu shüwatuo.

¹³A n ütsali kechü pfheko la kemekrietatuo; n nyarübou pfhe si salie lho.

¹⁴A n chüpie tsiekrie kemethuo puo chüwatuo; noe jalko kelhoukeshü chü puo chütatuo. No mhakipuorei chü la sielie lho, kekreilamonyü a Jihova pushüwate, Niepu-u Ukepenuopfü puya.

¹⁵Niepu-u Ukepenuopfü hakemhie di Tur ki puya: No tetsuketa pfhe sikeshü ki, rüzakeliemia meheimelokecü ki, n donu mia kedukhrimia tuo phikecü ki, dzükezhakhie kijüko perüsürüsa bata lhoü me?

¹⁶Sitse dzükezha kedinuoko pete u kediba geinu kertatuo; uko pfhenei rhuowatuo tsiu puo khukethu pfheneiko lhewatuo. Uko perüsürüsakecüu chüdzielietuo, sidi kijü batatuo; sidi tsie kenuo perüsürüsa batatuo, tsiu n gei kemichie batatuo.

¹⁷Siro ukoe n la thekrü chütuo, sidi sie n ki: Kimhie di no dzükezha nu jüte shi, He-i nadi kemeyieu ze, va puo dzükezha nu kuo phishü zo, no mu n gei lhou kebako,[40] n kemichieu kijü kezhau pete[41] gei bate!

¹⁸No tetsuketa nhie dzükezha khie kijüko pebate; no tuokeshü nhie dzükezha khie keba kijüko thenou kemezhie bate.

¹⁹Kekreilamonyü Niepu-u Ukepenuopfü puya: A n nadiu chüpie puo bu rata tse, themia lhou baya kemo nadiko mhiewata tse, a mha kesuo se n gei kevor ki, mu dzü kekra vor n zepfülie tse,

²⁰sitse a Thekre n ketsüko sa di n mesüpie pekhrotsa thiedzü keriekimiako ki shüwatuo, sidi a n bu kijü khro lhoutuotatuo, thiedzü keriekimia Thekre nu tetsuketako kechachie kazhüketako donu shüwatuo, sitse mia n gei lhoulie motatuo morei noe kerheiko kijü nu n la thechü[42] balie lho.

²¹A n ze vo kemeriekecü kela puo nu shüwatuo, mu no ba salie lho, mia n pfhü zoshierei, n ngu lalie lhote, Niepu-u Ukepenuopfü puya.