Read Angami Naga Ezekiel 30 Bible Online

Ezekiel 30 - Angami Naga bible

Ezekiel 30

¹Jihova die a ki vor di sie:

²Themiau, siedzekesidie pushüliecie, sidi sie, Niepu-u, Ukepenuopfü hakemhie puya: Kra ruorüilie, “Yha, teisozhau we chülietie” ishülie.

³Kekreilamonyü teisozha penuo bate; Jihova teisozhau penuo bate; süu kimhou shübouikecü teiso puo, seyieko la ketsokecü teisozha puo.

⁴Zhiechau Ijipt gei vortuo, tsiu kemezhiekecü Ethiopia gei vortuo, dukhrikewako Ijipt nu tetsuketa ki, mu puo kinyiko chü seketa ki, tsiu puo mvüdzeko bierhuokewa ki.

⁵Ethiopia[48], mu Put mu Lud, tsiu Arabia pete, mu Libia[49], siro chazoumia kijüu nu themiako pete uko ze di zhiecha geinu tetsutuo.

⁶Jihova hakemhie puya: Ijipt sekethako tetsutuo, mu puo kemiakoketuo rei se kerwatuo; Migdol nunu vo Sain ketso ukoe süu donu nu zhiecha geinu tetsutuo, Niepu-u Ukepenuopfü siya.

⁷Ukoe methuo zhüketa rünako nunu methuo zhütatuo, mu uko nadikoe razhüketa nadiko donu nu razhütatuo.

⁸Sitse uko a Jihova zo ücü silietuo, a mi pie Ijipt thekeshü ki, tsiu puo khruohiyakezhako pete bietshebietshakewa ki.

⁹Teisozha sünhie, a kitsa nu dieliemia rouko geinu vo lebakemopfü Ethiopia[50] kedetheshü tuo; mu kemezhiekecü se Ijipt ketsokecü[51] zha nhie uko gei vortuo; kekreilamonyü süu vorzhie!

¹⁰Niepu-u Ukepenuopfü hakemhie puya: A Babilon kediu Nebukadnezar dzie geinu, Ijipt krodi bu ba sa motatuo.

¹¹Puo mu puo themia puo zeketuoko, seyieko donu kemeriethokecüu se vor di kijüu pekawatuo; mu uko zhiechako shüzou se par Ijipt petsoutuo, sidi dukhrikewa mo pie kijüu tshuwatuo.

¹²A kerüko chü pesowatuo, sidi kijüu ze pie themia kerüzhümia dzienu shüwatuo, a chazoumia dzie nunu kijüu, mu sünu ketuo pete bu methuoketa chüwatuo. A Jihova thuo pushüte.

¹³Niepu-u Ukepenuopfü hakemhie puya: A terhuorhiko pekawatuo, tsiu Memfis miarhiko bu ba sa motatuo; süki Ijipt nu kedinuo puorei ba salie lho; sidi a kemichie pie Ijipt kijü nu shüwatuo.

¹⁴A Pathros chüpie methuowatuo, tsiu Zoan gei mi chüshütuo, mu Thebes gei ketsokecü khashütuo.

¹⁵A a nouyie rupie Pelusium gei shütuo, Ijipt dahou kemeteiu gei, mu Thebes krodiu dathewatuo.

¹⁶A Ijipt gei mi chüshütuo; Pelusium-e thenoukemezhie setatuo; Thebes cierhawatuo, tsiu Memfis-e teiso gei kemezhiekecü ze kesetuo.

¹⁷On mu Pibeseth khriesako zhiecha geinu tetsutuo; mu uko nadiko thuo[52] miadie chü votatuo.

¹⁸Tehafnehe nu rei teisozhau bu zeitatuo, a Ijipt mha kekhakecü biekhrükeshü ki, mu puo kemiakokecü ba sa motatuo, nadiko kimhou bu zepfülietuo, mu puo kepenuo rünako miadie chü votatuo.

¹⁹Hamhie di a Ijipt gei ketsokecüu se vorshütuo; sitse uko a Jihova zo ücü silietuo.

²⁰Siro cie kerepuokrü cie, khrü thenieu nu, zha puo nhie, Jihova die a ki vor di sie:

²¹Themiau, a Ijipt kediu Faro bou bietshewate; mu süu chü kemene latuoülie lho morei pfhenyhie pie phashü lho, sitse zhiechau theze kemeteilie lhotatuo.

²²Süla Niepu-u, Ukepenuopfü hakemhie puya: A Ijipt kediu Faro perhieya, mu puo bou bietshewatuo, puo bou kemeteiu siro bietshewaketau rei kenienie rei zotuo; mu a zhiecha bu puo dzie nunu tetsutatuo.

²³A Ijiptmiako bu seyieko donu cüretatuo, mu kijü pete nu uko bu keza tuotatuo.

²⁴A Babilon kediu bou chü kemeteishütuo, sidi a zhiecha pie puo dzie nu shütuo; derei a Faro bou we bietshewatuo, sidi puoe themia rüzapfükeliemia puo tuoi puo mhodzünu melozhütatuo.

²⁵A Babilon kediu bou chü kemeteishütuo, derei Faro bou we tetsutatuo. A zhiechau pie Babilon kediu dzie chükeshü ki, ukoe a Jihova zo ücü silietuo. Puo süu yha sie di Ijipt kijüu petsoutuo,

²⁶mu a Ijiptmiako bu seyieko donu cüre mu rünako nu kezakezi tuotatuo. Sitse uko a Jihova zo ücü silietuo.