Read Angami Naga Ezekiel 3 Bible Online

Ezekiel 3 - Angami Naga bible

Ezekiel 3

¹Puoe sie a ki, “He-i themiau, kha n ketsüu cüliecie; leshütshü hau cüliecie, di vo Israel kiu ki pushülie” si.

²Süla a mekuoshü, siru puoe a bu cütuoü di leshütshüu khashü.

³Puo a ki, “Themiau, leshütshü hau cülie di pie n va ketshu chüliecie” sita. Süla a süu cülie; siru a me nu moupie mepfhidzü kemhie zo.

⁴Siro puo a ki: Themiau, Israel kinuko ki vo di a dieko pie uko ki pushücie.

⁵Kekreilamonyü n ketsepie sikemo die kepumia morei u die silie keremia ki shüzhü mo, derei ketsepie Israel ki keshü zo,

⁶themia kekra u diepu kreikecümia ki tsiu u die silie keremia ki, no silie kenjükecümia ki shüzhü mo. Ketho zo, a n ketsepie uko ki shükecü sie, uko n pfhe rünyülie zotuo.

⁷Derei Israel kinukoe n pfhe rünyülie lho, ukoe a pfhe rünyü mvücü la; kekreilamonyü Israel kiu pete mengaya mo mu thenou re zocü la.

⁸Harie, a n zie chü pekuopie uko zie petsoulie kevi chüshütuo, mu n teikhie chü pekuopie uko teikhie petsoushü ho.

⁹Ketsiethegae tsiekhrü kirei khrükuokecü tuoi ae n teikhie chüpie sükemhie shüwate; uko prei hie, morei uko kengu-u la thedzükouta hie, kekreilamonyü ukoe mia perhieyakezha ki puota zo.

¹⁰Puoe a ki: Themiau, a n ki pukeshü dieko pete n melou nunu lielie, tsiu n nyie pie rünyülie,

¹¹sidi n themia mia die chütuoketako ki vocie, sidi uko ki pushülie. Uko ki, “Ukepenuopfü Niepu-u hakemhie puya,” idi pushülie, u thuo rünyü rei morei rünyü mo zorei.

¹²Sitse ruopfüue a pie sieta, mu thechü süu nunu Jihova zayieu sieketa[7] ki, ae a sietsa nu mhapfhe kemeriekecü puo si.

¹³Süue khunuo kerheiko shü huoniehuo nyükecü pfhe, tsiu süko petsou keba gari pfhe, siro ta kemerie chüketuo pfhe puo si.

¹⁴Ruopfüu a pie sieta, di a ze tuota, sidi ae a nou a the zo di a nei mo pie mhapuochü vota, sirei Jihova dzieue a gei kuo se tuo.

¹⁵Süsie ae Kebar rü khieki Tel-abib nu kedie chü di lhou kebako ki vor, siro uko kebara balie, di a uko donu zha thenie a va pethopfü bata.

¹⁶Siro zha thenie tseita tse, Jihova die a ki vor di sie;

¹⁷Themiau, a n chüpie n bu Israel kiu kepfheu chüshüte ho; süla kehoukipuorei a tie nunu kepar die rünyülie liro, no a ki nunu kemichie vortuoü keba süko se uko ki pushüliecie.

¹⁸Mhanuü ae kerüzhümia ki, “No siata tou zotuo” ishü derei no thededie puorei pushü mo, morei uko kerheiro kelalietuoü di uko bu u kesuokechü cha nunu rüreilienukecü rei se pushü mota ro, themia kerüzhüko u kesuokechü nunu siatatuo, derei uko zie ma n dzie nunu lietuo.

¹⁹Derei mhanuü no kerüzhüko ki kemichie pesishü, mu ukoe u kesuo kechü nunu morei u kerüzhü cha nunu rüreilie mo liro, ukoe u kesuo kechü nunu siata zotuo; derei noe n kerheiro kelaliete.

²⁰Lasie, themia kemiathomiae u kemiatho nunu tsiesieta di mha kesuo chüwa liro, mu ae thephikemesü puo khapie u mhodzünu shü, sitse ukoe siatatuo; kekreilamonyü noe kemichie vorketuo pushülie mote, mu ukoe kephouma nunu siatatuo, mu u kemiatho mhatho chükeshüko rükralie lhotatuo; derei ae uko zieu ma n dzie nunu chatuo.

²¹Sishierei mhanuü noe kemiathoko ki thededie, u bu phouma hienu shülie, mu ukoe phouma molie ro, uko rhei toulie zotuo, kekreilamonyü uko pukeshüu rünyülieketa la; mu no rei n kerheiro kelalietuo.

²²Sitse sünu Jihova dzieu a gei tuota; mu puoe a ki, sielie di razha nu tsulie, sitse sünu nu a n ki mhaputuo.

²³Süla a sielie di razha nu tsu; siru Jihova zapuzayieu sünu tha, Kebar rü khieki nu a zapuzayie kengu-u mhie di; sitse a zere tsuta.

²⁴Sitse ruopfüu a nou leta, sidi a bu siethalie; sitse puo a ze kerüchü di a ki: Tuo vo di n ki nunu kikhapfü batacie, sita.

²⁵Derei n la we, themiau, kero pie n gei shütuo, sidi süko pie n phalietuo, süla noe themiako donu volie lhotatuo;

²⁶siro ae n meü chüpie puo bu n me pesotsa dapfü batatuo, sidi noe keliehuomia chü di uko kerhielie lhotatuo, kekreilamonyü ukoe mia perhieyakezha kinumiata zo.

²⁷Derei a n ki mhapukeshü ki, a n me khoshütuo, sitse no uko ki “Ukepenuopfü Niepu-u hakemhie puya” isituo; rünyüketuomia bu rünyülie; tsiu rünyü mvükecümia bu rünyü hie; kekreilamonyü ukoe mia perhieyakezha ki puo zoeru.