Read Angami Naga Ezekiel 29 Bible Online

Ezekiel 29 - Angami Naga bible

Ezekiel 29

¹Teicie kerü cie, khrü ker-u nu, zha kerekenie nhie Jihova die a ki vor di sie:

²Themiau, n zie pie Ijipt kediu Faro petsoulie di puo petsoukecü mu Ijipt pete petsoukecü siedzekesidie pushücie.

³Sidi sie pushülie, Niepu-u Ukepenuopfü hakemhie puya: A n petsouya, Ijipt kediu Faro, Dragon kezhau dzüyieko metsuo nu zhü di sie, “A Nail sü a vie zo; a thuo a la süu chüshü” ibaya.

⁴A mhapie n meco goulietuo, siro a dzüyie nu khuoko bu n lhe dapfülietuo. A n dzüyie nu khuoko pete bu n lheko dapfü phre di n shütha se partatuo.

⁵Siro a n kelhoupie rayha nu shüwatuo, no mu n dzüyieko nu khuoko pete rei; noe phouyo nu tetsutatuo, sidi n pie vo khru reilie lho. A n khapie kijü nu khunuoko mu teikhrie nu perako bu u ca chütuoüwate.

⁶Sitse Ijipt kelhou nu themia pete ae Jihova zoücü silietuo, kekreilamonyü noe Israel kiu la tekhrie the puo kemhiete.

⁷Uko u dziepie n tekelie ki, no tseütsate, tsiu uko boukako cierhawa, mu uko vakhrie kesie ki, no tseütsate, sidi uko phiko pete bu metei mote.[46]

⁸Süla, Niepu-u Ukepenuopfü hakemhie puya: A zhiecha puo se n gei vortuo, sidi n geinu themia tsiu khunuo dathewatuo,

⁹tsiu Ijipt kijüue methuo mu katatuo. Sitse ukoe a Jihova zo ücü silietuo. Kekreilamonyü no sie, “Nail sü a vie, mu a süu chüshü” iya.

¹⁰Süla a n petsouya, mu n rüko petsouya, mu a Ijipt kijü chüpie methuo mu ka tseitatuo, Migdol nunu vo Sain ketso, Ethiopia[47] tierie ketso sitatuo.

¹¹Themia phi puorei süu pfüthe volie lho, mu khunuo phi puorei süu pfüthe volie lho, sidi cie hiedia sünu themia lhou motatuo.

¹²A kijü methuo zhüketa rünako donu Ijipt chüpie methuowatuo; sidi nadi methuo zhüketako donu puo nadi bu cie hiedia methuoketa chüwatuo. A Ijiptmiako chüpie seyieko nu cürewatuo, mu uko kezapie rünako nu shüwatuo.

¹³Süsierei, Niepu-u Ukepenuopfü hakemhie puya: Cie hiedia tseita tse Ijiptmia cüre tuoketara nu a uko bu vor kengulietuo.

¹⁴Mu a Ijiptmia die chüketuoko ze la vorshütuo, sidi uko ze Pathros kijü nu, uko rakhenu la vorlietuo, mu uko sünu kedi rüvie kerünuo puo chü di lhoutuo.

¹⁵Süue kedirüvie pete donu kerünuotho puo chütuo, mu mhakipuorei puo thuo puo chü kerükrie pie seyieko mho sielie lho; mu uko chü pecüpie uko bu mhakipuorei seyieko kekha la sierlie lho.

¹⁶Ijiptmiako Israel kiu kemerüu chü salie lho; ukoe süko kekhruohi mengukesie ki, uko kephouma rükralietuo, sitse ukoe a Niepu-u Ukepenuopfü ücü silietuo.

¹⁷Siro cie mepfüethenie cie, khrü puou nu, zha puo nhie, Jihova die a ki vor di sie:

¹⁸Themiau, Babilon kediu Nebukadrezar-e Tur petsou di puo chüpahi bu mhatho chü se, uko pete u tsü pieta, mu u bouka rülota; sishierei puo thuo mhachü di süu petsoukecü la Tur kinu zhakhra puorei ngulie mo.

¹⁹Süla Niepu-u Ukepenuopfü hakemhie puya: A Ijipt kijü pete pie Babilon kediu Nebukadrezar tsüwatatuo, puoe puo kinyiko setatuo mu süu rügulie mu süu pekawatuo, sidi süu pie puo chüpahiko zhakhra chütuo.

²⁰Puo mhakechü la puo zhakhra puo chü di a Ijipt khapie puo tsüwate, kekreilamonyü uko a la mhachü, Niepu-u Ukepenuopfü siya.

²¹Teisozha sünhie a Israel kikru geinu puo kia puo bu parlietuo, sidi a süko donu n tie bu tiehieshülietuo; sitse ukoe a Jihova zoücü silietuo.