Read Angami Naga Ezekiel 33 Bible Online

Ezekiel 33 - Angami Naga bible

Ezekiel 33

¹Jihova die a ki vor di sie:

²Themiau n themiako ki pushülie, uko ki, mhanuü a zhiecha se kijü gei vor, mu kijüu nu themiakoe u miako donu puo ze vor di puo pie uko rükhou-u chülie ro,

³mu mhanuü rükhou-ue zhiecha kijü gei vorkezhü ngu di ketsüu khoushü sidi themiako perhoshü ro;

⁴sirei ketsüu pfhe si zorei miapuorei rholie mota, sidi zhiechau vor di uko biewa üro, uko zie thuo u tsü gei pfütuo.

⁵Ukoe ketsü pfheu sishü zo, derei rholie mote, süla uko zieu uko tsügei zotuo. Derei mhanuü ukoe rholie liro, ukoe uko kerheiro kelalietuo.

⁶Derei rükhou-ue ketsü khoushü mota, sidi themiako perhoshü mota, mu zhiechau vor di uko donu mia puo pesiawa ro, uko kephouma nunu uko chüsete, derei uko zieu zo we a rükhou-u dzie nunu lietuo.

⁷Süla no, themiau, a n chüpie Israel kiu la rükhou-u chüwate ho! Kehoukipuorei no a tie nunu die silie ro, no a kinunu uko perhokecü die pushülie.

⁸Mhanuü a kerüzhüko ki, “He-i kerüzhüu, no sia tou zotuo” ishü, mu kerüzhüko bu u kerüzhü nunu rüreilieketuo la uko perhoshü mota ro, kerüzhükoe u kephouma zhoko nunu siatatuo, derei uko zieu n dzie nunu lietuo.

⁹Derei mhanuü no kerüzhüko bu u kerüzhü zhoko nunu rüreilie nu pushü, mu ukoe uko zhoko nunu rüreilie mota ro, kerüzhükoe uko kephouma nunu siatatuo, derei no we n kerheiro kelalietuo.

¹⁰Süsie no, themiau, Israel kiu ki pushülie, nie hakemhie kecü puya: “Hie kejokemou tsiu hie kephoumako hie gei zotuo, mu hie süko la katata bate; siliro kidi hie rheilie vituo ga?” siya.

¹¹Süko uko ki pushülie, A rheiketuo tuoi, Niepu-u Ukepenuopfü puya, a kerüzhümia siaketa a neiya mo, derei kerüzhümia bu u zhoko nunu rüdilie di rheikelie a neiya; rüdeiliecie, nie kesuokechü chako nunu rüreiliecie; kiüdi nie siatatieya mu, he-i Israel kiu?

¹²Siro no, themiau n themiako ki pushücie, kemiathomia miathoe puo kejokemou chükewa nhie puo kelalie lho; mu kerüzhümia la we puo rüzhü nunu rüdikelie nhie, puo rüzhüu la tetsutalie lho, mu kemiathomia puo phoumakewa nhie puo thiedzü miatho kevor la üdi rheilie lho.

¹³Ae kemiathomia ki ukoe rheilietuo ishü, sizorei ukoe u thuo u miatho peleta di kejokemou chü liro, puo kemiatho mhathoko puorei rükra lalie lho; derei uko kephouma chükewa geinu uko sia zotuo.

¹⁴Sishierei a kerüzhüko ki, “Nie siata tou zotuo,” ishü, sirei ukoe uko kephouma nunu rüdeilie di thezho tou-u mu kemezhüu chülie.

¹⁵Kerüzhümia phrakeshüu chüshülie, sidi puoe rügukelieu kha lashüwa, mu themia kelhou zho-u medzilie, kephouma chü molie ro, uko rhei toulie zotuo, uko siatalie lho.

¹⁶Uko kephouma chükewa kehoupuorei rükra salie lho; uko thezho-u mu kemezhü tou-u chülie, süla uko rhei toulie zotuo.

¹⁷Sirei nie themiako sie, “Jihova zho puotou mo we,” siya. Uko thuo uko zho puotou kemo chükecü ki.

¹⁸Siro kemiathomia u kemiatho nunu rüdita di kejokemou chüketa ki, uko süu la siatou zotuo.

¹⁹Sirei kerüzhüu puo kerüzhü nunu rüdeilie sidi thezho tou-u mu kemezhüu chülie liro, puoe süu la rheilietuo.

²⁰Sishierei nie sie, “Jihova zho-u puotou mo” isiya. He-i Israel kikru-u, a nie zho kize nie pete nyiekecütuo!

²¹Siro hie miadie chüketuo cie kerekenieu cie, khrü ker-u nu, zha pengou nhie, Jerusalem nunu ta prakeliemia puo a ki vor di sie, “Nadiu tetsute” sita.

²²Taprakelieu kevor mhodzü tou ki, thevatie ki Jihova dzieu a gei tuo, derei puoe khise tapakelieu a ki kevor ki a tie bu diepulieketuo chüshü; süki a tie diepulieta, tsiu ae liehuo sa mota.

²³Jihova die a ki vor di sie,

²⁴Themiau, Israel kijü khawaketako nu lhou bayakezhakoe hakemhiecü pu bate, “Abraham-e mia puo rübei zo; sirei puoe kijüu welie, derei hieko we themia kekra; süla kijü khapie hie bu welietuoü kha toushütuo” sita

²⁵Süla uko ki pushücie, Niepu-u Ukepenuopfü puya: Nie thezie sa di themuo cüya, sidi nie mhipie nie terhuorhiko mehoya, mu thezie pekruya; siüliro nie kijüu welietuo me?

²⁶Nie nie zhiechako gei thaya, nieko kerütsekecüko chüya, mu nie mia puopuokecü nie zanuomia kimiapfü perhuwate; siro nie kijüu welietuo me?

²⁷Mha hau pie uko ki pushücie, Niepu-u Ukepenuopfü puya: A rheiketuo mhiei, khawaketa thechüko nu ketuo pete zhiecha geinu tetsutuo; mu a lie phouyo nu ketuoko nhachü bu mezulieketuo la khashüwatuo; mu kuda kemeteiko nu mu tsiepfü nu kebako bu thepetheruo nunu siatuo.

²⁸A kijüu methuo mu ratatuo, mu puo kemiako kebau pie puo thela chüwatuo; mu Israel kijüthouko bu methuota di mia puo bu rei sünu pfüthe vo motatuo.

²⁹Sitse ukoe a Jihova zo ücü silietuo, uko mhakerütsekecü chükecü la a kijü bu methuo lotsokewa ki.

³⁰Mu no we, themiau, n themia keze di sozhako kinu mu kiko kikhaki nu n dze pu, sidi huoniehuo ki, u zanuomia üse, “Vor di Jihova kinu die kedipuo vortie shi rünyücie” isiya.

³¹Ukoe themia voryakezha tuoi n ki vorya, mu uko themia kekra n mhodzüki keba tuoi n mhodzüki balie, sidi uko n dieko rünyülie, derei uko süko zelie lho. Kekreilamonyü uko tie pie mia kekhrie die puya, derei uko nou pie mha kemehoutsa tuo zo.

³²Uko khieki we noe kekhrie tsali chüyakezhamia puo,[62] puo pfheü vi se di übou khou si sekecü puo mhiete, ukoe no kedipuo pu shi rünyülie, derei uko süu chülie lho.

³³Mha hau chü vorte, süu rei vor toutuo! Sitse ukoe siedzekesimia puo uko donu keba silietuo.