Read Angami Naga Ezekiel 31 Bible Online

Ezekiel 31 - Angami Naga bible

Ezekiel 31

¹Siro cie kerepuokrü cie, khrü seu nu zha puo nhie, Jihova die a ki vor di sie:

²Themiau, Ijipt kediu Faro mu puo krodiu ki pushücie: No zhapie supuo ze kemhieü bata ga?

³Asiria dze leshüphi, Lebanon nu sedar-u, puo coko zivi mu puokhrü nha whese kebau, rükrie phi, puo mezüko kimhouko donu ba.[53]

⁴Dzüe puo va perhei, mha kesou-u puo bu memie rükrie sielie, puo pelhoupie keba khieümhoura, puo rüko bu kruzhülie, sidi rücüko bu kru lie nu seiboko pete tsolieya.

⁵Sidi puoe nha nu seibo pete mho rükrie kholie; dzükekra keba ki ze puoco thepezha sielie, mu puo coko poupecha sierlie.

⁶Teigei ketuo perako pete rei puodza kezhako geinu u kru chü; puo coko khronu nha nu khunuoko pete rei u nuonuoko penuolie; mu puo khrükhro nu seyie pete lhou ba.

⁷Süu puo kezha nunu, puo kecha nunu zivi phi; kekreilamonyü puo mieko dzü kekra kebara letacü la.

⁸Ukepenuopfü zie nu sedarboko zorei puo mhielie kenjü, morei Fir bo zorei pie puo coko ze ketou mo; tsiu thezhü seiboko zorei puo coko kemejülie kenjü; Ukepenuopfü zie nu seibo puorei sünu mhie zivi mo.

⁹Puoe puoco kekra petheshü di puo bu zivikelie chüshü, Eden seibo pete, Ukepenuopfü zie nu kebako ngu u rota zo.

¹⁰Süla Niepu-u, Ukepenuopfü puya: Kekreilamonyü puo mezü rükrie khoketa la mu puo mezü pie kimhouko donu baketa la, mu puo noue puo rükrie la kemiakote.

¹¹A puo khapie seyieko kedinuomia dzie nu shüwate; puoe kerüzhümia ngukezhü ngukecü tuoi puo gei rei sümhie chüshütuo. A süu whuowatuo.

¹²Chazoumia, seyieko donunu kemeriethocü mia puo dathewa di puo khawatuo. Sidi kijüthouko gei mu razha pete nu puo coko tetsutatuo, tsiu kijü gei dzüluokiko nu puocoko tetsutatuo, sidi kijü nu themia peteko puo khrükhro nu tuotatuo mu puo khawatuo.

¹³Siro puo tetsuketa mvüu gei teirako vor batuo, mu puo coko donu nhachüko pete vor batuo.

¹⁴Mha hako bu puo thuo puotou nu balieketuo la dzükhie keba seibo puo bu rei rükrie seta molie morei puo mezü pie kimhou donu[54] bata molie, sidi dzü krieyakecü seibo puo bu rei rükrie kho uko tsowa molie. Kekreilamonyü uko pete rei khapie kesia nu shüwate; kijü khro shüwate; themiako pete sa di, thekre nu tsuketako ze di.

¹⁵Niepu-u Ukepenuopfü hakemhie puya: Süu Sheol nu tsuketa nhie a mha kesou-u pie süu khawa di süu whewa; a puo kerüko dewa, tsiu puo dzü kekra kebako kethewa. A thedzükezei pie Lebanon pedzieshü, mu süu la nha nu seiboko pete rüwita.

¹⁶Puo tetsuketa pfhe sikeshü ki, a thekhe nu tsuketako sa di puo pie Sheol nu shükewa ki seyieko rünieta; sidi Eden seibo pete. Lebanon kevitho-u dzüluo dzü pete kijü khro nu u nei batatuo.

¹⁷Uko pete puo ze Sheol nu ketatuo, zhiecha pie dukhrikewako ki, puo yakepieko[55] sa di tsutatuo; süko kijükhru seyieko donu mhakhrü nu lhou baya.

¹⁸Eden seiboko donu supuoe n kevi mu n kezha mhie ga? Sishierei no Eden seiboko sa di kijü pekhrotsa tsutatuo; noe uzhürekemoko donu zhütatuo, zhiecha geinu siaketako ze di zhütatuo. Faro mu puo krodiu pete hakemhie chütuo, Niepu-u Ukepenuopfü puya.