Read Angami Naga Ezekiel 27 Bible Online

Ezekiel 27 - Angami Naga bible

Ezekiel 27

¹Jihova die a ki vor di sie:

²No tsie, themiau, Tur la thekrü chüliecie.

³Sidi Tur, dzükezha nu kele ki kebau, dzükezha khie themiako ki lhitholhiü chüyakezhau ki pushülie. Niepu-u Ukepenuopfü hakemhie puya: He-i Tur, no pukecü, “A zivi-e tsei zo” iya.

⁴N tieriekoe dzükezhako donu ba; n chükeshükoe chü kezivi tseishüte.

⁵Ukoe Senir nunu tehouko üse melako chüshü, uko n la Lebanon nunu sedar pie rou gei puo codi chüshü.

⁶Ukoe Bashan phriebo pie n routhuseiko chü; siro Kupra dzükezha khie tehou pie n rou kekhrako chü, mu tsohu pie süu ketso.

⁷Ijipt nunu se kevor linenpfhe puo khukethu kevithopfü pie n nou pfhelha chü, süu pie n zasi puo tuoi di; Elisha dzükezha khie nu teimeziekecü, tsiu keloshükecü pie n kewheu chü.

⁸Sidon mu Arvad nu kelhouko pie n routhumiako chü; Zemer nu mhachükesiko n donu ba, ukoe n routhumia chü.

⁹Gebal phichüko mu puo themiako mhachü kesiko nie donu ba, n nya keterhümia chü di; dzükezha nu ketuo rou pete roukethumia zeketuoe, n ze lhitholhiü chütuoükecü la zo.

¹⁰Persia mu Lud mu Put ukoe n chüpahi chü, n terhümiavimia chü; ukoe pezhü tsiu thegitsüre se n gei goushü; uko n chü kezivishü.

¹¹Arvad themiako mu Helekmiakoe[43] n rünako lutsa hatsa houpfü ba, siro Gamadmiako n kudako gei ba: ukoe u pezhüko pie n dahou lutsa hatsa goupie zha; uko n bu zivi lotsoliete.

¹²Tarshish-e kinyi neiünei keba nunu n ze kelhithokecümia chü; rakachü, thegi, tinyü mu guli se uko n ze thelhi chü

¹³Javan, Tubal, mu Mesek ukoe n ze thelhi chü; uko n lhitholhiü la themiako mu merenyi mhabouko se thelhi chü.

¹⁴Beth-togarma nu n kinu gurako, terhü gurako se thelhi chü.

¹⁵Rhodiamia[44] n ze thelhichü dzükezha khie kijü kekra rei n la lhithochü kevitho puo chü, ukoe tsohu tsiu eboni methuo se vor n tsü.

¹⁶Edom[45] n ze thelhi chü kekreilamonyü n mhanya kekra bakecü la; uko n ze turkuoise, pfhe keloshükecü, puokhu thukecü, linenpfhe kevipfü, koral mu rubiko se thelhi chü.

¹⁷Juda mu Israel kijüu n ze thelhi chü; uko Minith chülie, mepfhidzü, tier mu daru u kenheyakezhapfü se thelhi chü.

¹⁸Damaska-e no mhanya kekra bakecü la n ze thelhi chü, kekreilamonyü no mha neiünei bakecü la. Helbon zu mu nhachümie kekrapfü bakecü la.

¹⁹Uzal nu kevor Vedan mu Javan n ze lhitholhiü chü, thegi phriephriekecü, kasia, mu mharekethengupfü se lhitholhiü chü.

²⁰Dedan-e guragari bakhrapfhe la n ze thelhi chü.

²¹Arabia tsiu Kedar kedinuonuo pete, tekuonuo, mvüdo mu temvü se thelhi chü, n ze kelhitho pethoyakecüko, hako nunu uko n ze thelhi chüya.

²²Sheba mu Rama lhithomiako n ze thelhi chü; uko mharekethengu kevi pete, tsiu ketsie puoma kere pete, mu suna se n ze thelhi chüya.

²³Haran, Kane, Eden, Sheba n ze thelhi chü.

²⁴Hako pfhenei kevithopfü mu n ze kelhithokecümia chü, pfhe teimeziekecü mu pfhekhukethu, tsiu phikhrapfhe puozie kekreikecüko, keropie pha mu meteikecüko se n ze thelhichü; hakoha nunu uko n ze lhitholhiü chü.

²⁵Tarshish rouko n lhitholhiü la rüveya. Süla no dzükezha donu n ketshu chüpie mesi phi tuote.

²⁶N rou thuyakezhako n dzükezha kerükhie nu vor. Niathutsa teikhrieu dzükezha donu nu n hetsha phaphawata.

²⁷N kinyiko, n vie mha kezeko, n lhitholhiü, n rou nu, mhachüyakezhako mu n roukethumiako, n vie keterhüko, n lhitholhiütsatie mhachüyakezhako, mu n donu terhümiavimia pete, n gei keba kro-u pete ze di, n kepeka teisozha nhie rüle dzükezha donu letatuo.

²⁸N routhumiako kekra pfhe sikeshü ki, rüna khieümhou kebako rünietatuo,

²⁹mu uko rouko nunu tuo kertatuo, sidi pfhe seiko pete se kertatuo. Rou gei mhachüyakezhako mu roukethumiako pete ker kijü gei thatatuo.

³⁰Sidi n la shie petoshütuo, mu kra phitatuo. Uko nyophe kelhoupie utsü geishü, mu nyophe nunu rüphre zhütatuo.

³¹Uko n la u thuo u chü kemethuowatuo, sidi gakhropfhe chü dzietuo, mu n la u nousuo phi di kratuo, tsiu thekrü chütuo.

³²Siro uko krakecü ki uko n la thekrü chütuo, mu n la thekrü chükecü: “Supuonie Tur mhie di dzükezha metsuo nunu pekawa mu?

³³Dzükezha nunu n vienyako kevor ki, no mia kekra kelhuo chülie; mu n kinyi mu n lhitho ketshukelhuo keba se di kijü nu kediko chü penyishü.

³⁴Tsie we dzükezha nunu tetsutatuo, dzüko kesouko; n lhithoko tsiu n themia kro-u pete n ze rüle letatuo.

³⁵Dzükezha khie kelhouko pete n ngu u ngota zotuo; mu uko kediko pete michie kemerie chütatuo, uko zie kengu-u teimekietatuo.

³⁶Themiako donu keba lhithomiako n pesetuo; no mha kemeriekecü thelau vorte, sidi no kechachie tuo motatuo.”