Read Angami Naga Ezekiel 32 Bible Online

Ezekiel 32 - Angami Naga bible

Ezekiel 32

¹Teicie kerekenie, khrü kerekenieu nu zha puo nhie, Jihova die a ki vor di sie:

²Themiau, Ijipt kediu Faro la thekrü chüshülie, sidi puo ki: No n thuo seyieko donu losha puoücü leya, derei noe dzükezha nu dragon puo mhie zo; n rüko nu dzüvü vor, n phi pie dzüko buopekrie di n[56] rüko perhuwa.

³Niepu-u Ukepenuopfü hakemhie puya: Themia kekra kenguketha nu a[57] jal kelhoupie n geishütuo; sidi a jal nunu n teshü se partuo.

⁴A n kelhou pie kijü shüwatuo, a n kelhoupie phouyo nu shütuo, sidi teigei rako pete bu n gei batuo, tsiu a kijü pete nu nhachü pete n ze mhacü keduotuo.

⁵Siro a n chü kelhoupie kijüthouko gei shüwatuo, mu n kesiamo pie sozha ketshu chüwatuo.[58]

⁶A n zie kru kezhüpie kijü nunu vo kijüthou ketso petsewatuo; tsiu kerükoe n thuo tshupfü zhütatuo.

⁷Siro a n pemhewata ro, a teiko whewatuo; sidi uko themvüko bu zeitatuo, a kimhou pie niakiu whewatuo, mu khrüu puo kezie khashü motatuo.

⁸Teiko gei kezie phriephriei bayakezha pete chüpie uko bu n mhogei zeitatuo, sidi n kijü nu kezeiu khashütuo, Niepuu Ukepenuopfü siya.

⁹A n ze seyieko donu no si mo zokecü rünako nu kedie chü voketa ki,[59] a themia kekra nou chü kemezhieshütuo.

¹⁰A themia kekra bu n la u ngotatuo; uko kediko n la michie phitatuo. No tetsutaketuo tei nhie, a uko mhodzünu a zhiechau kegekeshü ki, mia puopuokecü u kerheiro la puotei pete nu petatuo.

¹¹Kekreilamonyü Niepu-u Ukepenuopfü hakemhie puya: Babilon kediu zhiechau vor n petsoutuo.

¹²A n krodiu bu kekuomia zhiecha geinu tetsutuo, uko pete rei seyieko donu kemeriekecüko. Uko Ijipt se kemelha bayakezhau biepesuowatuo, sidi puo krodiu pete kaüjütatuo.

¹³Siro a dzü kekra keba khieki nu khuriko pekawatuo; themia phi bu uko kebvü salie lho, morei khunuo phi bu uko kebvülie lho.

¹⁴Sidi a uko dzüko bu mesatatuo, tsiu uko kerüko bu tier tuoi krutuo, Niepu-u Ukepenuopfü siya.

¹⁵A Ijipt chüpie puo bu methuota, tsiu kijüu tshupfhü keba pete tuo mota, mu a sünu lhou kebako vüshü tse, süki ukoe a Jihova zoücü silietuo.

¹⁶Hau thekrü puo; süu phrü kelituo. Seyieko thenupfüko süu phrü kelituo. Ijipt mu puo krodiu pete la, uko süu phrü kelituo, Niepu-u Ukepenuopfü puya.

¹⁷Siro cie kerekenieu cie, khrü kerieu nu zha kerepengou nhie, Jihova die a ki vor di sie:

¹⁸Themiau, Ijipt krodiu la kraruorüiliecie, sidi uko ketsepie pekhrotsa shüwalie, Ijipt mu seyie kemeyieko nuopfüko bu Thekre nu tsuketako ze kijü khro shüwacie.

¹⁹“Supuo n ki zivi ga? Tuo kelie! Sidi zhürekemoko ze rülei zhütalie!” sita.

²⁰Ukoe zhiecha geinu dukhrikewako donu tetsutatuo, Ijipt khapie zhiecha tsüwatatuo, puo mu puo krodiu chüsetatuo.

²¹Kezhathomia Sheol donu uko kekhruohiko ki uko dze pu di sie: “Uko tekerte, uko zhürekemoko zhiecha bu dukhrikewako ze zhüte” isituo.

²²Asiria mu puo krodiu pete sünu ba, uko mekhruko puo khieki ba, peteko rei zhiecha geinu dukhriwate.

²³Uko mekhruko Thekhe kesouthoko khieki nu chüpie ba. Puo kro-u pete puo khieki houpfü ba, uko pete rei zhiecha geinu tetsute, kekreimia kijü nu kemichie se voryakezhako pete.

²⁴Elam sünu ba, mu puo krodiu pete puo mekhru khie houpfü ba; peteko rei dukhriwate, zhiecha geinu tetsute, uko zhürelie mo di kijü pekhro-u nu tsute, kerheimia kijü nu kemichie se voryakezhako. Uko Thekhe nu tetsuketako ze thengau toupfüliete.

²⁵Ukoe dukhripie kezhü themia kro-u pete ze kezhüko donu Elam thezhü puo chülie, uko mekhru puo khie houpfü ba, uko pete rei u zhürekemomia zhiecha geinu siaketamia phre; kekreilamonyü kerheimia kijü nu uko kemeriekecü se vorkeshüko, mu uko Thekhe nu tsuketako ze di uko thenga toupfülie, uko khapie dukhrikewako donu khapie zhüwate;

²⁶Sünu Meshek mu Tubal, tsiu uko kro-u pete ba, uko mekhruko pete uko khie houpfü ba, uko pete rei u zhürekemomia phre, zhiecha geinu dukhrikewamia phre, kekreilamonyü ukoe kerheimia kijü nu kemichie se voshü.

²⁷Siro ukoe thiedzütho terhümiavimiako[60] u rünyieko se di Sheol nu tsuketako u zhiecha pie u tsü khro kezhüko, mu u pezhüko[61] u ruko geikezhüko ze zhülie lho; kekreilamonyü kerheimia kijü nu terhümiavimia kemeriekecü baketa la.

²⁸Süla n bietshebietshawatuo sidi uzhürekemomia, zhiecha geinu siaketako donu zhütatuo.

²⁹Sünu Edom, puo kediko mu puo kedinuoko pete ba, kekuou zhiecha geinu dukhrikewako ze zhüte, ukoe uzhürekemomia, Thekhe nu tsuketako ze zhüte.

³⁰Sünu pesotsa kedinuoko uko pete, tsiu Sidonmiako pete, thenga nunu dukhrikewako ze di tsuketako, kekreilamonyü uko kekuo nunu mha chü kemidekeshü uko pete sünu ba; uko uzhürekemoko ze di zhiecha geinu siaketako ze zhü, sidi thekre nu tsuketako ze di thengau toupfülie.

³¹Faroe süko ngukeshü ki, puo krodiko pete-Faro mu puo rüpfhünuoko zhiecha geinu siaketako la puo nou luolietuo, Niepu-u Ukepenuopfü siya.

³²Kekreilamonyü puoe kemeriekecü se kerheiko kijü nu vorkeshü la; süla puo u zhürekemoko ze di zhiecha geinu siaketako donu zhütatuo. Faro mu puo kro-u sa di Niepu-u, Ukepenuopfü siya.